Kalohk Doadoahngki Telephone me kin Pweida Mwahu

¹ Atail mehn akadei nin duwen Sounkadehdehn Siohwa kan kaidehn ihte en wia doadoahk en kalohki Rongamwahu ahpw en wia uwen me kitail kak en tuhwong aramas koaros ni atail pahn kalohki Rongamwahu. (Wiewia 10:42; 20:24) Mendahki kalohk ni ihmw-lel-ihmw kin wiahte keieun ahl en tuhwong aramas akan, kitail pil wehwehki me kitail sohte kak tuhwong aramas koaruhsie ni atail kin kalohk ihmw-lel-ihmw. Eri, pwehn kak ‘kapwaiada atail pwukoa koaros ni atail kin wia doadoahk en kalohk,’ kitail kak doadoahngki ahl teikan​—iangahki kalohk doadoahngki telephone⁠—pwehn kak rapahki irail me rasehng “sihpw.”​—2 Tim. 4:5.

² Nan wasa tohto, aramas akan kin mihmi nan apartment kan me kin “high-security,” oh pil soangen apartment kan me peneinei tohto kin mihmi loale, de wasa kan me kehl kin kapilpene me kin security laud ni wasahn pedolong, oh ih soangen wasa kan me e kin apwal en kalohk ihmw-lel-ihmw. Oh pil, nan wasa kan me kitail kak kalohk ihmw-lel-ihmw, pali laud en aramas sohte mihmi ni imwarail kan. Ahpw, sounkalohk tohto kin diarada me re kin pweida mwahu ni arail kin doadoahngki telephone pwehn kalohk ong aramas pwukat. Ehu rahn, ni ahnsou me pwopwoud ehu kalohk ihmw-lel-ihmw, re diarada me sohte aramas mihmi ni ihmw duau sang ihmw koaros me re kohla rahno. Mwurin mwo, re pwurala ni Kingdom Hall, oh re kilang nan pwuhken telephone pwehn rapahki nempehn telephone en ihmw kan me sohte towe. Re telephonela rehn aramas akan me mihmi ni ihmw duauwo oh re tuhwong aramas 8 sang 9!

³ Ke kin pweiek en doadoahngki telephone pwehn kalohk ong aramas akan? Emen brother koasoia: “I sohte kin perenki aramas akan me kin telephonedo rehi pwehn netikihong ie mehkot; eri, I kin kalapw medemedewe soahng kan eri I sohte lemeleme I kak telephonela rehn aramas akan pwehn kalohk ong irail.” Ahpw, mwurin e doadoahngki telephone pak riau pwehn kalohk, e koasoia: “I inenen perenki! I sohte lemeleme I pahn perenki, ahpw, ni mehlel, I uhdahn perenki! Aramas akan kin nsenamwahu ni arail kin lokolokaia nan neirail telephone oh pil, ong ngehi, pwuhk koaros me I anahne kin mihmihte limwahi oh I kak koasoi oh ma I anahne ehu pwuhk, I kakete ale. Kalohk doadoahngki telephone kin wia ehu ahl en kalohk me kin pweida mwahu!” Emen sister pil ahneki soangen pepehmohte oh e koasoia: “I sohte men kalohk doadoahngki telephone. Ni mehlel, I sohte men wia. Ahpw, I song oh I diarada me e inenen mwahu. Ni ahnsouwet, pwehki ahi wia kalohk doadoahngki telephone, mie ahi return visit 37 oh Paipel Study tohto oh I pil sohte kak wia koaros!” Ma ke kak song wia kalohk doadoahngki telephone, ke pahn diarada me e kin pweida mwahu.

⁴ Koasoandi en Kalohk Doadoahngki Telephone: Sounapwalih en Kalohk kin koasoanehdi soahng koaros me pid kalohk. Ma anahne, elder kan kak pilada emen elder de ministerial servant me koahiek pwehn iang Sounapwalih en Kalohk oh koasoanehdi soahng kan me pid kalohk doadoahngki telephone. Brothero me pahn iang sawas pil anahne iang wia kalohk doadoahngki telephone, pwehki ih me pahn kihda wasahn kalohk oh ntingihdi pwung dahme wiawi nan wasa pwukat. Oh pil, Sounapwalih en Circuit pahn tehk duwen ma koasoandio me re koasoanehdi ong mwomwohdiso pweida mwahu de re anahne kamwahuwihala.

⁵ Ma mie wasa kan nan atail wasahn kalohk me kitail sohte kak kalohk ihmw-lel-ihmw, brother kan pahn koasoanehdi pwehn wia kalohk doadoahngki telephone nan soangen wasa pwukat. Brother me ahneki pwukoa en apwalih kalohk doadoahngki telephone pahn ntingihdi mehnia ihmw kan me pahn mwahu en telephonela rehrail oh e pahn kihpene oh wiahda kisin wasahn kalohk sang adres ko. Wasahn kalohk pwukat pahn tikitik pwehn kak kaukaule kalohk wasa kan. Map en wasahn kalohk kan pahn kasalehda ma mie wasakis kisehn wasahn kalohk me sounkalohk kan kin wia kalohk doadoahngki telephone.

⁶ Sang iawasa kitail kak ale nein aramas neirail nempehn telephone? Ke kak kilang nan pwuhken telephone (reverse directory) pwe pwuhko pahn kasalehda adres en aramas akan iangahki neirail nempehn telephone oh soangen pwuhk pwukat kin mihmi ni Public Library. Ma wasa ieu me kin security laud kin kolokol nempehn telephone en irail koaros me kin mihmi wasao, mwein ke kak song en kilang doaropwe me nempehn telephone ko mih loale oh ntingihdi. Ma ke sohte kak, ke kak ntingihdi eden irail koaros me kin mihmi wasao, oh ke kak kilang neirail nempehn telephone sang nan pwuhken telephone.

⁷ E pahn mwahu ma elder kan kin nsenohki irail akan me kin kalohk doadoahngki telephone oh re kak wia met ni arail pahn koasoanehdi sounkalohk kan me ese kalohk doadoahngki telephone en sewese meteikan en kaiahne irail en kalohk doadoahngki telephone (mwein re kak sawaspene pahnangin prokram me adaneki “Pioneers Assist Others Program”). Ekei pak, elder kan kak koasoanehdi en wia padahk nan Service Mihding ong “Anahn en Sahpwet” me pahn kasalehda duwen pweida mwahu en kalohk doadoahngki telephone.

⁸ Ni ahnsou me elder kan kin kohla rehn irail brother oh sister mah kan de soumwahu kan me kin mihmihte nan ihmw pwehn kangoange irail, re kak pil kangoange irail en kalohk doadoahngki telephone. Eldero kak wia ekei telephone call kan pwehn kamwomwada iaduwen sounkalohko kak iang kalohk doadoahngki telephone. Mwurin mwo, sounkalohko kak song wia telephone call ieu. Ih duwen sounkalohk tohto tepida wia kalohk doadoahngki telephone oh met re kin kalohk doadoahngki telephone minit kei rahn koaros oh re inenen perenki.

⁹ Mehn Sawas Pwehn Pweida Mwahu: Ni ahnsou me Sises kadarala sapwellime tohnpadahk kan pwehn kalohk, e kadarala irail “wad riemen.” (Luk 10:1) Dahme kahrehda? E wehwehki me ma riemen pahn ehupene nan doadoahk wet, re pahn kak sukuhliki sang sounkalohko me re iang oh pil re kak kangoange ih. E pil duwehte nan kalohk doadoahngki telephone. Ma ke kin iang emen, ke kak sukuhliki sang sounkalohko me ke iang, koasoiaipene duwen dahme wiawi, oh kihda iren sawas kan nanpwungamwa me kak sewese kumwa ahnsou me kumwa pahn koasoi ong aramas akan. Oh pil, ahnsou me ke koasoi ong emen, kowe oh sounkalohko me ke iang pahn kak sawaspene rapahki iren Paipel de mehn sawas me kin kohsang pwuhk en Society pwehn kak sewese aramaso me ke koasoiong.

¹⁰ Pwehn sewese iuk en kak medemedewe mwahu, mwohndi wasakis me ke kak kihdi noumw pwuhk kan koaros mwohmw ahnsou me ke doadoahngki telephone​—⁠noumw Paipel, pwuhken Reasoning, brochure Kupwurki, makisihn kan oh pwuhk teikan. Ntingihdi ekei padahk kan oh kihdi wasa ke kak kilang mwahu padahk pwukat. Kaunopada mwahu pwe ken kak ntingihdi oh kolokol noumw rekord mwahu duwen aramaso, iangahki rahno oh kuloak depe ke tuhwong ih pwe ken kak pwurehng call oh diar aramaso.

¹¹ Aramas akan kin kak perki telephone call sang emen me re sehse. Eri, ken kadek oh lokaia mwahu ahnsou me ke koasoiong tohnihmwo. Tohnihmwo ihte kak ese kowe sang ngilomw oh dahme ke kin koasoia . . . ma tohnihmwo pehm me ahmw lokaia kin kohsang ahmw mohngiong. Eri, ken esingek mwahu oh koasoi sang ahmw mohngiong. Koasoi wawai oh sansal oh ngilomw en dehr nok laud oh dehr nok tikitik. Mweidong tohnihmw en koasoi. Ken ndaiong tohnihmwo edomw pwon oh pil ndaiong ih me ke kin mihmi nan wasaohte me e kin mihmi. Kitail sohte mwahuki aramas akan en lemeleme me kitail men netikihla mehkot ong irail. E sohte pahn mwahu en nda me ke kin telephonela rehn koaros me mihmi wasao me e kin mihmi, ahpw, ken kasalehda me ke nsenohki pein tohnihmwo sang ahmw lokaia oh dahme ke kin koasoia.

¹² Padahk kan me Ke Kak Doadoahngki Ahnsou Me Ke Kalohk Doadoahngki Telephone: Pali laud en tepin padahk kan me mihmi nan pwuhken Reasoning (pali 9-15) kitail kak doadoahngki ahnsou me kitail kalohk doadoahngki telephone. Ke kak nda: “I doadoahngki telephone pwehn call komwi pwehki I sohte kak kohwei rehmw ni imwomw. Kahrepe I call komwi pwe I men idek rehmw duwen dahme ke lemeleme duwen peidek wet.” Mwurin mwo, ke pahn idek reh peideko.

¹³ Nan pwuhken Reasoning, keieun tepin padahk me mihmi pahnangin sawaspen oaralap me koasoia: “Crime/Safety” oh ke kak nda: “Kaselehlie Maing. Edei _____. I kin mihmi nan Kolonia. I men pil ndaiong uhk me I sohte callki pwehki I men netikihong uhk mehkot de I pahn wia survey de soahng pwukat. I men call komwi pwehki I nsenohki ahmw mour. Rahn pwukat, diren aramas kin mwersuwedih meteikan oh pwehki soahng pwukat, emen emen kitail kakete lelohng kahpwal. Ke lemeleme ehu rahn pahn kohdo me aramas koaros kak alu nanial oh sohte anahne perki mehkot? [Mweidohng tohnihmw en sapeng.] Menlau mweidohng ie en wadek duwen dahme Koht inoukihda me e pahn wia.”

¹⁴ Ke kakete pil idek rehn tohnihmwo ma e men onop Paipel (direct approach) oh sounkalohk tohto me wia met diarada me e kin pweida mwahu. Ke kak kamwomwada onop wet erein minit kei. Ke kak idek rehn tohnihmwo ma ke kak kohla reh ni imweo, ahpw ma e kin pweiek, idek reh ma ke kak pwurehng call ehu rahn oh pousehla dahme kumwa koasoia.

¹⁵ Ni ahnsou me ke pahn kaimwisekla ahmw koasoiong tohnihmwo, ke pahn songen medemedewe dahme ke kak nda pwehn kak kahrehong tohnihmwo en pwungki ken kohla reh ni imweo de ke kak kadaralahng ih makisihn de brochure de tract. Ma tohnihmwo kin pweiek en ndaiong uhk iawasa e kin mihmi ie, ke kak idek reh ma ke kak pwurehng call. Mwein ke pahn telephonela reh pak tohto mwohn e pahn luhkeiuk en kohla reh ni imweo.

¹⁶ Nantihong Kalohk Doadoahngki Telephone: Emen sister me mahki sounpahr 15 tepida kalohk ehu rahn ni e kalohk doadoahngki telephone. E telephonela rehn emen lih me nda me e men ale pwuhken Knowledge. Ahnsou me sistero kohla rehn liho ni imweo, liho men ese iaduwen sistero ese nah nempehn telephone pwe e sohte ntingdi nan pwuhken telephone. Sistero kawehwehong liho me e sapwungala​—⁠e uhdahn pahn call pil ehu nempe ahpw e sapwungala oh padik nein liho nempe! Liho kasalehda me e men onop Paipel rehn sistero oh met liho wiahla sounkalohk men me saikinte papidaisla.

¹⁷ Emen sister ale map en wasahn kalohk me kileledi ong kalohk doadoahngki telephone, ahpw e sohte wia wihk siluh pwe e nda me e masak. Dahme kihong ih eimah pwe e kak tepida wia kalohk doadoahngki telephone? E tamanda me e wadek ehu artikel nan Awake! en January 22, 1997, me oaralap koasoia “When I Am Weak, Then I Am Powerful” (“Ni Ei Kin Luwet, Iei Ahnsou Me I Kin Kehlail”). Artikel wet koasoia duwen emen Sounkadehde me kin kalohk doadoahngki telephone mendahki e kin kouwahki soumwahu me inenen laud. Sistero eri koasoia: “I kin kapakap ong Siohwa oh peki reh ma e kak kihong ie kehl. I peki rehn Siohwa ma e kak kihong ie en ese dahme I pahn koasoia ni ei pahn wia ahi padahk ni ahi kalohk doadoahngki telephone.” Ia imwilahn keieun rahn me e kalohk doadoahngki telephone? E koasoia: “Siohwa sapengla ahi kapakap. Aramas me I call rong ie, oh I koasoanehdi rehrail iahd I pahn pwurehng tuhwong irail.” Mwurin mwo, e kin kalohk doadoahngki telephone oh e tepida onop Paipel rehn emen me e koasoiong. E kaimwisekla eh koasoi oh nda: “E kin sansal me I anahne likih Siohwa oh kaidehn pein ngehi.”​—Lepin Padahk 3:5.

¹⁸ Kalohki padahk mehlel ni atail doadoahngki telephone kin wia ehu ahl en kalohki Rongamwahu me inenen pweida mwahu. Kaunopada mwahu, oh wia uwen me ke kak en kalohk ong aramas koaros. Ken dehr nsensuwed ma aramas akan sohte men rong uhk ni tepin ahnsou kan me ke kin telephonela rehn aramas akan. Kapakapki sawas sang rehn Siohwa, oh koasoiong sounkalohk teikan me kin pweida mwahu ni arail kalohk doadoahngki telephone. Pwehki kitail sohte mwahuki emen en katiasang arail rong duwen Rongamwahu en Wehin Koht, kitail en wia uwen me kitail kak en kalohk ong aramas koaruhsie oh tamataman me doadoahk en kalohk kin anahne en wiawi ni karuwaru.​—Rom 10:13, 14.