Koakon En Peidek

◼ Ni ahnsou me kitail kalohk ni atail doadoahngki telephone, kitail anahne koasoia duwen koasoandi en sawas?

Ni ahnsou me kitail kin kalohk ong aramas emen, kitail kak kawehwe ong irail me Sounkadehdehn Siohwa kan kin wia doadoahk en kalohk wasa koaros nan sampah oh aramas akan kin sewese doadoahk wet ni arail kin kihda arail sawas en mwohni sang pein nsenarail oh kitail kin perenki ale sawas sang aramas akan ma irail men kihda arail kisin sawas. Ahpw, ni ahnsou me kitail kalohk ni atail doadoahngki telephone, e sohte pahn mwahu en koasoia duwen koasoandi en sawas pwehki aramas akan pahn lemeleme me kitail men netiki mehkot ong irail. Sounkadehdehn Siohwa kan kin wia doadoahk en kalohk oh doadoahk wet sohte pahn pid netiki pwuhk de mehkot tohrohr.​—2 Korint 2:​17.

◼ Ni ahnsou me kitail doadoahngki telephone, dahme kitail pahn wia ma aramas emen pahn ndaiong kitail me e sohte men Sounkadehdehn Siohwa kan en pwurehng call ih?

Kitail anahne kapwaiada nsenen aramaso. Kitail kak ntingihdi rahno me aramaso nda met iangahki edeo oh e pahn mwahu en nekidala mwahu doaropweo pwehki kitail sohte pahn pwurehng call nempehn aramaso. Pak ehu nan pahr ehu, elder kan pahn pwurehng kousapahlih eden aramas akan me peki me Sounkadehdehn Siohwa kan en dehr pwurehng call irail. Sounapwalih en Kalohk pahn pilada ekei sounkalohk koahiek kan en pwurehng call aramas pwukat oh tehk duwen arail pepehm kan ahnsou wet oh tehk ma ahnsou wet arail pepehm kan duhduhwehte oh irail sohte men Sounkadehdehn Siohwa kan en pwurehng call irail.​—Kilang Atail Doadoahk Ong Wehio en June 1994, Koakon en Peidek.