Kitail Koaros Kak Sawaspene Pwehn Kahrehong Atail Mihding kan en Pweida Mwahu
Ekei kin lemeleme me ihte elder kan oh ministerial servant kan me pahn wiaiong mihding kan en pweida mwahu de soh. Ahpw, ni mehlel, kitail koaros kak wiaiong mihding kan en pweida mwahu oh katapan. Kitail kak sawaspene pwehn wiaiong mihding kan en pweida mwahu ni soangen ahl pwukat:
Kaunopada mwowe. Ni ahnsou me kitail pahn kaunopada mwahu, kitail pahn perenki rong audepen mihding kan. Ni ahnsou me kitail koaros pahn wia met, kitail koaros pahn perenki mihding kan oh pil ale kangoang laud sang mihding kan. Iang towehda mihding kan ahnsou koaros. Ni ahnsou me kitail kin kilang aramas tohto iang towehda mihding kan, met kin kangoange kitail laud oh met pahn pil wiaiong kitail en pil kesempwaliki mihding kan. En mwadang lel Kingdom Hall. Ma kitail mwohndier nan deuatail mwohn mihding tepida, kitail kak iang tepin koul oh pil kapakap oh mehpwukat pahn kahrehong kitail en paieki, ni unsek, prokram en mihdingo pwon. Wahda pwuhk koaros me ke anahne. Ni ahmw pahn wahda noumw Pwuhk Sarawi oh pwuhk teikan me ke anahne ong mihding, ke kak pahkpeseng pwuhk pwukat oh idawehn wasa kan me irail pahn koasoia oh met pahn sewese iuk en wehwehkihla mwahu dahme irail koasoia nan padahk kan. Koasoanehdi mwahu pwe ken dehr mweidong mehkot en kauwehla ahmw rong kanahieng. Kitail kak rong mwahu ma kitail pahn mwohndi mwowe. Ni ahnsou me aramas pahn koasoakoasoipene nan mihding oh kohla imwen kainen ahnsoun mihding—mehpwukat kin kak kauwehla atail rong kanahieng. Iang pasapeng. Ni ahnsou me kitail koaros kin nantihong kou peh oh iang pasapeng, kitail kin ale kangoang laud sang kasalepen pwoson pwukat. Wia atail padahk, kamwomwada, oh interview kan. Nin duwen tohnsukuhl en Theocratic Ministry Sukuhl de irail me pahn kisehn prokram en Service Mihding, kitail anahne kaunopada mwahu, praktis mwowe, oh wia uwen me kitail kak en dehr kauwehla atail padahk kan, kamwomwada kan de interview kan. Kapinga irail me kin wia padahk, kamwomwada oh interview kan. Padahkiong meteikan me ke inenen kalahnganki arail nannanti. Met kin kangoange irail oh kamwekid irail en pil wia uwen me irail kak ni ahnsou kohkohdo. Kangoange emen emen. Rahnmwahuwih oh koasoiong meteikan mwohn oh mwurin mihding kin pil kahrehong mihding kan en kaperen oh pil kin wia kamwahu tohto oh sewese kitail en perenki iang towehda mihding kan.