Mahsen en Koht Iei Me Mehlel
1. Soangen ire kesempwal dah kan me Paipel kin audaudki?
1 Sounmelkahkao ntingihdi: “Poahsoan en sapwellimomwi kosonned iei mehlel.” (Melkahka 119:160) Siohwa kin ketikihda pasapengpen peidek kan me keieu kesempwal nan atail mour sang sapwellime mahsen. E kin ketikihda mehn kamweit oh koapworopwor ong irail me lelohng kahpwal oh kapwunod akan. E pil kin ketin kasalehda iaduwen kitail kak karanih Ih. Emen lih me kin kalahnganki padahk mehlel koasoia: “Ahi sukuhliki padahk mehlel sang nan Pwuhk Sarawi duwehte ahi pedoi sang pere ieu me rotorot oh kansensuwed oh pedolong nan pere ieu me marain oh kansenamwahu.” Ke kin wia uwen me ke kak en ehukihong meteikan padahk mehlel sang Mahsen en Koht ahnsou koaros?
2. Iaduwen Paipel ah kin kamwahuwihala mour en aramas akan?
2 Paipel kin Kawekila Mour en Aramas oh Kamwekid Aramas Tohto: Padahk mehlel sang Pwuhk Sarawi kak lel mohngiong en aramas oh kawekidala mour en aramas akan. (Ipru 4:12) Emen lih pwulopwul adaneki Rosa tepida netiki paliwere, kin kamamsakau oh doadoahngki wini en kasahliel. E koasoia: “Rahn ehu me I inenen pahtou, pwopwoud en Sounkadehde koasoiong ie iaduwen Pwuhk Sarawi kak kamwahuwihala kahpwal akan. I tepida onop Mahsen en Koht oh I inenen perenki met. Erein sounpwong ehu, I diarada kehl me I anahne pwehn tepida mour kapw oh mwakelekel. Met, I diarada me mie kahrepen mour, oh I solahr anahne sakau de wini en kasahliel kan en “sewese ie.” Oh pwehki I men kompoakepahki Siohwa, I ese me I anahne kapwaiada sapwellime kosonned akan. Ma kaweid erpit sang Mahsen en Koht sohte sewese ie, I lemeleme I pein kemeielahr.”—Melkahka 119:92.
3. Dahme kahrehda kitail sohte pahn kin pweiek sang en kin ehukihong meteikan duwen rong en Paipel?
3 Pwuhk Sarawi sohte duwehte pwuhk teikan rahnwet, pwehki e kin mwahu ong aramas sang ‘wehi koaros, keinek koaros oh lokaia koaros.’ (Kaudiahl 7:9) Koht kupwurki “aramas koaros en ale komourparail oh marainkihla me mehlel.” (1 Tim. 2:4) Ihme kahrehda, kitail anahne kanahieng pwe kitail dehpa lemeleme me aramas emen sohte pahn rong pwehki soangen irair me e tikida loale. Ahpw, kalohk ong aramas koaruhsie, oh doadoahngki iren Pwuhk Sarawi ahnsou koaros ma ke kak.
4. Iaduwen kitail kak doadoahngki Paipel ni atail kin kalohk ong aramas akan?
4 Kasalehda Iren Pwuhk Sarawi kan: Mie ahnsou mwahu tohto me kitail kak doadoahngki Pwuhk Sarawi nan kalohk. Ni ahnsou me kitail kihla makisihn kan, kitail kak doadoahngki iren Paipel me mihmi nan padahk kan nan Atail Doadoahk Ong Wehio. Ni ahnsou me kitail kihla pwuhk de brochure de makisihn me kileledi ong kitail en kihla nan sounpwong ehu, ekei diarada me e pahn mwahu en wadek iren Paipel me irail pilada ni ahnsou me irail tepin padahk. Ni ahnsou me kitail pahn pwurehng pwurala rehn aramas akan, kitail kak doadoahngki iren Paipel ehu de tohto sang pwehn sewese tohnihmwo en kekeirada ni e sukuhliki loalokong pwung. Ni ahnsou me kitail kin onop Paipel rehn aramas akan, kitail en nantihong doadoahngki iren Paipel kan. Ni ahnsou me kitail sohte iang kalohk ihmw lel ihmw, kitail kak weuwaseli neitail Paipel pwehn kak doadoahngki ni ahnsou sohte lipilipil.—2 Tim. 2:15.
5. Dahme kahrehda kitail en wia uwen atail kak en doadoahngki Paipel nan kalohk?
5 Kitail en sewese meteikan en paiekihda manaman sang Mahsen en Koht me mehlel ni atail doadoahngki Paipel ni atail kalohk ong aramas akan ni ahnsou mwahu koaros.—1 Deselonika 2:13.