Ke Kin Utung Mahsen en Koht?
1 Nan sampah ieu me kin kalapw kasohwe dahme Paipel mahsanih, Kristian mehlel kan kin ngoangki uhki Mahsen en Koht. Pwehki kitail uhdahn kamehlelahr me “audepen Pwuhk Sarawi unsek pwilisang rehn Koht,” kitail kin pwungki Sises me kadehdedahr nan eh kapakap ong Siohwa, ni eh mahsanih: “Sapwellimomwi mahsen, iei me mehlel.” (2 Timoty 3:16; Sohn 17:17) Ia duwen kitail kak utung mwahu Mahsen en Koht?
2 Esehla Iren Paipel kan: E sansal me Sises kin nantiong esehla Mahsen en Koht. Met kahrehiong ih en kak padahk sang nan Pwuhk Sarawi erein eh doadoahk en kalohk. (Luk 4:16-21; 24:44-46) Ia duwen kitail kak kekeirada oh katohtohla iren Paipel kan me kitail ese pwehn kak sewese kitail? Kitail kin wia met sang ni atail pahn kin wadek Paipel ehuehu rahn oh kin doudouloale ire me keieu kangoange kitail de me keieu sewese kitail nan kalohk. Ni atail kin kaunopada ong mihding kan, kitail en kin kilangada nan Paipel oh wadek iren Paipel kan me kileldi oh ele kaunopada pasapeng kan sang nan ire pwukat. Ni atail kin towehda mihding, kitail pahn kin iang me wia padahko wadek iren Paipel kan. Atail kin esehla iren Paipel kan kin kaunopkitailda en kak ‘padahkihong aramas akan mahsen en Koht ni mehlel.’—2 Timoty 2:15.
3 Mweidohng Paipel en Padahk: Ni atail kalokalohk, kitail en mweidohng Paipel en padahk. Karasepe, ma irair kan mweidohng, kitail kak song en ehukihong tohnihmwo ehu iren Paipel. Ma tohnihmwo kihda peidek de koasoi me mwomwen uhwong, e pahn keieu mwahu ken doadoahngki Paipel en kihda pasapeng. Ni ahnsou me tohnihmwo kedirepw, kitail ele pahn pil kak kasansalehda iren madamadau ehu sang nan Paipel ni atail pahn koasoia, “Mwohn ei pahn kohkohla, mweidohng ie mahs I en kasalehwei iren Paipel wet.” Ahnsou koaros me konehng, kitail en wadek inensangte nan Paipel, mweidohng me rongorongo en iang kilang wasa me ke wadwadeko.
4 Ni ahnsou me iren Paipel kan me kasalehda me padahk en Trinity likamw kasalehiong ih, emen tohnihmw pwuriamweikihla koasoia, “I kin ieiang kohla sarawi erein ei mour, oh uhdahn I sehse me ih me Paipel mahsanihen met!” E mwadangete pwungki en iang koasoandi en onop Paipel. Sises mahsanih me sapwellime sihpw kan pahn rong ngileo. (Sohn 10:16, 27) Ahl keieu mwahu me mohngiong mehlel kin kak pohnesehkihla padahk mehlel iei ni arail pahn kilangasang pein nan Pwuhk Sarawi. Eri, ihme kitail en kin utung Mahsen en Koht me kin ketikihda padahk mehlel!