Iaduwen Kitail Kak Kaunopada en Kihla Makasihn Kan
1. Dahme kahrehda e pahn mwahu en kaunopada pein atail padahk en kihla makasihn kan sang en wadlikihla padahk ehu me kohda nan Atail Doadoahk Ong Wehio?
1 Ke pahn idek, ‘dahme kahrehda kitail anahne kaunopada en kihla makasihn kan, pwehki padahk en kihla makasihn kan kin kohda nan ehuehu Atail Doadoahk Ong Wehio?’ Mendahki me tohto kin diarada me padahk pwukat kin wia sawas laud, kitail anahne kaunopada pein atail padahk kan. Ehu padahk me kin pweida mwahu nan ehu wasahn kalohk sohte pahn pweida mwahu nan ehu wasahn kalohk tohrohr. Kahrehda, kitail sohte anahne lemeleme me kitail anahne doadoahngki lepin lokaia kan koaros me mih nan padahk kan me kin kohda pwehn kihla makasihn kan. Mendahki ma kitail pilada en doadoahngki ehu padahk me kohda, e pahn keieu mwahu en kasalehda mouren padahko ni pein atail lokaia kan.
2. Dahme kin pidada ni ahmw pahn pilada mehnia artikel ke pahn doadoahngki?
2 Pilada ehu Artikel: Mwurin ke wadek makasihn, pilada ehu artikel me pahn mwahu ong ahmw wasahn kalohk oh pil ke uhdahn perenkihda. Ahmw ngoang ni ahnsou me ke pahn koasoia duwen artikelo pahn kamwekid tohnihmw en pil men wadek artikelo. Mendahki ke pahn doadoahngki ehu artikel me pahn mwahu ong pali laud en aramas akan nan ahmw wasahn kalohk, e pahn mwahu en esehla artikel teikan nan makasihno. Met kak mweidong uhk en kawekila ahmw padahk ma ke tuhwong emen me kin perenki ehu oaralap tohrohr.
3. Soangen tepin koasoi dah kan ke pahn doadoahngki pwehn keieu pweida mwahu?
3 Idek ehu Peidek: Mwuri, kaunopada mwahu ahmw tepin koasoi kan. Ahmw tepin koasoi kan inenen kesempwal. E pahn mwahu en idek rehn tohnihmw ehu peidek me kak kamwekid ah madamadau duwen artikel me ke kaunopada en doadoahngki. Peidek kan me pahn kamwekid meteikan en kasalehda arail madamadau kin keieu pweida mwahu. Dehr idek mehkot me pahn kansensuwedih tohnihmw de kahrehong ih en men akamai.
4. Ia katepen en wadek ehu iren Paipel ong tohnihmw ma ah irair kak mweidong en wia met?
4 Wadek ehu Iren Paipel: Ni kaimwisekla, pilada ehu iren Paipel en wadek ma irair en tohnihmw kak mweidong, mwein ehu me mihmi nan artikel me ke pahn doadoahngki. En wadek ehu iren Paipel pahn sewese tohnihmw en kilang me atail padahk kohsang nan Mahsen en Koht. (1 Deselonika 2:13) Iren Paipelo pil pahn kihong ih padahk mwahu mendahki ma e sohte pahn ale makasihn kan. Ekei sounkalohk kan kin kamwekid ahn tohnihmw madamadau ni arail wadek ehu iren Paipel mwohn re idek ehu peidek. Mwohn ahmw pahn kasalehda iren Paipelo, ke kak nda, “I men ese ahmw madamadau duwen dahme iren Paipel wet mahsanih.” Mwuri ke pahn kasalehong tohnihmwo ehu wasa nan makasihn me pid duwen iren Paipelo, oh nda ni mwotomwot mehkot me kak kamwekid ih en men wadek makasihn mwohn ke kihla.
5. Soangen kaweid dah kan ke anahne tamanda ni ahnsou me ke pahn kaunopada padahk en kihla makasihn?
5 Sohte mie kosonned kan duwen dahme kitail pahn nda ni ahnsou me kitail kihla makasihn kan. Pali laud en ahnsou, e pahn keieu mwahu en koasoi ni mengei oh mwotomwot. Doadoahngki ehu padahk me mengei ong uhk oh pahn pweida mwahu. Medemedewehte duwen kamwahupen makasihn kan, oh kasalehda ngoang. Ma ke kaunopada mwahu, ke pahn kak pweida mwahu en kihla Watchtower oh Awake! ohng aramas kan “me pilipildahngehr mour soutuk.”—Wiewia 13:48.