Kihla Makasihn me Kin Kadehdehda Duwen me Mehlelo
1. Kahn Iroir oh Awake! kin kadoadoahk ni soangen ahl dah kan?
1 Kahn Iroir Pakpakairki Wehin Siohwa oh pelie makasihno Awake! kin wia pwuhk me kitail kin keieu doadoahngki laud nan atail doadoahk en katohnpadahk. (Mad. 24:14; 28:19, 20) Kitail kin inenen perenkihda ni atail kin iang kaukaule kihla makasihn riau pwukat me kin wiawihda ni ahnsou koaros ni atail kin kalohk ahnsou sohte lipilipil kan.
2. Soangen wekidekla dah kei me wiawiong Kahn Iroir oh Awake!, oh pwekida?
2 Erein pahr akan me kitail mih loale kohkohdo, kitail kin kilang duwen wekila oh tohtohlahn audepen neitail makasihn pwukat oh pil duwen wekilahn ahl akan me kitail kin doadoahngki pwehn kihla neitail makasihn pwukat. Wekidekla kei pil wiawi pwe makasihn pwukat en kak wiawihda ni ahl me aramas soh lipilipil kan pahn kak perenki oh mwekidki ni ahnsou me mahsen en Wehio kin lel nan mohngiongirail pwe ‘aramas koaros en ale komourparail oh marainkihla me mehlel.’—1 Tim. 2:4.
3. Iaduwen makasihn kan kin kadoadoahk nan wasahn kalohk?
3 Sangehr January 2006 kohdo, kitail inenen koahieklahr en doadoahngki soangsoangen ahl akan en kihla neitail Awake! me kin wiawihda pak ehu nan sounpwong ehu. Met kitail anahne en pil doadoahngki soangsoangen ahl akan en kihla soangen The Watchtower Announcing Jehovah’s Kingdom en lokaiahn wai ehute me kin wiawihda nan ehuehu sounpwong ni ahnsoun kalohk. Elen padahk kan me kitail kak doadoahngki pwehn kihla ehuehu makasihn akan kin pwarada ni mwurin neitail Atail Doadoahk Ong Wehio. Elen padahk pwukat kin kalapw pidada tepin artikel kan en makasihno, ahpw ekei pak e kin dokedoke artikel teikan me mih loale me aramas tohto kin perenki. Elen padahk kan me kin kileldi kin inenen pweida mwahu ma kitail kin wehwehkihier duwen audepen artikel me padahko kin dokedoke oh ma kitail pahn kin doadoahngki pein atail lokaia pwe atail padahk en pahrekiong irair en atail wasahn kalohk.
4. Dahme kahrehda ekei pak e pahn konehng ma kitail doadoahngki ekei elen padahk kan likin elen padahk kan me kin pwarada nan neitail Atail Doadoahk Ong Wehio?
4 Mendahki neitail Atail Doadoahk Ong Wehio kin kihda soangen padahk kan me kitail kak doadoahngki pwehn kihla ehuehu makasihn kan, kitail kak doadoahngki ehu padahk tohrohr. Ehu kahrepen kitail kak wia met iei ma mie ehu artikel tohrohr kin kamwakid irail akan me mih nan ahmw wasahn kalohk. De ele ke pehm me e pahn keieu mwahu ma ke doadoahngki ehu artikel tohrohr me ke perenki nan ahmw padahk.
5. Mwohn ahmw pahn kihla makasihn ehu me koasoandi kitail en kihla, dahme ke anahne wia?
5 Iaduwen Ahmw Pahn Kaunopada Ahmw Padahk: Keieu, ke anahne uhdahn wehwehki mwahu artikel me ke pilada ken doadoahngki nan ahmw padahk. Ele ke sohte pahn kak ahnsou koaros esehla audepen artikel kan koaros me mih nan makasihn ehu mwohn ahmw pahn tepida doadoahngki nan ahnsoun kalohk. Ahpw ke anahne kasalehda ahmw perenki audepen artikel me ke pilada ken doadoahngki. Ihte me pahn kahrehda ken kak wia met iei ma ke uhdahn wehwehkihla mwahu ire me ke pahn padahngki.
6. Iaduwen kitail kak pein kaunopada atail padahk?
6 Keriau, ke anahne materek ni ahmw pahn kin wia tepin koasoi kan. Ke kak tepikihda ahmw koasoi ni ahmw pahn doadoahngki peidek me pahn pidada artikel me ke pahn doadoahngki. Ke anahne ahnsou koaros kin likih me kehl en sapwellimen Koht Mahsen pahn kin lel nan mohngiong en aramas. (Ipru 4:12) Pilada ehu iren Paipel me dokedoke ire me ke pahn koasoia, e pahn mwahu ma ke doadoahngki ehu iren Paipel me kileledi nan artikel me ke pahn padahngki. Medewe iaduwen ke pahn kak kawehwehda iren Paipelo ni ahl me dokedoke artikelo.
7. Iaduwen atail pahn kak pil kamwahwihala atail padahk kan?
7 Ni Ahnsou Koaros me Kak: Pwe padahk ehu en kak lipwalipw, ke anahne en kin doadoahngki padahko. Iang tohnmwomwohdiso ni ahnsou en kihla makasihn me kin wiawi ni Rahn Kaunop. Pwilikihdi makasihn kan rehn aramas akan me alehier neitail pwuhk kan mahs. Ahnsou koaros kihla makasihn kan rehn aramas akan me kin onop Paipel rehmw oh pil rehn aramas akan me kin mih ni imwarail ni ahnsou me ke kin pwurala rehrail. Ke kak pil kihla makasihn kan rehn aramas akan me ke kin koasoiong ni ahnsou me ke kin kohla net ni sidohwa, ni ahnsou me ke kin seiloak, de pil ahnsou kan me ke kin kohla ni imwen wini. Kamwahwihala ahmw padahk kan ni ahnsou me ke pahn kin doadoahngki padahk pwukat nan sounpwongo pwon.
8. Ni ahl dah kan me Kahn Iroir oh Awake! wekihsang makasihn teikan?
8 Kahn Iroir oh Awake! kin wia makasihn tohrohr kei. Makasihn riau pwukat kin kawauwih Siohwa nin duwen Kaun en lahng oh sampah. (Wiewia 4:24) Irail kin kamwaitihki aramas akan duwen rongamwahu en Wehin Koht oh kangoange irail en kin pwoson Sises Krais. (Mad. 24:14; Wiewia 10:43) Pil patehng met, irail kin mwasamwasahn duwen irair en sampah kan me kin pahrekiong kokohp akan en Paipel. (Mad. 25:13) Sewese aramas akan me mih nan ahmw wasahn kalohk en kak paiekihda makasihn pwukat ni ahmw pahn kihla makasihn pwukat ni ahnsou kan koaros me konehng!
9. Dahme kitail kak wia pwehn kak elehieng kitail en kak pwurala rehn irail akan me kitail koasoiehng?
9 Ni ahnsou me ke kin pweida ni ahmw kin kihla makasihn ehu de pil wie koasoakoasoi ong emen duwen mehkan me pid Paipel, kaunopada ehu peidek de padahk me ke kak doadoahngki me pahn kak elehda ken kak pwurala rehn tohnihmwo oh koasoia pil ehu ire me pid Paipel. Ma kitail pahn kin pwerisekiong padokedi weren padahk mehlel, kitail pahn kak koapworopworki me Siohwa pahn ketin kamwakid mohngiong en irail kan me mehleliong oh inengieng esehla oh papah Ih.—1 Kor. 3:6.