Iaduwen Ahmw Pahn Doadoahngki Padahk kan
1. Iaduwen kitail kak kilangwong padahk kan me kileledi nan Atail Doadoahk Ong Wehio?
1 Padahk kan en kihla makisihn kan, brochure kan oh pwuhk kan kin kalap pwarada nan Atail Doadoahk Ong Wehio. Ahpw, ni ahnsou me kitail pahn iang kalohk, kitail sohte anahne wadek de wadilikih dahme ntingihdi. Padahk pwukat wiawihda pwehn sewese kitail en medemedewe dahme kitail kak nda. Atail kalohk ong aramas pahn pweida mwahu ma kitail pahn doadoahngki pein atail lokaia. Ma kitail pahn doadoahngki pein atail lokaia ahnsou me kitail padahk, tohnihmw pahn meleilei oh kilang me kitail uhdahn kamehlele dahme kitail koasoia.—2 Kor. 2:17; 1 Dese. 1:5.
2. Dahme kahrehda kitail anahne medemedewe mour en aramas nan pein ahmw wasa iangahki arail tiahk ni ahnsou me ke pahn kaunopada ahmw padahk?
2 Koasoanehdi Ahmw Padahk: Kitail anahne medemedewe duwen mour en aramas nan pein ahmw wasa iangahki arail tiahk ni ahnsou me ke pahn koasoanehdi ahmw padahk. Tohnihmw pahn mweidohng uhk en rahnmwahu oh ekei koasoi mwohn ke pahn tepida padahk, de e mwahuki ken kasalehda mwadang dahme ke wiewia oh kahrepe ke men tuhwong ih? Ahpw, mehlel, ehuehu wasa kin wekpeseng, oh pil emenemen nan ahmw wasahn kalohk pil wekpeseng. Kitail pil anahne doadoahngki atail loalokong ni ahnsou me kitail wia peidek ong tohnihmw. Peidek kan me mwahu ong aramas nan ehu wasa sohte kin mwahu ong aramas nan pil ehu wasa. Kahrehda, kitail anahne doadoahngki atail loalokong oh koasoanehdi atail padahk kan en mwahu ong aramas nan pein ahmw wasa.
3. Dahme kahrehda ke anahne medemedewe duwen mour en aramas me ke koasoiong oh pil medemedewe duwen arail madamadau?
3 Oh pil, kitail anahne medemedewe duwen mour en aramas nan pein ahmw wasa oh pil arail madamadau ni ahnsou me ke kaunopada ong kalohk. Karasepe, ahmw kawehwe Madiu 6:9, 10 ong emen Kadolik pahn weksang ahmw kawehwe Madiu 6:9, 10 ong emen me sohte wehwehki “Kapakap en Samat.” Ma kitail pahn medemedewe mwahu mwohn kitail koasoi, kitail kak koasoanehdi atail padahk pwehn kamwekid aramas akan nan atail wasahn kalohk en perenki rong.—1 Kor. 9:20-23.
4. Dahme kahrehda e kesempwal ken kaunopada mwahu?
4 Mehnda ma kitail pahn koasoanehdi en doadoahngki padahk ehu me ntingihdi, sohte mehkot kak wiliandi kaunopada mwahu. Ke anahne wadek artikel de irelaud me ke pahn koasoia oh pilada ire kan me ke kak doadoahngki me kak kamwekid aramas. Eri, kapataiong soahng pwukat nan ahmw padahk. Ma kitail wehwehki audepen neitail pwuhk, brochure oh makisihn kan, kitail kak ngoangki kihla.
5. Dahme kahrehda kitail kak kaunopada en wia pil ehu padahk de doadoahngki pil ehu iren Paipel, oh iaduwen kitail kak wia met?
5 Padahk Teikan: Ke anahne doadoahngki ihte padahk kan me kileledi nan Atail Doadoahk Ong Wehio? Soh. Ma ke diar me pil ehu padahk de pil ehu iren Paipel me pweida mwahu sang padahk kan de iren Paipel me kileledi, ke kak doadoahngki. Ni ahnsou me ke kaunopada ahmw padahk ong makisihn kan, rapahki ire kan sang nan artikel kan me ke kak koasoia me aramas pahn perenki rong. Ni ahnsou me kamwomwada kan pahn wiawi nan Service Mihding, brother kan kak kasalehda duwen padahk kan me kin pweida mwahu nan ahmw wasahn kalohk. Ni ahl wet, sounkalohk koaros kak ale sawas en pweida mwahu ni arail kalohki Rongamwahu en Wehio.