Ke Kin Wia Ahmw Doadoahk en Kalohk ni Keneinei?
1 Audepen pwuhken Wiewia kin padahkiong kitail me sapwellimen Sises tohnpadahk kan kin kapwaiada ahr doadoahk en “kalohk ni keneinei.” (Wiewia 2:40; 8:25; 28:23) Ih mehn akadei me Wahnpoaron Pohl sapwellimaniki. (Wiewia 20:24) Kaidehn met pil ahmw mehn akadei nin duwen sounkalohk men me kin kalohki Rongamwahu? Iaduwen ke kak wia met?
2 Kaunopada Ahmw Padahk: E kesempwal en kaunopada ahmw padahk kan ma ke men ahmw doadoahk en kalohk en pweida mwahu. Keieu, ni ahnsou kitail kin kihla makisihn kan, pwe oaralap en makisihn kan kin wekila. Pwehn sewese kitail en koahiekla ni atail kin doadoahngki makisihn kan, Atail Doadoahk Ong Wehio nan sounpwong wet kin tepida wiahda sawas kapw ehu—padahk kan ong kihla Watchtower oh Awake! makisihn kapw kan me ntingdi ni pali meing en pali wet. Ong ehu ehu makisihn, se ntingihdi duwen oaralap kan me pahn kahrehong aramas tohto en perenki rong. Iaduwen ke kak wiahda padahk mwotomwot pwukat?
3 Ke kak pilada ehu padahk me ke lemeleme me pahn keieu pweida mwahu nan ahmw wasahn kalohk. Mwurin mwo, ke kak wadek artikelo ni keneinei oh tehk duwen ekei ire kesempwal kan me pahn kahrehong tohnihmwo en perenki rong. Ke kak rapahki iren Paipel ehu nan makisihno me pahn pahrekiong padahko pwe ke kak wadek met ong tohnihmwo. E pahn mwahu ma ke pahn wiahda imwin koasoi mwotomwot ehu pwehn kangoange tohnihmwo en wadek makisihno oh ma konehng koasoiong tohnihmwo ma e men kihda eh sawas ong doadoahk en Sounkadehdehn Siohwa kan me kin wiawi nin sampah pwon. Mwurin ahmw kaunopada mehpwukat, ke kak praktis ahmw padahk.
4 Pilahn en Doadoahngki Paipel: Ma ke kaunopada mwahu, ke pahn pilada ehu iren Paipel en mihmi nan ahmw padahk. Karasepe ieu, sounkalohk koahiek kan nan wasa tohto kin pweida mwahu ni ahnsou re kin kolokolete neirail Paipel, rahnamwahuwih tohnihmwo oh nda met:
◼ “Se kin peidek ki rehn aramas akan ma irail kin kamehlele met . . . ” Wadek Senesis 1:1, oh wia peidek wet: “Ke kin pwungki mahsen wet?” Ma tohnihmwo pwungki, ke kak nda met: “Duwehte ngehi, I pil kin pwungki. Ahpw, ma ke kamehlele me Koht kapikada mehkoaros, E pil kin pwukoahki suwed kan me kin wiwiawi ahnsou wet?” Mwurin tohnihmwo pahn sapeng peidek wet, ke kak wadek Eklesiasdes 7:29. Pahkpeseng brochure en Kompoakepahnki Koht ni pali 13, oh wadek parakrap 2. Kangoange tohnihmwo en wadek brochure. Ma tohnihmwo sohte pwungki mahsen en Senesis 1:1, eri, kangoange ih en tehk mwahu poadopoad ehu lel silu nan pwuhken Nei Pwuhken Poadoapoad kan en Paipel.
5 Pwurala Rehn Aramas Akan Koaros Me Kasalehda Re Kin Perenki Rong: Ke sohte kak kapwaiada ahmw doadoahk en kalohk ni keneinei ma ke sohte pahn pwurala rehn aramas akan me kin perenki rong. Ni ahnsou ke tuhwong emen me kin perenki rong, mendahki e ale makisihn de pwuhk teikan de e sohte ale, ntingihdi eden tohnihmwo oh adres. Nantihong kainengiong tohnihmwo en men rong ni ahmw pahn mwadang pwurala reh. Ke uhdahn pahn idek reh ma e men onop Paipel.
6 Tohnpadahk kan nan keieun senturi kin wehwehki me Sises kehkehlikiong irail en wia arail doadoahk en “kalohk ni keneinei.” (Wiewia 10:42) Kehkehlik wet pil kin kadoadoahkong kitail, pwe ahlohte me kitail pahn kak katohnpadahk. (Madiu 28:19, 20) Kitail en wia uwen me kitail kak en kapwaiada atail doadoahk en kalohk ni keneinei.—2 Tim. 4:5.