Koasoandi En Service Mihding

MENLAU TEHK: Nan sounpwong en October, kitail pahn kousapahlih ire kesempwal kan sang Kapokon en District me oaralap koasoia “Sounpadahk en Mahsen en Koht” nan ehu wihk en Service Mihding. Pwehn kaunopada ong mihding wet, kitail kak ntingihdi ire kesempwal kan me kitail sukuhliki nan Kapokon en District. E pahn wia kangoange laud ong kitail koaros ma kitail pahn rong emen emen kihda dahme pein irail sukuhliki me kin wia kaweid mwahu ong kitail koaros.

Wihk me Tepida September 10

Koul 39

10 min: Pakair kan en sahpwet oh ekei pakair kan sang Atail Doadoahk Ong Wehio. Pil koasoia dahme ntingdi powe me pid dahme pahn wiawi nan Service Mihding ehu nan October, ahnsou me kitail pahn kousapahlih ire kesempwal kan sang Kapokon en District.

13 min: Anahn en sahpwet.

22 min: “Ke Kin Wia Ahmw Doadoahk en Kalohk ni Keneinei?”a Mwurin ke koasoia parakrap 1-3 rehn sounrongorong kan, ke kak koasoanehdi padahk mwotomwot riau me pid kihla makisihn​​—⁠ehu padahk, emen sounkalohk pahn doadoahngki Watchtower en September 15 oh ehu padahk, emen sounkalohk pahn doadoahngki Awake! en September 22. Mwurin ke koasoia parakrap 4, ke kak koasoanehdi emen sounkalohk en doadoahngki pwuhken Knowledge ong padahko.

Koul 53 oh kapakap.

Wihk me Tepida September 17

Koul 42

15 min: Pakair en sahpwet. Ripoht en mwohni. “E Mihmi Nan Index.” Kasalehda iaduwen ke pahn rapahki padahk kan pwehn kihla Nei Pwuhk en Poadoapoad Kan en Paipel.

15 min: Ia Iren Atail Kalohk Nan Pahr me Ahpwtehn Nek? Sounapwalih en Kalohk pahn wia padahk wet. E pahn koasoia soahng mwahu kan me kohsang ripoht en pahr en kalohk en 2001. Kapinga koaros duwen soahng kan me wiawi nan kalohk me pweida mwahu. Koasoia duwen ia uwen mwahu tohnmwomwohdiso kin wia ni arail kaukaule iang towehda mihding kan, kaukaule iang kalohk, oh onop Paipel rehn aramas akan oh mwurin mwo koasoia duwen soahng kan me sounkalohk kan anahne nantihong kamwahuwihala. Kasalehda duwen mehn akadei kan ong pahr kohkohdo.

15 min: Koakon en Peidek. Padahk ehu. Kousapahlih mihding en kalohk kan en ehu ehu rahn ong ahmw mwomwohdiso. Kawehwehda iaduwen sounkalohk koaros me kin iang towehda mihding pwukat kak ale kamwahupen mihding pwukat. Kangoange tohnmwomwohdiso koaros en utungada koasoandi pwukat.

Koul 52 oh kapakap.

Wihk me Tepida September 24

Koul 47

15 min: Pakair kan en sahpwet. Koasoanehdi kamwomwada kan me sounkalohk kan kin doadoahngki padahk kan sang artikel me koasoia “Dahme Kitail Kak Koasoia Duwen Makisihn kan”​—⁠ehu padahk, emen sounkalohk pahn doadoahngki Watchtower en October 1 oh pil ehu padahk, emen sounkalohk pahn doadoahngki Awake! en October 8.

30 min: Poakohng Koht​​—⁠Kaidehn Dipwisou me Mihmi nin Sampah. (1 Sohn 2:​15-​17) Emen elder pahn wia padahk wet oh pahn kousapahlih prokram en Kapokon en Circuit me wiawi nan pahr me ahpwtehn nek. Luhke sounkalohk kan en koasoia ire kesempwal kan me re sukuhliki oh iaduwen re pahn doadoahngki ire kan nan pein arail mour oh nan arail peneinei. (Eldero kak koasoanehdi mwowe ihs me pahn koasoia ire pwukat.) Koasoia duwen padahk pwukat: (1) “Limpoak ong Koht kin Kamwekid Kitail Nan Atail Doadoahk en Kalohk.” Limpoak wet kin sewese kitail en powehdi atail pepehm kan me kin kansensuwed me kin kak kauwehla atail wia uwen me kitail kak nan kalohk​—⁠pepehm en namenek, pepehm me kitail sohte itar, oh pepehm en masak aramas. (2) “Aramas akan me kin Poakohng Siohwa kin Tateki Dahme Suwed.” (w99 10/1 28-​31) Ma kitail men Koht en kupwurki kitail, kitail anahne tateki dahme Koht kin kalahdeki​—⁠kaidehn ihte soahng pwukat me sansal me e suwed ahpw pil soahng kan me sohte nohn sansal me e suwed. (3) “Nantihong Kapwaiada Elen Limpoak me Siksang Mehkoaros.” (w92 7/15 27-​30) Iren Paipel pwukat: 1 Korint 13:​4-8 kin kasalehda dahme kahrehda kitail anahne kanengamahiong meteikan, liksang roporop ong pein kitail oh siai rehn aramas, en dehr lipaned, oh kitail en ahnsou koaros lelepek ong sapwellimen Koht pwihn sansal. (4) “Dipwisou me Mihmi nin Sampah​​—⁠Iaduwen Kitail Kin Kilangwohng Soahng Pwukat?” Kitail en dehr poakohng dipwisou me kin mihmi nin sampah, lohdi pahn dipen ineng en uduk, oh mehkan me aramas kin kilang oh ahnehda, oh mehkoaros me mi nin sampah me aramas kin pohnmwahsohkihda. (5) “Katohrohr Sang Sampah kin Perehla Kitail.” Iren Paipel pwukat: 2 Korint 6:​14-​17 kin kasalehda iaduwen ekei padahk kan oh tiahk kan kak kahrehong kitail en sohte kenikenla rehn Koht. Kitail anahne wehwehki dahme Tepil kin wia pwehn kasonge kitail. (6) “Sapwellimen Koht Inou kan ong irail akan me kin Poakohng Koht.” (w86 6/15 5-6) Ma kitail pahn ale sapwellimen Siohwa kapai kan, kitail pahn kak ahneki peren oh kekeirada ni pali ngehn.​​—⁠1 Tim. 6:​17-​19.

Koul 55 oh kapakap.

Wihk me Tepida October 1

Koul 45

10 min: Pakair kan en sahpwet. Katamankin sounkalohk kan en kapedolong neirail ripoht en kalohk en September.

15 min: Iaduwen I Kak Kamwahuwihala Dahme I Kin Wia Nan Sukuhl? Emen elder oh ah pwoud de emen ministerial servant oh ah pwoud koasoi ong neira seri. Re kin ahneki pwunod pwehki serio sohte kin wia mwahu nan sukuhl. Re kousapahlih kaweid nan pwuhken Young People Ask, irelaud 18, oh koasoia dahme serio anahne wia pwehn kamwahuwihala dahme e kin wia nan sukuhl. Pahpa/nohno kasalehda me e pahn mwahu en ale kasukuhl mwahu pwe met pahn sewese emen en kekeirada ni eh papah Siohwa.

20 min: “E Kin Wia Mehkot Me Kin Kerempwa Ahmw Wia Uwen Me Ke Kak Nan Doadoahk en Kalohk?”b Kasalehda kesempwalpen toupahrek nan doadoahk en mwohni, oh koasoanehdi soahng kan pwe soahng kan me pid Wehin Koht en keieu nan atail mour. Luhke ekei tapwin peneinei kan nan mwomwohdiso en kasalehda dahme re kin wia pwehn apwalih arail peneinei kan ni paliwar oh pil ni pali ngehn oh iaduwen arail pali ngehn oh iaduwen arail soahng ngehnin kan kin keieu kesempwal nan arail mour.

Koul 25 oh kapakap.

[Nting tikitik me mi pahs]