“Mahsen en Koht Wie . . . Manaman”

“Mahsen en Koht wie momour oh manaman.”—IPRU 4:12.

1. Dahme kahrehda kitail kak uhdahn kamehlele me Mahsen en Koht manaman? (Menlau kilang tepin kilel.)

NIN duwen sapwellimen Siohwa aramas akan, kitail uhdahn kamehlele me Mahsen en Koht ong aramas akan kin “wie momour oh manaman.” (Ipru 4:12) Tohto rehtail wia mehn kadehde me Paipel ahneki manaman en wekidala mour en aramas. Ekei riatail Kristian kan kin doadoahngki wini en kasahliel, wia mouren tiahk samin, oh pil wia lipirap kei mahso. Ekei paiamwahuki arail pweida nan koasoandi en sampah wet, ahpw re pehm me miehte mehkot me sohte mi nan arail mour. (Ekl. 2:3-11) Pak tohto, aramas akan me mwomwen solahr arail koapworopwor kin diar sawas sang Paipel me ahneki manaman en wekidala arail mour. Ele ke kin wadek oh uhdahn perenkihda koasoipen irail pwukat nan oaralapo “Paipel Kin Wekidala Mouren Aramas” nan neitail Kahn Iroir. Oh ke pil kilangehr me mendahki mwurin arail esehlahr padahk mehlel, Kristian kan kin pousehlahte kakairada arail nanpwungmwahu rehn Siohwa pwehki sawas sang Paipel.

2. Ia duwen Mahsen en Koht eh kin manaman ni mwehin wahnpoaron ko?

² Ia duwe, kitail anahne pwuriamweikihla me me tohto rahnpwukat kin wiahda wekidekla laud kan pwehki arail onopki Mahsen en Koht? Uhdahn soh! Koasoipen arail mour kin katamandohng kitail riatail Kristian kan ni mwehin wahnpoaron ko, me ahneki koapworopwor en kohdahla nanleng. (Wadek 1 Korint 6:9-11.) Mwurin wahnpoaron Pohl eh ntingihedi soangen aramas akan me sohte pahn iang sohsohki Wehin Koht, e kapatahiong: “Ekei kumwail iang mihmi ni soangen aramas pwukat mahso.” Aramas pwukat wekidala arail mour pwehki sawas sang Paipel oh pil sapwellimen Koht manaman. Pil mwurin arail aleier padahk mehlel, ekei irail anahne powehdi luwet laud kan me re ahneki me pid arail nanpwungmwahu rehn Koht. Paipel mahsanih duwen emen Kristian keidi ni arail mwehio me anahne piskenla; ahpw mwuhr, e pwurodo. (1 Kor. 5:1-5; 2 Kor. 2:5-8) Ia duwe, e sou kin kakehlakahda kitail ni atail tehk duwen kahpwal tohto me riatail Kristian kan lelohng ahpw re powehkihdi manaman en Mahsen en Koht?

3. Dahme kitail pahn koasoiapene nan iren onop wet?

³ Pwehki Mahsen en Koht uhdahn manaman oh kitail kak iang naineki, kitail uhdahn men doadoahngki ni ahl ehu me keieu mwahu. (2 Tim. 2:15) Nan iren onop wet, kitail pahn koasoiapene ia duwen atail kak uhdahn kasalehda manaman en Mahsen en Koht (1) nan atail mour, (2) nan atail doadoahk en kalohk, oh (3) ni atail wia padahk nan mihting kan. Mehn kataman pwukat pahn sewese kitail en kasalehda atail kalahngan oh atail poakohng Samatail limpoako nanleng me kin ketin padahki kitail pwehn wia kamwahu ong kitail.—Ais. 48:17.

NAN ATAIL MOUR

4. (a) Dahme kitail anahne wia pwe Mahsen en Koht en kamwakid kitail? (b) Ia duwen omw kin koasoanehdi ahnsou ong wadawad en Paipel?

⁴ Pwe Mahsen en Koht en kamwakid kitail, kitail anahne kaukaule wadek, pil rahn koaros ma kak. (Sos. 1:8) Ei mehlel, kitail koaros kin uhdahn soupisek. Ahpw, kitail sohte kak mweidohng mehkot—pil pwukoa kesempwal kan—en kauwehla atail koasoandi en wadawad Paipel. (Wadek Episos 5:15, 16.) Sapwellimen Siohwa aramas tohto diaradahr soangsoangen ahl mwahu kan en kihong ahnsou en wadek Paipel rahn koaros, sohte lipilipil ma ni arail kin pirida nimenseng de mwohn arail pahn meir, de pil ahnsou ehu nan rahnohte. Arail pepehm kin duwehte ahn sounmelkahkao me ntingihedi: “Ia uwen ei poakohng sapwellimomwi kosonnedo! I kin medemedewe sang nimenseng lel nipwong.”—Mel. 119:97.

5, 6. (a) Dahme kahrehda e kesempwal en doudouloale dahme kitail kin wadek? (b) Dahme kitail kak wia pwe atail doudouloale dahme kitail wadek en kak mie katepe? (c) Ia duwen omw paiekihda omw wadek Mahsen en Koht oh doudouloale?

⁵ Patehng atail wadawad en Paipel, e kesempwal kitail en doudouloale dahme kitail kin wadek. (Mel. 1:1-3) Ihte ahnsowo me kitail pahn kak doadoahngki eh kaweid erpit kan ni ahl me keieu mwahu. Sohte lipilipil ma kitail kin wadek Paipel sang nan pwuhk de sang nan neitail computer ape, atail mehn akadei iei en wadek oh mweidohng en sair mohngiongitail.

Emen Sounkadehdehn Siohwa wie wadewadek Paipel

⁶ Dahme kitail kak wia pwe atail doudouloale dahme kitail wadek en kak mie katepe? Me tohto kin diarada me e wia sawas laud ehu ma irail wadekala pali ehu nan Paipel oh uhdi ekis oh medemedewe soangen peidek pwukat: ‘Dahme met padahkihong ie duwen Siohwa? Ni ahl dah kan me I kasalehdahr me I kin idawehn ire mehlel pwukat sang Mahsen en Koht? Wasa dah kan me I anahne kamwahwihala?’ Ni atail kin doudouloale oh kapakapki Mahsen en Koht, met pahn kamwakid kitail en kalaudehla atail doadoahngki eh kaweid kan. Ei mehlel, kitail pahn uhdahn kasalehda manaman en Mahsen en Koht nan atail mour.—2 Kor. 10:4, 5.

NAN DOADOAHK EN KALOHK

7. Ia duwen atail pahn doadoahngki mwahu Mahsen en Koht nan kalohk?

⁷ Dahme kak sewese kitail en doadoahngki mwahu Mahsen en Koht nan atail doadoahk en kalohk? Keieu en kahk iei en ahnsou koaros doadoahngki Paipel ni atail kin kalohk oh padahk. Emen brother kawehwehda met ni ahl wet, “Ma ke iang Siohwa kohla kalohk ihmw lel ihmw, ia duwe, kowehte me pahn koasoi, de ke pahn mweidohng ih en ketin mahsen?” Met wehwehki me ni atail kin kalohk oh wadek sang Mahsen en Koht, kitail kin mweidohng Siohwa en ketin mahsaniong tohnihmwo. En pilada oh doadoahngki iren Paipel mwahu ehu, met pahn manaman sang dahme kitail kak nda. (1 Des. 2:13) Pein idek rehmw, ‘Ia duwe, I kin isaneki ahnsou mwahu koaros en ehukihong irail kan me I kalohk ong ire ehu sang nan Paipel?’

8. Dahme kahrehda kitail anahne wia laudsang en ihte wadek iren Paipel kan ni atail kalohk?

⁸ Ahpw kitail anahne wia laudsang en ihte wadek iren Paipel kan ong irail kan me kitail koasoiong. Dahme kahrehda? Pwehki me tohto sohte uhdahn wehwehki Paipel. Met kin wiawi ni mwehin tepin Kristian ko oh pil nan atail ahnsou. (Rom 10:2) Eri kitail en dehr medewe me emen pahn mwadangete koledi wehwehn iren Paipel ehu ihte pwehki kitail wadek ong ih. Kitail anahne doadoahngki ahnsou en kasalehda wasa kesempwalo nan ireo—ele sang ni atail pwurehng wadek—oh eri kawehwehda mwahu. Atail wia met kak uhdahn sewese ireo sang Mahsen en Koht en sair madamadau oh mohngiong en me rongorongo.—Wadek Luk 24:32.

9. Ia duwen atail kak nda soahng kan me pahn kamwakid aramaso en wauneki Paipel mwohn atail wadek iren Paipel ehu? Menlau kihda ehu karasaras.

⁹ E pil mwahu kitail en nda mehkot me pahn kamwakid aramaso en wauneki Paipel mwohn atail wadek iren Paipel ehu. Karasepe, kitail kak nda, “Kita kilang dahme Sounkapikpatailo mahsanihki ire wet.” Ni atail koasoiong emen me tikida wasa ehu me sehse mouren Kristian, kitail kak nda, “Menlau tehk dahme Pwuhk Sarawi mahsanihong kitail.” De ma kitail kalohk ong emen me ele iang sukuhl laud, kitail kak idek, “Mie pak ke rong lepin padahk wet?” Ei, kitail kin medemedewe mahs duwen aramaso oh wia atail padahko en pahrekiong eh irairo.—1 Kor. 9:22, 23.

Sounkadehdehn Siohwa kan kin doadoahngki Paipel nan arail kalohk

10. (a) Menlau koasoiahda dahme wiawihong brother men. (b) Ia duwen omw kilang manaman en Mahsen en Koht nan omw doadoahk en kalohk?

¹⁰ Me tohto diarada me en doadoahngki Mahsen en Koht nan kalohk kin kak kamwakid laud aramas akan me re kalohk ong. Karasepe, brother men pwurehng pwurala rehn ohl mah men me kin wadek neitail makasihn kan erein sounpar tohto. Brothero lemehda me en dehr ihte kihong nein ohlo nah Kahn Iroir kapw ahpw e pahn pil wadekohng ih iren Paipel ehu me mi nan makasihno. Ih eri wadek 2 Korint 1:3, 4, me mahsanih: “Samatail me kalahngan oh Koht me pwarer en kansenamwahu koaros. Ih me kin ketin sewesei [“kansenamwahwih,” NW] kitail nan atail apwal akan koaros.” Ohlo uhdahn mwekidkihda mahsen pwukat oh peki brothero en pwurehng wadek ireo. Ih eri ndahda ia uwen ih oh eh pwoudo ara kin anahne lokaiahn kamweit. Met e kin perenki rong padahk en Paipel. Ia duwe, ke sou pahn pil pwungki me Mahsen en Koht kin manaman nan atail doadoahk en kalohk?—Wiewia 19:20.

NI OMW WIA PADAHK NAN MIHTING KAN

11. Pwukoa dahieu me brother kan me kin wia padahk nan mihting kan ahneki?

¹¹ Kitail koaros kin perenki iang towehda mihting en Kristian kan oh pil mihting tohrohr kan. Keieu, kitail kin towehda mihting pwukat pwehn kaudokiong Siohwa. Kitail pil kin paiekihda laud sang kasukuhl kan. Brother kan me kin wia padahk nan soangen ahnsou pwukat ahneki pwais kaselel ehu. Ni ahnsowohte, re pil anahne pohnese me re pwukoahki pwukoa laud ehu. (Seims 3:1) Re anahne tehk mwahu ahnsou koaros me dahme re padahngki kin poahsoankihda Mahsen en Koht. Ma ke pahn wia padahk nan mihting ehu, ia duwen omw kak kasalehda manaman en Mahsen en Koht nan omw padahko?

Emen brother doadoahngki Paipel ni eh wia padahk ehu

12. Ia duwen brother men me kin wia padahk eh kak tehk mwahu me Paipel iei me wia utupen eh padahko?

¹² Tehk mwahu me Paipel iei me wia utupen omw padahko. (Sohn 7:16) Dahme met kin pidada? E kin pidada omw en kanahieng me sohte mehkot, duwehte karasaras kan, koasoipen riatail Kristian kan, de pil mwomwen omw padahk, en kahrehiong iren Paipel me ke wadeko en sohla kadoadoahk. Pil ehu, tamataman me omw pahn ihte wadewadek iren Paipel tohto sohte wehwehki me ke kin padahk sang nan Paipel. Ni mehlel, en doadoahngki iren Paipel me nohn tohto kakete kahrehda sounrongorong kan en sohte koledi oh tamataman ire ehu. Eri pilada iren Paipel kesempwal kan, kihong ahnsou ken wadek, kawehwehda, karasahda, oh doadoahngki mwahu. (Neh. 8:8) Ni kapahrek ehu eh kin poahsoankihda outline me kohsang sapwellimen Koht pwihn, onopki outline-o oh iren Paipel kan loale. Song en wehwehkihla ia duwen ehuehu ire ko oh iren Paipel ko arail kin dokpene. Kowe eri doadoahngki iren Paipel kan me pilipildahr pwe ken kasalehda ire kesempwal kan nan outline-o. (Ke kak diar iren sawas kan sang kasukuhl 21 lel 23 nan pwuhken Benefit From Theocratic Ministry School Education.) Keieu kesempwal, kapakap oh peki sapwellimen Siohwa sawas pwe ken kasalehda mwahu kaweid kaselel kan me mi nan sapwellime Mahsen.—Wadek Esra 7:10; Lepin Padahk 3:13, 14.

13. (a) Ia duwen sister men eh mwekidkihda iren Paipel kan sang mihting en Kristian ehu? (b) Ia duwen omw paiekihda padahk en Paipel kan me kin wiawi nan atail mihting kan?

¹³ Sister men nan Australia uhdahn mwekidkihda iren Paipel kan sang padahk en mihting ehu. Mendahki mour me e tikida loale uhdahn apwal, sister menet mwekidki padahk en Paipel oh inoukihong Siohwa eh mour. Ahpw mendahki met, e kin apwalki kamehlele me Siohwa kin ketin poakohng ih. Kedekedeo, e uhdahn kamehlelehla me Koht ketin poakohng ih. Dahme sewese ih en kamehlele met? Wekidekla wet wiawi ni ahnsou me e doudouloale oh kadokepene iren Paipel ehu me kohsang padahk en ehu atail mihting kan oh pil iren Paipel teikan.a Mie pak me ke pil mwekidkihda iren Paipel ehu sang atail mihting kan oh mihting tohrohr kan?—Neh. 8:12.

14. Ia duwen atail kak kasalehda atail kalahnganki Mahsen en Siohwa?

¹⁴ Ia duwe, kitail sou kin kalahngankihong Siohwa sapwellime Mahsen, Paipel? E sohte ihte ketikihda ni limpoak sapwellime Mahsen ong aramas akan ahpw e pil ketin kapwaiada sapwellime inowo me Paipel pahn kin mour poatopoat. (1 Pit. 1:24, 25) Kitail uhdahn anahne kaukaule wadek Mahsen en Koht, doadoahngki nan atail mour, oh pil doadoahngki ni atail kin sewese meteikan. Sang atail wia met, kitail kin kasalehda atail limpoak oh kalahngan ong kisakis kesempwal wet oh pil, keieu kesempwal, ong me ketikihda kisakis wet, Siohwa Koht.

a Menlau kilang kakon me oaralape “Wekidekla Ieu.”

“Wekidekla Ieu”

Erein sounpar tohto mwurin eh esehla padahk mehlel, Victoria kin apwalki kamehlele me Koht kak ketin poakohng ih. Dahme sewese ih en tepida kamehlele me Koht uhdahn ketin poakohng ih? Victoria nda:

“Wekidekla wet wiawi mpen sounpar 15 mwurin ei papidaisla. Nan padahk ehu me wiawi nan Wasahn Kaudoko . . . , brother me wia padahko doadoahngki Seims 1:23, 24. Iretikitik ko kapahrekiong Mahsen en Koht kilahs en irongen ehu me kitail kak kilang pein kitail nin duwen Siohwa eh kin ketin mahsanih kitail. I tepida medewe ma mwomwen ei kilangwohng pein ngehi weksang dahme Siohwa ketin mahsanih rehi. Nin tapio, I kin pelian madamadau wet me I ahpwtehn ahnekihda. I pehm me Siohwa uhdahn sohte kak ketin poakohng ie.

“Rahn kei mwuri, I wadek ehu iren Paipel me wekidala ei mour. Iren Paipelo iei Aiseia 1:18, wasa me Siohwa ketin mahsanih: ‘Kumwail kohdo kitail kapwungala mahs ire pwukat. Mehnda ma kumwail weitahtahkilahr dipamwail kan, ahpw I pahn kamwakeleikumwailda duwehla sinoh.’ I pehm me Siohwa ketin mahmahsanihong ie: ‘Nna kohdo, Vicky, kita kapwungala mahs nanpwungata. I ese iuk, I ese duwen dipomw kan, I ese omw mohngiong—oh I poakohng uhk.’

“I sohla kak meir ni pwongo. I sohte uhdahn kamehlele me Siohwa kak ketin poakohng ie, ahpw I tepida medemedewe duwen pweinen pweipwei sapahl me Sises ketin toukihda. I wiahkintehieu wehwehkihda me Siohwa kin ketin kankanengamahiong ie erein ahnsou reirei oh kin kasakasalehiong ie ni ahl tohto me e ketin poakohng ie. Ahpw mwomwen me I kin patohwan sapengki: ‘Sapwellimomwi limpoak sohte uhdahn laud pwe en kak sair ie. Meirong me sapwellimomwi Ohlo ketikihda pil sohte itar en pwainiehla.’ E kin mwomwen me I alehte kapwurehiong Siohwa meirongo. Ahpw met, sang ei doudouloale meirong en pweinen pweipwei sapahlo, I tepida pehm me Siohwa kin ketin poakohng ie.”