“Mahsen en Koht Wie Momour oh Manaman”
1 Wahnpoaron Pohl ntingihdi: “Mahsen en Koht wie momour oh manaman.” (Ipru 4:12) Ia wehwehn mahsen pwukat? Mahsen en Koht me dierekda nan Paipel kin kamwekid laud aramas akan. Erpit me mihmi nan Paipel kin kak kamwekid aramas akan en kawikila arail mour pwehn mwahula. Oh pil, mehn kamweit oh koapworopwor me ntingdi nan Paipel pil kin kahrehong aramas akan en men karanih Sounkapikpatail oh Ih me kihong kitail mour, Siohwa Koht. Loalokong me mihmi nan Paipel kin kak kahluwalahng aramas mohngiong mehlel kan en kak ahneki koapworopwor en mour soutuk. Ahpw, pwehn kilang atail doadoahk en kalohk pweida mwahu, kitail anahne doadoahngki Paipel ni atail kin kalohk ong meteikan.
2 Wadek Iren Paipel Ehu ni Ahnsou Mwahu kan Koaros: Likamwete sounkalohk tohto met sohte kin kalap doadoahngki neirail Paipel ni ahnsoun kalohk. Met kin pil mehlel rehmw? Pwehki sohte en aramas akan arail ahnsou laud en koasoiong uhk nan kalohk, mwein ke kin ahnla kihong irail doaropwe, de brochure, de makisihn oh mwein ke pil sohte kin uhdahn wadek iren Paipel sang nan Pwuhk Sarawi ahpw ke kin oaralapiehdahte. Se men kangoange sounkalohk koaros en nantihong wadek iren Paipel ehu sang nan Pwuhk Sarawi ni ahnsoun re kalohk ong emen, oh met pahn kak kasalehong tohnihmw me dahme kitail koasoia uhdahn kohsang Pwuhk Sarawi.
3 Mendahki aramas malaulau kin wia ahneparail wadek Pwuhk Sarawi, pali laud en aramas kin pehm me wadek Pwuhk Sarawi kin wia mehkot mwahu. Aramas me kin kedirepw pil kin kak rongorong minit ehu de riau ni emen pahn wadek sang nan Pwuhk Sarawi. Ma emen kin wadek Paipel ni ngoang oh mehlel oh kawehwe iren Paipelo ni mwotomwot, Mahsen en Koht kak kamwekid ih en kamwahuwihala eh mour. Ahpw, mwurin ke wia tepin koasoi, iaduwen ke kak pousehla wadek iren Paipel ehu?
4 Ke Kak Wadek Iren Paipel Ehu Ahnsoun Kihla Makisihn: Emen Soundoulik kin wadek iren Paipel ehu ahnsou me e kin kihla makisihn kan. E kin weuwa kisin Paipel tikitik nan eh pwekid. Mwurin e kin kasalehda artikel nan makisihn ehu, e kin mwadang pahkpeseng nah kisin Paipel tikitiko oh wadek iren Paipel ehu me kin dokedoke artikel me e kasalehda. Ke kak wia met ni ahmw pahn nda, “Dahme ke lemeleme duwen inou kangoang wet?” oh mwurin mwo, wadek iren Paipelo me ke pilidahr.
5 Ke kak wiahda ahmw mehn akadei en wadek iren Paipel ehu de riau sang noumw Pwuhk Sarawi ong emen emen me ke pahn tuhwong. Manaman me kin kohsang Pwuhk Sarawi kak kamwekid aramas akan en karanih Koht.—Sohn 6:44.