Doadoahngki Mwahu Pwuhk Sarawi
1. Dahme ke kak wia pwehn kaunopada ong kalohk?
1 Sohte lipilipil pwuhk, brochure, makisihn de tract me kitail pahn doadoahngki nan kalohk, e pahn mwahu ma kitail kak pilada iren Paipel ehu me kak kamwekid madamadau en irail akan me kin perenki rong. (Ipru 4:12) En pilada iren Paipel ehu me mihmi nan sawaspen Paipel me ke pahn kihla, kin wia sawas laud pwehn kawehwe mwahu duwen sawaspen Paipel me ke doadoahngki. Nan ekei wasa kan, sounkalohk kan diarada me e kin wia sawas laud en weuwa Pwuhk Sarawi nan pehrail ni arail pahn kin kohlahng tuhwong aramas emen oh ni ahnsou me irail kin kalohk ihmw lel ihmw.
2. (a) Iaduwen ahmw pahn kak tepikihda ahmw padahk iren Paipel ehu? (b) Soangen oaralap dah kei me pid iren Paipel kan me aramas kin perenki rong nan ahmw wasahn kalohk?
2 Tepiada Ahmw Padahk Ni Ahmw Pahn Doadoahngki Iren Paipel Ehu: Ekei sounkalohk kan kin tepiada arail padahk ni arail kin wia peidek mengei ong tohnihmw oh peideko pahn pid iren Paipel me re pahn wadek. Met kin mwadangete kahluwa madamadau en tohnihmwo ong Mahsen en Koht. Ke lemeleme tepin koasoi pwukat pahn kak pweida mwahu nan ahmw wasahn kalohk?
◼ “Ma mie ahmw kehl tohrohr, ke kak kamwahuwihala soangen kahpwal pwukat?” Wadek Kaudiahl 21:4.
◼ “Dahme kahrehda kitail kin mihmi nan ahnsou apwal akan?” Wadek 2 Timoty 3:1-5.
◼ “Ke lemeleme atail wasahn kousoan pahn mwahula ehu rahn ma aramas koaros kin kapwaiada kaweid wet?” Wadek Madiu 7:12.
◼ “Ke lemeleme noumw seri kan kak iang paiekihda soangen wasa duwehte met?” Wadek Melkahka 37:10, 11.
◼ “Ke lemeleme dahme Paipel kohpada wasaht pahn pweida ehu rahn?” Wadek Aiseia 33:24.
◼ “Ke wehwehki duwen wekideklahn koperment me iren Paipel wet koasoia?” Wadek Daniel 2:44.
◼ “Mie pak me ke men idek rehn Koht peidek wet?” Wadek Sohp 21:7.
◼ “Ke lemeleme kitail kak pwurehng tuhwong irail me kitail poakpoake me mehlahr?” Wadek Sohn 5:28, 29.
◼ “Ke lemeleme irail me mehlahr akan kin ese dahme me memour kan kin wiewia?” Wadek Eklesiasdes 9:5.
3. Iaduwen kitail kak sewese aramas en wehwehki iren Paipel kan me irail kin wadek?
3 Kawehwe, Kihda Karasaras, Kasalehda Iaduwen Irail Pahn Doadoahngki: Ni ahnsou me aramas emen kin kasalehda me e perenki dahme ke koasoia, ken dehr karuwaru kanekehla ahmw koasoi. Ken kihong ahmw ahnsou en kawehwe, kihda karasaras, oh kasalehda iaduwen aramaso kak doadoahngki iren Paipel kan me ke ahpwtehn wadek nan ah mour. (Neh. 8:8) Ni ahnsou me aramas kin wehwehki oh pwungki dahme Mahsen en Koht kin padahkki, e kak kamwekid irail en kawekila arail mour oh wiliakapwala.—1 Deselonika 2:13.
4. Iaduwen kitail kak doadoahngki mwahu Pwuhk Sarawi ni ahnsou me kitail pahn wia Return Visit kan?
4 Kaukaule doadoahngki mwahu Pwuhk Sarawi ni ahmw pahn sewese aramaso en kalaudehla ah ineng en perenki rong Pwuhk Sarawi. Ke pil kak doadoahngki iren sawas pwukat ni ahmw pahn wia ahmw Return Visit kan: (1) Pilada iren Paipel me konehng. (2) Kihda ehu peidek mengei me pidada iren Paipelo me ke piladahr. Mwurin mwo, wadek iren Paipelo. (3) Kawehwe, kihda karasaras, oh kasalehda iaduwen aramas kak doadoahngki iren Paipelo. Nantihong ekis ekis kalaudehla ahn aramaso ah loalokongkihla Mahsen en Koht ehu ehu ahnsou me ke kohla reh. Ke pahn kereniongehr kak tepida Bible Study ehu!