Pali 3: Wia Onop en Paipel Rehn Aramas akan Ni Ahl me Pahn Sewese Irail en Kekeirada Mwahu
Doadoahngki Mwahu Iren Paipel kan
1. Dahme kahrehda kitail anahne kasansalehda mwahu iren Paipel kan ni ahnsou me kitail kin onop Paipel rehn aramas akan?
1 Kahrepe kitail kin onop Paipel rehn aramas akan iei en “katohnpadahk” ni atail pahn sewese aramas en wehwehki oh pwungki padahk kan en Mahsen en Koht oh doadoahngki padahk pwukat nan arail mour. (Madiu 28:19, 20; 1 Dese. 2:13) Eri, e sansal me atail onop pahn poahsoanda pohn Pwuhk Sarawi. Keieu, e pahn mwahu en kasalehiong aramas me kitail kin onop reho duwen arail kak rapahkihda iren Paipel kan nan pein neirail Paipel. Ahpw, iaduwen kitail kak doadoahngki iren Paipel kan en sewese irail pwukat en kekeirada ni pali ngehn?
2. Iaduwen kitail kak pilada iren Paipel kan me kitail pahn wadek oh koasoipene nan onopo?
2 Pilada Mehnia Iren Paipel kan me Ke Pahn Wadek: Ni ahnsou me ke kin kaunop, ke pahn medemedewe iaduwen iren Paipel kan kin pid oaralap me ke pahn koasoia, oh ke kak pilada mehnia iren Paipel kan me ke pahn wadek ahnsou me ke onop rehn aramaso. Pali laud en ahnsou, e pahn mwahu en wadek iren Paipel kan me pahn kasalehda ni sansal dahme kitail kin kamehlele. Iren Paipel kan me kin koasoia duwen “background information“ sohte anahne wadek. Medemedewe duwen anahn oh irair en emen emen aramas me ke onop reh.
3. Ia kamwahupen doadoahngki peidek kan, oh iaduwen kitail kak wia met?
3 Doadoahngki Peidek kan: Mweidohng aramas me ke onop reh en kawehwe duwen iren Paipel kan, kaidehn kowe en kawehwe ong ih. Ke kak wia met ni ahmw pahn doadoahngki peidek kan ni ahl koahiek. Ma mouren iren Paipelo sansal, ke kak idek reh iaduwen iren Paipel wet kin dokedoke dahme parakrapo koasoia. Ahpw, ekei pak, ke anahne doadoahngki peidek oaritik ehu de pil tohto sang en sewese aramaso en wehwehki duwen mouren iren Paipelo. Ma ke anahne kalaudehla kawehwehpen iren Paipelo, ke kak wia met mwurin aramaso sapengala peideko.
4. Ia uwen kawehwe me anahn ong iren Paipel kan me kitail kin wadek?
4 Wiahda en Mengei: Emen me samanih kesik ketieu kin doadoahngki oapwoatete arep pwehn lel wasao me e kainenelang. Duwehte emen me koahiek en padahk sohte anahne doadoahngki lepin lokaia tohto pwehn kawehwe mouren ire ieu. E kak kawehwe ni ahl me mengei, sansal oh pwung. Ekei pak, ke anahne research nan pwuhk en Society kan pwehn wehwehki iren Paipel ehu pwehn kak kawehwe pwung. (2 Tim. 2:15) Ahpw, ken dehr kawehwe duwen soahng koaros me pid iren Paipel koaros nan amwa onop. Koasoiahte dahme anahn pwe aramaso en kak wehwehki ireo.
5, 6. Iaduwen kitail kak sewese aramas me kitail kin onop rehrail en doadoahngki iren Paipel kan nan arail mour, oh dahme kitail en dehr wia?
5 Kasalehda Iaduwen E Kak Doadoahngki Iren Paipel kan Nan Ah Mour: Ni ahnsou me konehng, sewese aramaso me ke onop reh en wehwehki iaduwen e kak doadoahngki iren Paipel kan nan ah mour. Karasepe ieu, ni ahnsou me ke wadek Ipru 10:24, 25 oh aramaso saikinte iang towehda mihding kan, ke kak kasalehda dahme kin wiawi ni mihding kan oh luhke ih en iang towehda. Ahpw, ken dehr idingkihong ih en iang towehda mihding kan. Mweidohng Mahsen en Koht en kamwekid ih pwe pein ih en kak wia dahme anahn pwehn kaperenda Siohwa.—Ipru 4:12.
6 Ni atail kin kapwaiada atail pwukoa en katohnpadahk, kitail en “sewese aramas en peik pwehki pwoson” ni atail kin doadoahngki mwahu iren Paipel kan.—Rom 16:26.