Koakon En Peidek

◼ Iaduwen atail pahn apwalih atail pwukoa kan nan mwomwohdiso?

Mwomwohdiso en sapwellimen Siohwa aramas akan kin soandi mwahu oh met kin kohsang tohnmwomwohdiso koaros arail sawaspene oh miniminpene nanpwungarail. (1 Kor. 14:33, 40) Menlau medemedewe duwen tohtohn koasoandi kan me brother kan anahne apwalih nan ehu mihding en mwomwohdiso. Ahpw, likin koasoandi me pid prokram en mihdingo, mie doadoahk tohto mwohn oh mwurin mihding me brother oh sister kan kin wia soangsoangen pwukoa kan. Mie doadoahk kan me wiawi me meteikan sohte kin kilang me pil kesempwal. Dahme kitail kak wia pwehn sewese de utungada koasoandi pwukat?

Kasalehda me ke men sawas. Irail me kin perenki sawas kin diarada me diren doadoahk kan me irail kak wia. (Mel. 110:3) Kasalehda me ke nsenohki irail me soumwahu kan oh me mah kan. Ke kak pil iang sewese kamwakelehda Kingdom Hall. Kitail kak wia soahng tohto mehnda ma sohte me peki kitail en wia. Ihte me anahn: atail ineng en men sawas.

Papah meteikan ni lamalam aktikitik. Aramas aktikitik kan kin perenki papah meteikan. (Luk 9:​48) Lamalam aktikitik pahn pil sewese kitail en dehr ale pwukoa tohto ahpw kitail sohte kak kapwaiada atail pwukoa koaros. Oh pil, aktikitik pahn sewese kitail en dehr aklapalap oh wia mehkot me kasalehda me kitail sohte uhpaiong irail me apwalih kitail.​—Lepin Padahk 11:2.

Kasalehda me kitail aramas likilik. Kangoang kohwong Moses en pilada “ohl likilik kei” pwehn kak ale pwukoa toutou kan ong apwalih wehin Israel oh irail pahn kak apwalih pwukoa pwukat. (Eksodus 18:21) Irair wet pil kesempwal rahnwet. Kitail en nantihong kapwaiada atail pwukoa koaros me kohwong kitail. (Luk 16:10) Ma ke sohte kak wia ahmw pwukoa (ahmw padahk), kehsehkin brother me apwalih pwukoa kan pwe en kak pekihda rehn emen en wilian uhk.

Wia uwen ahmw kak koaros en kapwaiada ahmw pwukoa kan. Kaweid kohwong Kristian kan en wia uwen arail kak koaros en doadoahk mehlel ong atail doadoahk en mwohni ape. (Kolose 3:​22-​24) Mie pil kahrepe laud en wia met ni ahnsou me e pahn pidada atail doadoahk oh pwukoa kan nan kaudok mehlel. Mendahki doadoahk ehu me mwomwen tikitik, mwomwohdiso pahn paiekihda ma ih me wiahda doadoahk de pwukoa wet pahn loalenohng oh wia uwen ah kak en kapwaiada.

Ehu ehu pwukoa me kitail kin ahneki kin kihong kitail atail ahnsou mwahu en kasalehda atail limpoak ong Siohwa oh riatail kan. (Madiu 22:37-​39) Kitail en lelepek wia uwen atail kak koaros en nantihong kapwaiada pwukoa kan me kohwong kitail.