NEKIDALA MWAHU

Wia Onop en Paipel Rehn Aramas akan Ni Ahl me Pahn Sewese Irail en Kekeirada Mwahu

Insert wet kin kasalehda ire kesempwal kan sang Atail Doadoahk Ong Wehio teikan. E pahn mwahu ma sounkalohk koaros pahn nekidala mwahu doaropwe wet oh kilang doaropwe wet ni ahnsou me irail anahne sawas ni arail kin onop Paipel rehn aramas akan. Brothers kan kak doadoahngki doaropwe wet ni ahnsou me sounkalohk kan kin tuhpene ong kalohk, oh Sounapwalihn Kalohk kan kak doadoahngki doaropwe wet ni arail kin wia arail kin mwemweitalahng pwihn en Pwuhk Study kan oh wiahda padahk.

Pali 1: Dahkot Paipel Study?

Ma ke kin kaukaule koasoiaiong emen duwen Paipel, mehnda ma mwotomwot, oh ke kin doadoahngki Paipel iangahki sawaspen Paipel kan me konehng en onopki, met wehwehki me ke onop Paipel rehn aramaso (Paipel Study). Ke kak ripohtki ahmw Paipel Study mwurin ahmw pahn onop reh pak siluh (tepin onop kak wia kamwomwada koasoandi en onop) oh ma ke kamehlele me aramaso pahn pousehla onop Paipel.​—km 7/04 pali 1.

Brochure kan de Pwuhk kan me Ke Kak Doadoahngki

◼ Dahme Koht Kupwurki Kitail en Wia?

◼ Loalokong Me Pahn Kahluwalahng Mour Soutuk

◼ Worship the Only True God

◼ Ke Kak Kompoakepahnki Koht! (Ke kak doadoahngki brochure wet en onop rehn irail me sohte sukuhl de ekis sukuhl oh apwaliki wadawad.)

Pali 2: Kaunopada en Wia Onop Rehn Aramaso

Kitail anahne padahk ni ahl ehu me pahn lel mohngiong en aramas akan me kin onop rehtail. Met kin wehwehki me ke anahne kaunopada en wia onop me pahn lel mohngiong en aramaso me ke onop reh.​—km 8/04 pali 1.

Iaduwen Kitail Kak Kaunopada

◼ Tehk mwahu daidel en irelaudo de iren mehn kasukulo, sawaspen oaralap kan, oh kilel kan.

◼ Rapahki pasapengpen peidek kan me kileledi nan onopo, oh kileledi ihte lepin lokaia kesempwal kan.

◼ Pilada mehnia iren Paipel kan me ke pahn wadek nan amwa onop. Ntingihdi ire kesempwal kan duwen iren Paipel kan nan noumw brochure de pwuhk.

◼ Wiahda kisin kousapahl pwehn sewese tohnsukuhlo en tamataman ire kesempwal kan.

Sewese Tohnsukuhlo en Wehwehki Iaduwen E Kak Doadoahngki Nan Ah Mour Dahme E Sukuhliki

◼ Kapakapki aramaso oh ah anahn akan.

◼ Song en medewehla peidek kan me e kakete ahneki de ire kan me e pahn apwaliki wehwehki de kamehlele.

◼ Pein idek rehmw: Dahme tohnsukuhlo anahne wehwehki de kamwahuwihala pwehn kak kekeirada ni pali ngehn? Iaduwen ahi kak lel ah mohngiong?

◼ Ekei pak, ke anahne kaunopada karasaras kan, kawehwe kan de ekei peidek kan pwehn sewese tohnsukuhlo en tamataman ire kesempwal kan me mihmi nan amwa onop en rahno.

Pali 3: Doadoahngki Mwahu Iren Paipel kan

Kahrepe kitail kin onop Paipel rehn aramas akan iei en “katohnpadahk” ni atail pahn sewese aramas en wehwehki oh pwungki padahk kan en Mahsen en Koht oh doadoahngki padahk pwukat nan arail mour. (Madiu 28:19, 20; 1 Deselonika 2:​13) Eri, e sansal me atail onop pahn poahsoanda pohn Pwuhk Sarawi.​—km 11/04 pali 4.

Atail Padahk kan Anahne Poahsoanda Pohn Mahsen en Koht

◼ Kasalehiong aramas me kitail kin onop reho duwen arail kak rapahkihda iren Paipel kan nan pein neirail Paipel.

◼ Wadek oh koasoiapene iren Paipel kan me kin kasalehda ni sansal dahme kitail kin kamehlele.

◼ Doadoahngki peidek kan. Mweidohng aramas me ke onop reh en kawehwe duwen iren Paipel kan, kaidehn kowe en kawehwe ong ih.

◼ Wiahda en mengei. Ken dehr kawehwe duwen soahng koaros me pid iren Paipel kan. Koasoiahte dahme anahn pwe aramaso en kak wehwehki ireo.

◼ Sewese aramaso en wehwehki iaduwen e kak doadoahngki iren Paipel kan nan ah mour.

Pali 4: Kaiahne Tohnsukuhl kan en Kaunopada

Tohnsukuhl emen me kin wadek iren mehn kasukuhlo mwowe, kaunopada oh lainih pasapeng kan, oh kin medemedewe iaduwen e pahn pasapeng ni pein ah lokaia, kin kekeirada mwadang ni pali ngehn. Ihme kahrehda, ni ahnsou me ke kin kohla rehn ahmw Paipel Study kaukaule, kowe oh ahmw Paipel Study kak ehupene oh kaunopada iren mehn kasukuhl ehu pwehn kasalehiong tohnsukuhlo ia mwomwen e pahn onop Paipel. Ong pali laud en tohnsukuhl kan, e pahn mwahu ma kumwa pahn sawaspene kaunopada irelaud ehu de iren mehn kasukuhl ehu pwon.​—km 12/04 pali 1.

Lainihdi Pasapeng kan oh Ntingihdi Ire Kesempwal kan

◼ Kawehwe iaduwen tohnsukuhlo kak diar pasapeng kan me pwungiong peidek kan.

◼ Kasalehiong tohnsukuhlo pein noumw brochure de pwuhk me kumwa onopki me kasalehda me ke kileledihte lepin lokaia kesempwal kan.

◼ Sewese ih en wehwehki me iren Paipel kan kin utungada ire kan nan parakrapo, oh kasalehiong ih iaduwen e pahn kak ntingihdi mehn kataman kan ni keilen nah brochure de pwuhk me kumwa onopki.

Kasawih oh Kousapahl

◼ Sewese tohnsukuhlo en tehk oaralap, sawaspen oaralap, karasaras oh kilel kan mwohn e pahn kaunopada ah onop.

◼ Kangoange tohnsukuhlo en kousapahlih ire kesempwal kan ni ahnsou me e kaimwisekala ah onop.

Pali 5: Koasoanehdi Ia Uwen Laud en Brochure de Pwuhk me Kumwa Pahn Onop

Uwen me kitail pahn onopki pahn poahsoanda pohn koahiek en tohnsukuhlo oh pil irair en sounpadahko oh pil tohnsukuhlo.​—km 1/05 pali 1.

Kakairada Pwoson Kehlail

◼ E kesempwal kitail en sewese tohnsukuhlo en wehwehki dahme e onopki sang atail mwadang wia onopo ahpw tohnsukuhlo sohte wehwehki dahme e onopki.

◼ Ni ahmw pahn onop rehn tohnsukuhlo wihk koaros, kihong ahmw ahnsou me anahn pwehn sewese ih en wehwehki oh kamehlele padahk kan me kohsang nan Mahsen en Koht.

◼ Mweidohng ahnsou me itar en kasalehda ire kesempwal kan oh iren Paipel kan me pahn utungada padahk kan.

Doudoulahte Nan Onopo

◼ Ma tohnsukuhlo kin perenki koasoakoasoia soahng kan me pid pein ih, kitail anahne koasoanehdi en koasoia soahng pwukat mwurin onopo.

◼ Kitail anahne kanahieng me pein kitail sohte pahn koasoakoasoi nohn daulihla. Ekei pak, kitail kak koasoia duwen ekspiriens ehu de ehu ire tohrohr me pahn sewese tohnsukuhlo en wehwehki duwen onopo, ahpw kitail sohte men koasoakoasoi nohn daulihla pwehki met pahn kauwehla en tohnsukuhlo ahnsou en sukuhliki loalokong pwung en padahk kan sang Paipel.

Pali 6: Dahme Kitail Kak Wia Ni Ahnsou me Tohnsukuhlo Pahn Wia Peidek

Ni ahnsou me emen kin kaukaule onop Paipel wihk koaros, pali laud en ahnsou e kin mwahu en koasoia duwen oaralap kan nan Paipel ni ahl me soandi mwahu​—⁠met pahn mwahu sang lusulus seli sang ehu oaralap ong pil ehu. Met pahn sewese tohnsukuhlo en wiahda poahsoan en loalokong pwung oh kekeirada ni pali ngehn.​—km 2/05 pali 6.

Doadoahngki Ahmw Loalokong

◼ Ke kak sapeng peidek kan me pidada dahme kumwa onopki ahnsowohte.

◼ Ma tohnsukuhlo wia peidek kan me sohte pid duwen oaralap me kumwa wia rahno oh ke anahne wia research pwehn sapeng ah peidek ni ahl me pwung, e pahn mwahu en ndaiong tohnsukuhlo me ke pahn sapeng ah peidek ehu rahn. E pahn mwahu en ntingihdi ah peidek kan.

◼ Ma tohnsukuhlo kin apwaliki kamehlele padahk ehu, e pahn mwahu en kasalehiong ih duwen pil ehu pwuhk de brochure me kin koasoia dahme Paipel mahsanih duwen padahko ni oaritik.

◼ Ma tohnsukuhlo saikinte kak kamehlele padahko ni unsek, mwein e pahn mwahu en ieremen koasoia oaralapo ong ekis ahnsou oh mweidohng ih en medemedewe mahs dahme kumwa koasoiapenehr oh doulahte nan pwuhko de brochure me kumwa kin onopki.

Ken Ahneki Lamalam Aktikitik

◼ Ma ke sehse iaduwen ke pahn sapeng ah peideko, ken dehr lemehda ken ndahte dahme ke lemeleme me pwung.

◼ Ekis ekis ke kak sewese tohnsukuhlo en wia pein ah research.

Pali 7: Kapakap Ni Ahnsoun Onop

Ma tohnsukuhl en Paipel kan men kekeirada ni pali ngehn, re anahne sapwellimen Siohwa kapai kan. Ihme kahrehda, e konehng ahnsoun onop en tepikihda oh imwikihla kapakap.​—km 3/05 pali 4.

Kawehwe Duwen Kapakap

◼ Pali laud en ahnsou, kitail kak kapakap ni tepin atail onop rehn irail akan me kin poadidiong palien sarawi.

◼ Ahpw, ong pil ekei aramas, kitail anahne wehwehki ahnsou me konehng pwehn kak tepida kapakap.

◼ Ke kak doadoahngki Melkahka 25:​4, 5 oh 1 Sohn 5:​14 pwehn sewese tohnsukuhlo en wehwehki dahme kahrehda kitail anahne kapakap.

◼ Ke kak doadoahngki Sohn 15:16 pwehn kasalehda kesempwalpen atail kapakap ong Siohwa ni mwaren Sises Krais.

Dahme Pahn Wia Audepen Atail Kapakap akan:

◼ E konehng kitail en kapinga Siohwa pwehki Ih me wia Utupen kaweid mwahu.

◼ Kitail pil kak kasalehda me kitail kin nsenohki kekeiradahn tohnsukuhlo.

◼ Kitail pil kak kasalehda atail kalahnganki pwihn sansal me Siohwa kin ketin doadoahngki.

◼ Peki rehn Siohwa en ketin kapaiada ahn tohnsukuhlo ah kin nanti pwehn doadoahngki dahme e sukuhliki.

Pali 8: Kahluwa Tohnsukuhl en Paipel kan ong Sapwellimen Siohwa Pwihn

Atail mehn akadei ni ahnsou me kitail kin onop Paipel rehn aramas akan kaidehn ihte en padahkiong irail padahk kan me kohsang nan Paipel, ahpw en pil kahluwa irail ong sapwellimen Siohwa pwihn. Ehu ehu wihk, ke kak pilada ire kesempwal ehu me pid duwen sapwellimen Siohwa pwihn sang nan brochure de pwuhk me kumwa onopki pwe ken ehukihong ahmw Paipel Study ong kisin ahnsou kis.​—km 4/05 pali 8.

Mihding en Mwomwohdiso kan

◼ Kawehwe duwen mihding limau me kin wiawi nan ehu ehu wihk. Sangete ni ahnsou me ke tepida onop rehn aramaso, luhke ih en iang towehda mihding kan.

◼ Ehukihong ih ire kesempwal kan me ke kin sukuhliki ni mihding kan.

◼ Ni ahnsou me Kataman, kapokon kan, de mwemweit en Sounapwalih en Circuit pahn wiawi, koasoanehdi minit kei en kawehwe oh sewese irail en kekeirada arail ineng en iang koasoandi pwukat.

◼ Ke kak doadoahngki kilel kan nan pwuhk kan pwehn sewese irail en medemedewe dahme kin wiawi nan mihding kan.

◼ Kangoange irail en wadek brochure me oaralap koasoia Jehovah’s Witnesses​—Who Are They? What Do They Believe?

Video kan kin Sewese Aramas en Kalahnganki Sapwellimen Siohwa Pwihn

◼ Jehovah’s Witnesses​—The Organization Behind the Name

◼ Our Whole Association of Brothers

◼ United by Divine Teaching

◼ To the Ends of the Earth

Pali 9: Kaunopada Tohnsukuhl akan en Kalohk ni Ahnsou Sohte Lipilipil

Ni ahnsou me irail me kin onop Paipel kin pwosonla dahme re sukuhliki, irail kin mwekidki met oh irail kin men koasoiong meteikan.​—km 5/05 pali 1.

Kangoange Irail en Kalohk

◼ Mie kompoakepah kan de tohn ah peneinei me e kak luhke en iang ih onop?

◼ Mie ienge tohndoadoahk kan, de ienge tohnsukuhl akan, de aramas me e kin ese me kasalehda me irail perenki rong?

Kaiahne Irail en Ehukihong Meteikan Dahme Re Sukuhliki

◼ Ekei pak, ke kak idek rehn tohnsukuhlo, “Iaduwen ahmw pahn doadoahngki Paipel en kawehwehiong ahmw peneinei duwen padahk wet?”

◼ Ke pahn sewese tohnsukuhlo en wehwehkihla anahnepen kasalehda wahu oh kadek ong aramas ni ahnsou me e pahn kin kalohk ong irail duwen Koht oh sapwellime kupwur kan.

◼ Tohnsukuhl kan kak doadoahngki brochure me oaralap koasoia Jehovah’s Witnesses​—Who Are They? What Do They Believe? pwehn kak sewese kompoakparail kan oh tohn arail peneinei kan en wehwehki dahme kitail kin wia oh kamehlele sang Paipel.

Pali 10: Kaiahne Tohnsukuhl akan nan Kalohk en Ihmw-lel-Ihmw

Ni ahnsou me elder kan koasoanehdi me aramas emen me kin onop Paipel kakehr iang kalohk nin duwen sounkalohk me saikinte papidais, aramaso kak tepida iang mwomwohdiso kalohk ihmw-lel-ihmw.​—km 6/05 pali 1.

Sawaspene Kaunopada ong Kalohk

◼ Kasalehiong tohnsukuhl me wiahla sounkalohk kapw iawasa e kak diar padahk kan me e kak doadoahngki nan kalohk.

◼ Sewese ih en pilada padahk mengei me pahn pweida mwahu nan amwail wasahn kalohk.

◼ Kangoange ih en doadoahngki iren Paipel kan nan kalohk.

◼ E pahn mwahu en iang ih praktis dahme e pahn nda nan kalohk. Sewese ih en esehla dahme e pahn nda ni ahnsou me aramas akan pahn nda mehkot de sapeng peidek kan me kitail kin wia ong irail.

Sawaspene nan Kalohk

◼ Mweidohng tohnsukuhl me wiahla sounkalohk kapw en kilang ahmw pahn doadoahngki padahk me kumwa kaunopada.

◼ Medemedewe mwahu duwen irair oh koahiek en tohnsukuhlo. Ekei pak, e pahn mwahu ma sounkalohk kapwo pahn wia ekiste padahko.

◼ Sewese sounkalohk kapwo en koasoanehdi ah koasoandi kan pwehn kak iang kalohk kaukaule.

Pali 11: Sewese Tohnsukuhl akan me Wiahla Sounkalohk Kapw en Pwurehng Pwurala Rehn Aramas akan (Return Visit)

Kaunopada ohng wia return visit kak wiawi ni ahnsou me e pahn tepin tuhwong tohnihmwo. Kangoange sounkalohk kapwo en kasalehda a nsenohki aramas akan me e kin tuhwong. Ekis ekis kaiahneda sounkalohk kapwo en kin wia peidek kan ong tohnihmw kan me e kin padahk ong pwe irail en kak kasalehda arail madamadau kan, oh rong mwahu ahnsou me irail pahn koasoi, oh tamataman dahme irail kin pwunodki.​—km 7/05 pali 1.

Kaunopada Pwehn Pwurehng Pwurala

◼ Kousapahlih tepin ara tuhpeneo, oh kasalehiong sounkalohk kapwo iaduwen a pahn pilada ehu ire me pahn sair mohngiong en tohnihmwo.

◼ Kumwa kaunopada ehu kisin padahk pwe en kak doadoahngki iren Paipel ehu oh pil wadek ehu parakrap nan brochure.

◼ Kaunopada peidek ehu me e kak kihda ni imwin ah padahko.

Nantihong Pwurepwurehng Pwurala

◼ Kangoange sounkalohk kapwo en pwurehng pwurala rehn aramas akan koaros me kin perenki rong.

◼ Sewese sounkalohk kapwo en nantihong tuhwong aramas akan me sohte kalap mihmi ni imwarail kan.

◼ Padahkiong sounkalohk kapwo iaduwen e pahn koasoanehdi rehn tohnihmwo ahnsou pwehn pwurehng pwurala reh, oh sewese ih en wehwehki duwen kesempwalpen kapwaiada ah inou en pwurehng pwurala ahnsou me e koasoanehdi.

Pali 12: Sewese Tohnsukuhl akan me Wiahla Sounkalohk Kapw en Tepida oh Wia Onop en Paipel Rehn Aramas akan

E kesempwal ahmw kin kahlemengih Sises ni ahmw wia mehn kahlemeng mwahu nan pein ahmw doadoahk en kalohk. Ni ahnsou me noumw tohnsukuhlo pahn kilang ahmw mehn kahlemeng mwahu nan kalohk, e pahn wehwehki me atail mehn akadei ni ahnsou me kitail kin pwurehng pwurala rehn aramas iei en tepiada onop Paipel rehrail.​—km 8/05 pali 1.

Tepiada Onop Paipel Rehn Aramas akan

◼ Kawehwe ong ih me ni ahnsou me kitail kin tepiada onop Paipel rehn tohnihmwo, e sohte anahne kawehwe ni oaritik duwen koasoandi en onop.

◼ Pali laud en ahnsou, e pahn keieu mwahu en kamwomwada koasoandi en onop ni ahmw pahn wia parakrap ehu de riau sang brochure de pwuhk me ke pahn onop rehn tohnihmwo.

◼ Kousapahl oh praktis padahk kan me kitail kin doadoahngki ong tepiada onop en Paipel rehn aramas akan.​—km 8/05 pali 8; km 1/02 pali 6.

Kaiahne Sounkalohk Kapw kan en Wiahla Sounpadahk kan

◼ Kangoange tohnsukuhl kan en iang Theocratic Ministry Sukuhl.

◼ Koasoanehdi sounkalohk kapw kan en iang uhk kohla rehn ahmw Paipel Study teikan pwe irail en kak koasoi ekis oh doadoahngki dahme irail sukuhliki.