Pali 6: Wia Onop en Paipel Rehn Aramas akan Ni Ahl me Pahn Sewese Irail en Kekeirada Mwahu

Dahme Kitail Kak Wia Ni Ahnsou me Tohnsukuhlo Pahn Wia Peidek

¹ Ni ahnsou me emen kin kaukaule onop Paipel wihk koaros, pali laud en ahnsou e kin mwahu en koasoia duwen oaralap kan nan Paipel ni ahl me soandi mwahu​—⁠met pahn mwahu sang lusulus seli sang ehu oaralap ong pil ehu. Met pahn sewese tohnsukuhlo en wiahda poahsoan en loalokong pwung oh kekeirada ni pali ngehn. (Kolose 1:​9, 10) Ahpw, pak tohto tohnsukuhl kan kin kihda peidek kan me pid duwen soangsoangen oaralap kan ni ahnsou me onop wiwiawi. Iaduwen ahmw pahn kak sapeng peidek pwukat?

² Doadoahngki Ahmw Loalokong: Ke kak sapeng peidek kan me pidada dahme kumwa onopki ahnsowohte. Ma peidek ehu pahn pasapengla mwuhr nan amwa onopki pwuhk de brochure, e pahn mwahu en ndaiong tohnsukuhlo me ah peidek pahn pasapengla mwuhr. Ahpw, ma ah peidek pid duwen oaralap me sohte mihmi nan amwa onop rahno de ke anahne research pwehn pasapengla ah peidek ni ahl me pwung, e pahn mwahu en ndaiong tohnsukuhlo me ke pahn sapengla ah peidek mwurin amwa onop de pil ehu rahn. Ekei sounkalohk kan diarada me ma re pahn ntingihdi peideko mwadang, met kin kamehlelehiong tohnsukuhlo me ke pahn tamataman ah peideko oh ke uhdahn pahn sapeng ah peideko mwuhr oh ke kasalehda me ke men kumwa en wiahte wasao me koasoanehdi ong amwa onop rahno.

³ Nan pwuhk kan oh brochure kan me kitail kin onop rehn aramas akan, re kin kasalehdahte ekis duwen padahk kan en Paipel. Dahme ke kak wia ma tohnsukuhlo kin apwaliki kamehlele padahk ieu de e kin kamehlelehte padahk likamw ieu? E pahn mwahu en kasalehiong ih duwen pil ehu pwuhk de brochure me kin koasoia dahme Paipel mahsanih duwen padahko ni oaretik. Ma tohnsukuhl saikinte kak kamehlele padahk mehlelo ni unsek, mwein e pahn mwahu en ieremen koasoia oaralapo ong ekis ahnsou oh mweidohng tohnihmwo en medemedewe mahs dahme kumwa koasoiapenehr oh doulahte nan pwuhko de brochure me kumwa kin onopki. (Sohn 16:12) Ni ah pahn kalaudehla ah sukuhliki Paipel oh kekeirada ni pali ngehn, e pahn kakete wehwehkihla duwen padahko me e apwaliki kamehlele.

⁴ Ken Ahneki Lamalam Aktikitik: Ma ke sehse iaduwen ke pahn sapeng ah peideko, ken dehr lemehda ken ndahte dahme ke lemeleme me pwung​—⁠pwe ke kakete sapwungala ni ahmw pahn sapeng ah peideko. (2 Tim. 2:​15; 1 Pit. 4:​11) Ndaiongih me ke pahn research duwen ah peideko oh pwurodo oh sapeng ah peidek. Ke kak pil doadoahngki ahnsou mwahu wet en sewese tohnsukuhlo en sukuhliki ia mwomwen e pahn kak wia pein ah research. Ekis ekis kasalehiong ih duwen pwuhk, brochure oh makisihn kan sang sapwellimen Siohwa pwihn me pahn kak sewese ih en research. Ni ahl wet, ehu rahn e kak rapahki pasapengpen pein ah peidek kan.​—Wiewia 17:11.

Sewese Irail Ni Ahmw Pahn Koasoanehdi Pil Emen en Kalohk ong Irail

¹ Ni atail kin kalohki Rongamwahu, kitail kin tuhwong aramas akan me mihmi likin atail wasahn kalohk de irail me kin lokaiahki lokaia me kitail sehse, iangahki irail me kin lokaiahki peh kan. Pil ekei aramas me kitail kin perenki koasoiong irail duwen Paipel mwein kin soulahng likin atail wasahn kalohk. Iaduwen kitail kak koasoanehdi pil emen en kalohk ong irail? Ni atail kin doadoahngki doaropwe me ede “Please Follow Up (S-43) form.”

² Aramas kin kalap rong kanahieng Rongamwahu ma sounkalohko kin doadoahngki pein arail lokaia. (Wiewia 22:​1, 2) Kahrehda, pali laud en ahnsou, ma kitail pahn tuhwong emen me kin lokaiahki lokaia ieu me kitail sehse, kitail anahne audehda doaropweo mehnda ma aramaso sohte mwomwen perenki rong duwen Wehio. Ahpw, ma mie sounkalohk kan me kin kalohk rehn aramas tohto me kin doadoahngki lokaiahn aramaso, ke sohte anahne audehda doaropweo​—⁠ahpw ihte ma aramaso perenki rong, e pahn mwahu en audehda doaropweo.

³ Audehda Doaropweo: Ntingihdi eden aramaso, iawasa e kin mihmi ie, oh nah nempehn telephone. Kasalehda ia uwen aramaso eh perenki rong, ahnsou dah me mwahu ong aramaso, soangen pwuhk, brochure, makisihn de tract dah me ke kihong ih, oh mehnia lokaia me e kin keieu wehwehki. Mwurin ahmw audehda doaropweo, ke kak mwadang kihong Secretary en Mwomwohdiso, me pahn uhd kihong pil ehu mwomwohdiso de pwihn en sounkalohk kan me pahn kak sewese aramaso.

⁴ Doaropweo Pahn Kohwong Mwomwohdiso de Pwihn en Sounkalohk: Ma Secretary sehse mehnia mwomwohdiso de pwihn en sounkalohk me doaropweo pahn kohwong de e sehse arail address, e kak telephone “Territory Desk” nan Branch Ohpis pwehn idek rehrail.

⁵ Ni ahnsou me mwomwohdiso de pwihn en sounkalohk kan pahn ale “Please Follow Up” form, e pahn mwahu ma re pahn mwadang tuhwong aramaso. Ni atail pwerisek wia atail pwukoa, kitail kak likih me Siohwa pahn ritingada mohngiong en aramas akan me “konehng ale mour soutuk.”​—Wiewia 13:⁠48.