Sewese Irail Ni Ahmw Pahn Koasoanehdi Pil Emen en Kalohk ong Irail
1 Ni atail kin kalohki Rongamwahu, kitail kin tuhwong aramas akan me mihmi likin atail wasahn kalohk de irail me kin lokaiahki lokaia me kitail sehse, iangahki irail me kin lokaiahki peh kan. Pil ekei aramas me kitail kin perenki koasoiong irail duwen Paipel mwein kin soulahng likin atail wasahn kalohk. Iaduwen kitail kak koasoanehdi pil emen en kalohk ong irail? Ni atail kin doadoahngki doaropwe me ede “Please Follow Up (S-43) form.”
2 Aramas kin kalap rong kanahieng Rongamwahu ma sounkalohko kin doadoahngki pein arail lokaia. (Wiewia 22:1, 2) Kahrehda, pali laud en ahnsou, ma kitail pahn tuhwong emen me kin lokaiahki lokaia ieu me kitail sehse, kitail anahne audehda doaropweo mehnda ma aramaso sohte mwomwen perenki rong duwen Wehio. Ahpw, ma mie sounkalohk kan me kin kalohk rehn aramas tohto me kin doadoahngki lokaiahn aramaso, ke sohte anahne audehda doaropweo—ahpw ihte ma aramaso perenki rong, e pahn mwahu en audehda doaropweo.
3 Audehda Doaropweo: Ntingihdi eden aramaso, iawasa e kin mihmi ie, oh nah nempehn telephone. Kasalehda ia uwen aramaso eh perenki rong, ahnsou dah me mwahu ong aramaso, soangen pwuhk, brochure, makisihn de tract dah me ke kihong ih, oh mehnia lokaia me e kin keieu wehwehki. Mwurin ahmw audehda doaropweo, ke kak mwadang kihong Secretary en Mwomwohdiso, me pahn uhd kihong pil ehu mwomwohdiso de pwihn en sounkalohk kan me pahn kak sewese aramaso.
4 Doaropweo Pahn Kohwong Mwomwohdiso de Pwihn en Sounkalohk: Ma Secretary sehse mehnia mwomwohdiso de pwihn en sounkalohk me doaropweo pahn kohwong de e sehse arail address, e kak telephone “Territory Desk” nan Branch Ohpis pwehn idek rehrail.
5 Ni ahnsou me mwomwohdiso de pwihn en sounkalohk kan pahn ale “Please Follow Up” form, e pahn mwahu ma re pahn mwadang tuhwong aramaso. Ni atail pwerisek wia atail pwukoa, kitail kak likih me Siohwa pahn ritingada mohngiong en aramas akan me “konehng ale mour soutuk.”—Wiewia 13:48.