Mwohn Kalohk, Ele Ke Anahne Rapahki Aramas me Kin Lokaiahki Ehu Lokaia Tohrohr
1. Dahme kahrehda wasahn kalohk kan nan wasa kan me doadoahngki lokaia kan me wekpeseng kin koasoandi ni ehuehu pwihn me lokaiahki ehu lokaia?
1 Ni Pendekos pahr 33, mwurin ar alehdi sapwellimen Koht manaman, sapwellimen Sises tohnpadahk kan “tapihada lokolokaiahki ekei lokaia tohrohr” ong irail ko me kohdo sang wasa doh nan sampah. (Wiewia 2:4) Met kahrehda aramas 3,000 papidaisla. Pali laud en aramas ko me kohdo wasao pil kin doadoahngkipene ehu lokaia, mwein lokaiahn Ipru de Krihk. Ahpw Siohwa ketin pilada me kalohkpen rongamwahu en Wehio en pil wiawi ni pein arail lokaia. Ehu kahrepe iei pwehki aramas ar kin kalapw mwadang mwekidki rongamwahwo ni ahnsou me re rong ni pein arail lokaia. Ihme kahrehda rahnwet, nan wasa me aramas akan kin doadoahngki lokaia kan me wekpeseng, wasahn kalohk kan kin koasoansoandi ni ehuehu pwihn me lokaiahki ehu lokaia. (Menlau kilang pwuhken Organized, pali 107, par. 2-3, lokaiahn wai) Pwihn kan me doadoahngki lokaia tohrohr sohte kin alehda wasahn kalohk, ahpw re kin kalohk ong irail kan me doadoahngki lokaiahn mwomwohdiso me kin sewese arail pwihno oh mwomwohdiso teikan wasao.
2. (a) Dahkot doadoahk en repen aramas, oh ia wasa e anahne wiawi? (b) Ia duwen mwomwohdiso kan ar kin sawaspene nan wasa kan me aramas akan kin doadoahngki lokaia kan me wekpeseng? (c) Dahme kitail anahne wia ma kitail diar emen me men rong oh kin doadoahngki ehu lokaia tohrohr?
2 Ma ke kousoan wasa me aramas koaros kin lokaiahkihte ehu lokaia, ke kak kalohk ihmw lel ihmw. Ahpw omw irair kak weksang met ma ke kousoan wasa me aramas akan kin doadoahngki lokaia kan me wekpeseng. Mwomwohdiso teikan me doadoahngki lokaia tohrohr kak pil kalohk wasaohte me ke kin kalohk. Mehnda ma mwomwohdiso teikan kihong uhk ire kan me pid aramas akan me kin lokaiahki omw lokaia, omw pwihn de mwomwohdiso me keieu pwukoahki en diar aramas akan me ke kak kalohk ong. (Menlau kilang koakon “Sawaspene.”) Ia duwen doadoahk en repen aramas eh kak wiawi?
3. Pwe mwomwohdiso de pwihn ehu en rapahki aramas ehu wasa, dahme re anahne ese, oh ia uwen laud en ahnsou re anahn en wia met?
3 Koasoanehdi Doadoahk en Repen Aramas: Uwen laud en ahnsou me ke anahne ong doadoahk en repen aramas nan wasa me aramas akan kin doadoahngki lokaia kan me wekpeseng kin poahsoankihda irair en ehuehu wasa. Karasepe, aramas depe wasao kin doadoahngkipene ehu lokaia? Sounkalohk depe wasao? Ehu mwomwohdiso de pwihn ehu kin kolokol adres depe? Mwomwohdisou sohte anahne rapahki aramas nan wasahn kousoan koaros nan arail wasahn kalohk, ahpw mwein re kak pilada en repente wasa me aramas dir kin kousoan ie oh pil wasa kan me karanih wasa ko. Pwe ahnsou mwahu en kohwong aramas tohto ni uwen me kak ren likweriong Siohwa, e kin kesempwal en ahneki koasoandi mwahu ehu ong rapahki aramas—Rom 10:13, 14.
4. (a) Ia duwen doadoahk en roporop wet eh kak koasoansoandi? (b) Ia ekei ahl kan en diarada aramas akan me iang lokaiahki omw lokaia?
4 Pwehn katikala pwurehng rapahki wasa kan me rompe wiawiher, pwihn en elder kan, ahpw keieu sounapwalih en kalohk pahn koasoanehdi oh tehk doadoahk wet. (1 Kor. 9:26) Emen brother me wia elder de sounsawas men me pwihn en elder kan sang mwomwohdiso de pwihn me kin doadoahngki lokaia tohrohr wet pilada pahn tiengla mwowe wia repen wet. Tohto mwomwohdiso oh pwihn kan kin ahneki koasoandi en tapihada doadoahk en roporop wet, ele re kin doadoahngki pwuhk en delepwohn de Internet pwehn kihpene ahd akan me tohn pwihn wet kalapw doadoahngki. Eri, repen wet kak wiawi ni doadoahngki delepwohn de pwarek wasao pwehn koasoanehdi mehnia adres pahn iang wia wasahn kalohk. Ma e konehng en wiawi, pwihn en elder kan en mwomwohdiso wet kak koasoanehdi tohnmwomwohdiso pwon en ekei pak iang wia doadoahk en repen wet.—Menlau kilang koakon “Wiepen Diarada Irail me Kin Lokaiahki Atail Lokaia.”
5. (a) Dahme sounkalohk kan kak wia nan doadoahk en repen aramas? (b) Dahme kitail kak ndaiong aramas akan ni atail wia doadoahk en roporop?
5 Ehuehu ahnsou me kitail iang doadoahk en roporop wet, kitail anahne uhdahn ese kahrepeo. Pwehki doadoahk wet eh wia kisehn doadoahk en kalohk, kitail anahne likouda nin duwen sounkalohk kan. Me tohto kin diarada me arail kin sosohng wiepen arail koasoi kan ni ahnsou me re wia doadoahk en roporop, met kin sewese irail en perenki dahme re wiewia oh kalaudehla arail koahiek en doadoahngki lokaiao. Kitail kak ripohtki ahnsou me kitail wia doadoahk en roporop wet, ahpw kaidehn ahnsou me kitail kaukaunop map en wasahn kalohk oh ntingihda ire kan me pid aramas akan nan wasahn kalohko. Ni ahnsou me kitail diarada emen me doadoahngki lokaia en mwomwohdiso de pwihn me kitail iang, kitail en nantihong kalohkohng. Mwuhr kitail nek padahkihong sounapwalih en kalohk de emen me e pilada en sawas pwe ire wet en kak kapatapatong nan doaropwehn wasahn kalohk. Met anahne wiawi mehnda ma aramaso men rong de soh. Mendahki doadoahk en roporop kin kesempwal, kitail anahne toupahrek oh iang sawas nan soangsoangen doadoahk en kalohk koaros.—Menlau kilang koakon “Dahme Kitail Pahn Nda Nan Doadoahk en Repen Aramas.”
6. Dahme kahrehda e kin apwal en rapahki aramas salengepon oh lohteng kan?
6 Rapahki me Salengepon oh Lohteng kan: E kin apwal en rapahki aramas salengepon oh lohteng kan, oh e pil anahne nanti laud oh kanengamah. Kitail sohte kak diarada aramas salengepon oh lohteng men sang atail pahn esehte edeo, mwomwen paliwere de eh likou. Patehng met, tohn eh peneinei oh kompoakepah kan kakete men pere oh ele pahn pweiek en padahkihong sounkalohk kan duwen ihs ih. Kaweid en rapahki soangen aramas pwukat me irekidi mwuhr ele pahn pil sawas ni ahnsou me kitail kin rapahki irail kan me kin lokaiahki ehu lokaia tohrohr.
7. (a) Dahme ke kak idek nan wasahn kousoan kan ni omw kin rapahki emen me salengepon? (b) Ia duwen atail kak sewese tohnihmwo en dehr perkin kitail?
7 Mwomwohdiso de pwihn me kin apwalih me lohteng oh salengepon kan kin pweida sang ni arail kin idekseli nan wasahn kousoan kan ahnsou me re kin rapahki aramas salengepon. Mwein tohnihmwo kin kilang mehn mpe men, de ienge tohndoadoahk, de ienge tohnsukuhl me kin lokaiahki peh kan. Mwein e tehkada kilel ehu pohn ahlo me kasalehda me mie seri salengepon kan kin mihseli wasao, de mwein mie eh peneinei me salengepon. Tamataman me ekei kin perki kahrepen omw tuhwong irail. Ahpw, ke kak sewesehki tohnihmwo en dehr ahneki per wet sang ni omw pahn kasalehda kadek oh mwadang kawehwehda ni mehlel oh wahu kahrepen omw kohla tuhwong. Ekei kin pweida ni ar pahn kasalehda Paipelo de DVD teikan ahnsou me re kin idek rehn tohnihmwo ma re ese emen me salengepon. Eri re pil kin koasoia me re men ehukihong aramaso duwen koapworopwor sang nan Paipel. Ma tohnihmwo pweiek en koasoia duwen aramaso, ele e pahn men ale ire kan me pid omw wasahn kousoan, de doaropwehn luhk ong mihting kan pwehn kihong eh peneinei de kompoakepah me salengepon.
8. Ia duwen mwomwohdiso keren ehu eh kak sewese mwomwohdiso me kin apwalih me lohteng oh salengepon kan?
8 Pak ehu de riau nan sounpar ehu, mwomwohdiso me kin apwalih me lohteng de salengepon kan ele kin luke ehu mwomwohdiso keren me doadoahngki ehu lokaia tohrohr pwehn sewese arail doadoahk en repen nan ehu arail kahnimw laud nan arail wasahn kalohk laudo. Padahk en tuhpenehn kalohko kak iangahki kaweid kan ong doadoahk en repen oh ehu kamwomwada. Ehuehu pwihn en sidohsa kak wahda emen sang mwomwohdiso me kin apwalih me lohteng oh salengepon kan oh ehu map me kasalehda oaritik en wasa ehu ong arail pahn repen.
9. Ia duwen atail kak wia doadoahk en repen wasa me aramas salengepon kan kin pokonpene pwe ren tuhpene, mwemweit de ale sawas?
9 Doadoahk en repen pil kak wiawi wasa me aramas salengepon kan kin pokonpene ie pwe ren tuhpene oh mwadong, de ale sawas kan me arail wasahn kousoan kin kihda. Sounkalohk kan anahne likawih dahme pahn konehng soangen irairo. Mwein e pahn keieu mwahu en koasoiong emen de riemen me mi wasao, a en dehr wiahkintehieu padahk ong pwihno pwon. Ma koasoio pweida, mwein ire kan me anahn pwehn pwurehng pwurala kak alahldi.
10. Ia duwen sounkalohk kan ar kak wia doadoahk en repen nan wasahn pesines kan?
10 Pil ehu ahl iei en kaunopada map kan me kasalehda wasahn pesines kan pwehn pwurala wasao mwuhr ni ahnsou me konehng. Ehu map kak kasalehda gas station kan. A ehu map kak kasalehda wasahn lopwolopw kan, ihmwen mwenge kan, hotel kan de soangen wasahn pesines teikan. Ma ehuehu map kin kasalehda wasahn pesines kan me duwepenehte, sounkalohk kan kak doadoahngki soangen wiepeohte oh re kak koahiekla. Karasepe, pwehki hotel kan kin pil sewese me salengepon kan, mwein kitail kak kawehwehiong tohndoadoahk en hotelo ni mwotomwot duwen atail doadoahk oh song kihdi dahme kitail kaunopadahr me pahn iangahki ehu DVD oh luhk en towehda mihting ong me salengepon kan. Nan ekei pesines kan, kitail kak idekte ma mie soangen aramas pwukat kin doadoahk mwo de ma mie me kin kalapw kohla ni hotelo. Ma mie wasahn sukuhl ong soangen aramas pwukat nan wasahn kalohk, kitail kak kihdi ekei DVD en neitail pwuhk kan en kowohng nan arail library.
11. Dahme kahrehda doadoahk en repen kin kesempwal ong doadoahk en kalohk?
11 Doadoahk Kesempwal Ehu: Diarada tohnihmw kan me lokaiahki omw lokaia kin anahne doadoahk laud oh ahnsou. Patehng met, ekei wasahn kousoan kak mwadangete wekila ni aramas akan ar kin keseudo mihla mwo de kohkohsang, kahrehda ire kapw kan sohte kin mwadang kileldi nan map de doaropwehn wasahn kalohk. Ahpw tohtohla wasa kan me anahne doadoahk en repen wet, kahrehda e wia doadoahk kesempwal ehu ong doadoahk en kalohk. Siohwa me ketikihong atail pwukoahn kalohk, sohte kin ketin lipilipilki aramas. (Wiewia 10:34) E “ketin kupwurki aramas koaros en ale komourparail oh marainkihla me mehlel.” (1 Tim. 2:3, 4) Ihme kahrehda, kitail men iang Siohwa oh iengetail tohnkaudok kan nan doadoahk en rapahki soangen aramas koaros me kapehdirail kin peik oh mwakelekel.—Luk 8:15.
[Koakon nan pali 5]
Sawaspene
Ma mwomwohdiso de pwihno pahn men sewese rapahki me kin doadoahngki arail lokaia pwe ren kalohk ong, sounapwalih en kalohk kak kairehki elder kan en mwomwohdiso me kin doadoahngki ehu lokaia tohrohr me karanih irail. E pahn keieu mwahu en kairehki mwomwohdiso kante me keren de ma pali laud en tohnwasao kin doadoahngki lokaiao. Mwomwohdiso pwukat kak padahkihong sounkalohk kan me ma re diarada emen me doadoahngki lokaiao, re anahne ntingihedi adreso oh kihong sounapwalih en kalohk en uhd kalelehki mwomwohdiso de pwihn me peksawaso. Sounapwalih en kalohk kan kak wiahda ehu koasoandi me koaros pwungkipene pwehn kak lelohng nan wasahn kalohk pwukat oh kahluwa me perenki rong ong mwomwohdiso de pwihn me re iang.
Ma sounkalohk kan diarada emen me kin doadoahngki lokaia tohrohr me uhdahn perenki rong (de emen me salengepon), re anahne mwadang audehda doaropwehn pwurehng pwurala (Please Follow Up S-43) oh kihong sekteri en mwomwohdiso. Met pahn kahrehiong menet en mwadang alehdi sawas en esehla Koht.—Menlau kilang Atail Doadoahk en Wehio November, 2009 pali 4.
[Koakon nan pali 6]
Wiepen Diarada Irail me Kin Lokaiahki Atail Lokaia
• Idek rehn meteikan me duwehte tohnsukuhl en Paipel kan, tohn peneinei, oh iengetail tohndoadoahk.
• Doadoahngki pwuhken delepwohn pwehn diarada ahd kan me ehu lokaia kin kalapw doadoahngki. Mie ehu soangen pwuhk me kak nehkpeseng eden aramas akan ong nan wasa me re kousoan ie me mi nan Internet de nan ohpis en delepwohn.
• Kanahieng mwomwen omw pahn peki sawas sang wasa kan me kin kihda sawas ong wehipokon me duwehte library kan, ohpis en koperment kan oh wasahn sukuhl kan.
• Tehk pakair kan nan doaropwehn rohng kan me pid soahng kan me irail kan me doadoahngki ehu lokaia tohrohr pahn wia.
• Kohla wasahn pesines kan me kin kihda sawas ong irail kan me kin doadoahngki ehu lokaia tohrohr.
• Ma ke alehdi mweimwei sang irail me ahneki manaman, wiahda tehpel en kihla pwuhk kan ni wasahn pesines kan, wasa me tohnsukuhl kan kin kohpene ie nan wasahn sukuhl laud kan, de wasa me irail me kin lokaiahki ehu lokaia tohrohr kin kalapw kohla ale sawas ong arail pahn seiloak.
• Ma ke ale mweimwei sang palien kosonned en omw wasa, ke kak pwainda pwuhken eden aramas oh arail adres de computer prokram me mweidohng uhk ken rapahki eden aramas akan oh wasa re kin kousoan ie nan Internet, wasa me mweimweiong wehipokon.
[Koakon nan pali 7]
Dahme Kitail Pahn Nda Nan Doadoahk en Repen Aramas
Omw pahn kin kadek oh mehlel ni omw tuhwong aramas, oh pil kasalehda ni sansal kahrepen omw tuhwong, met pahn kahrehiong ih en dehr perkin uhk. E kin kalapw sawas en keieu kasalehda pwuhk kan ni lokaia me e doadoahngki.
Mwurin omw rahnmwahu, ele ke kak nda: “Se raparapahki irail me kin lokaiahki ______ pwe sen kak ehukihong irail koapworopwor sang nan Paipel. Ke ese ihs me se kak koasoiong?”
Ni omw pahn rapahki aramas salengepon kan, ele ke kak nda: “Kaselehlie maing. Ke kak mweidohng ie en kasalehwei mehkot? [Doadoahngki DVD player me ke kak weuwa, oh play DVD me kasalehda ehu iren Paipel sang nan New World Translation.] Met iei iren Paipel en American Sign Language. Patehng iren Paipel wet, mie ekei video kan me sohte isepe me wiawihda pwehn sewese aramas salengepon kan ren ahneki nanpwungmwahu rehn Koht. Ke ese ihs me salengepon de sohte kak rong mwahu oh kin lokaiahki peh kan?” Ma tohnihmwo sohte kak tamanda emen, e kin mwahu en karasahda wasa kan me mwein e kilangada soangen aramas menet duwehte wasahn doadoahk, wasahn sukuhl de rehn mehn mpe kan.