Sewese Irail me Kin Doadoahngki Ehu Lokaia Tohrohr

1. Ahnsou mwahu dah me mie ni atail kin kalohk nan atail wasahn kalohk?

¹ Sises Krais ketin kohpadahr me rongamwahwo pahn lohkseli wasa koaros nin sampah “pwe kadehde en mie ong aramas koaros.” Koaros me kin iang doadoahk en kalohk kin pohnese uwen kesempwal en mahsen pwukat. (Mad. 24:14; 28:19, 20) Ni atail kin kalohk oh katohnpadahk, kitail kak diar aramas me kohsang soangsoangen wasa kan me kin lokaiahki ehu lokaia tohrohr. Irail pwukat pil warohng rong rongamwahu en Wehio oh kesihnenda teng nan padahk mehlel mwohn rahnen Siohwa eh pahn leledo. (Mal. 3:18) Ia duwen atail kak sewese irail kan me kin lokaiahki ehu lokaia tohrohr nan atail wasahn kalohk?

2. Ia duwen atail kin kahlemengih Siohwa ni atail kin koasoiong meteikan me kin lokaiahki ehu lokaia tohrohr?

² Kasalehda Sapwellimen Siohwa Madamadau: Pwehn kasalehda Sapwellimen Siohwa limpoak ong koaros nan atail wasahn kalohk, kitail anahne uhdahn inengieng sewese aramas akan en esehla padahk mehlel duwen Siohwa Koht mendahki soangen lokaia dah me re kin lokaiahki. (Mel. 83:18; Wiewia 10:34, 35) Pali laud en ahnsou kitail kin sewese irail kan me kin lokaiahki lokaia ehu me atail mwomwohdiso kin doadoahngki. Ahpw kitail pil anahne tehk anahn akan en irail me kin lokaiahki ehu lokaia tohrohr oh rapahki soangen ahl akan pwehn ehukihong irail rongamwahu en Wehin Koht. Atail pohnsehsehla irail kan me kin lokaiahki ehu lokaia tohrohr sohte pahn pahrekiong kupwuren Siohwa me pid en kalohk ong aramas koaros. Eri, ia duwen atail kak sewese irail me sohte kin lokaiahki atail lokaia?

3. Mehnia pwuhk me wiawihda pwehn sewese kitail? Ia duwen atail kak kaunopada pwehn doadoahngki?

³ Doadoahngki Rongamwahu ong Aramas en Wehi Koaros (Good News for People of All Nations): Pwuhk wet wiawihda ong ahnsou me kitail kin tuhwong irail kan me kin lokaiahki ehu lokaia tohrohr. Wahda pwuhk wet ahnsou koaros, esehla audepe kan, oh kaunopada pwehn doadoahngki. Kilelehdi nan pwuhko soangen lokaia me aramas akan me ke tuhwong kin doadoahngki. Ma mie sawaspen Paipel kan ni soangen lokaia pwukat, e pahn mwahu en ale ekei pwuhk pwukat pwehn kihong aramas mwurin omw doadoahngki pwuhken Rongamwahu.

4. Ia duwen atail kak doadoahngki pwuhken Rongamwahu nan kalohk?

⁴ Ma ke tuhwong emen me kin lokaiahki ehu lokaia tohrohr oh ke sohte ese mehnia lokaia me e kin lokaiahki, kasalehiong ih kilin pwuhko. Pahkalahng map me mi loale, idih pein kowe oh sahpw me ke mi loale, oh kasalehda me ke men ese ia wasa e kohsang ie oh mehnia lokaia me e kin lokaiahki. Ni omw esehier eh lokaia, kilang wasa me audepen pwuhko mie, rapahki pali me konehng, kasalehiong ih wasa me nda “Menlau Wadek Mehn Kair Wet,” oh kasalehiong ih me ke men ih en wadek wasao. Mwurin eh wadekehr, kihong ih ehu doaropwe ni eh lokaia de kasalehda wasa me nda “I pahn perenki wahdo rehmw noumw pwuhk me mih ni ahmw lokaia.” Kowe eri kasalehiong ih wasa me nda “edei” oh ndaiong edomw ni sansal. Mwuri, kasalehda wasa me nda “edomw” oh awih ih en sapeng. Koasoanehdi en pwurehng pwurala reh.

5. Dahme kitail anahne wia pwehn sewese irail me perenki rong ahpw kin lokaiahki ehu lokaia tohrohr?

⁵ Koasoandi en Pwurehng Pwurala: Kitail anahne nantihong pwurala rehn irail kan me perenki rong rongamwahu en Wehio mendahki soangen lokaia dah me re kin doadoahngki. Ma kitail kilang me aramaso men ese duwen Koht oh Paipel, kitail anahne audehda doaropwe en Menlau Pwurehng Pwurala (Please Follow Up, S-43) oh mwadang kihong sekteri en mwomwohdiso pwehn pekederlahng ohpis en Sounkadehdehn Siohwa kan pwe emen me ese eh lokaia en kak kohla reh. Ohpiso pahn kadarala doaropweo ong pwihn me kin doadoahngki eh lokaia. Ni ahnsou me pwihno alehdi doaropweo, re pahn mwadang tuhwong aramaso. Sekteri me pahn alehdi doaropwe wet pahn kak kihong sounapwalih en kalohk ehu copy en doaropweo pwe en ese duwen met. Kitail pahn doadoahngki doaropwe wet ihte ma emen kasalehda me e uhdahn perenki rong.

6. Ia atail pwukoa ma kitail tuhwong emen me perenki rong ahpw kin lokaiahki ehu lokaia tohrohr?

⁶ Aramaso pahn anahne awih ekis mwurin doaropwehn S-43 e pekederla lao lel ahnsou me emen sounkalohk me ese eh lokaia kak tuhwong ih. Pwehn sewese aramaso, sounkalohk me kihong doaropweo kak pousehlahte sewese aramaso lao emen me ese eh lokaia kak kohla reh. Ekei ahnsou, onop en Paipel kakehr wiawi. Ahpw erein ahnsowo, ia duwen sounkalohko kak ale pwuhk kan ni en aramaso eh lokaia?

7. Koasoandi dahieu me mie pwehn kak ale pwuhk kan ni lokaia kan en irail me kitail tuhwong?

⁷ Pwuhk kan ni Lokaia Teikan: E sohte konehng mwomwohdiso en nekidala pwuhk tohto ni lokaia teikan. Ahpw, ma sounapwalih en kalohk kilang me aramas akan me kin lokaiahki ehu lokaia tohrohr kin perenki rong oh wie tohtohla, e kak koasoanehdi en nekidala ekei pwuhk kan ni lokaia wet pwe sounkalohk kan en kak doadoahngki. Ma sohte pwuhk nan mwomwohdiso, e kak oaht. Pwuhk pwukat ele sohte pahn mwadang leledo. Kahrehda, mie sawas en kak wiahda copy kan sang nan Internet (www.watchtower.org). Mie pwuhk tohto ni lokaia epwiki kei me sounkalohk men de aramas me perenki rong kak kilang. Koasoandi wet pahn kak sewese irail kan me perenki rong oh kin lokaiahki ehu lokaia tohrohr.

8. Ia pwukoa en mwomwohdiso pwehn sewese irail me kin perenki rong oh lokaiahki ehu lokaia tohrohr?

⁸ Pwukoa en Mwomwohdiso: Nan ekei wasa, aramas me kin lokaiahki ehu lokaia tohrohr kin tohtohla ahpw sohte mie mwomwohdiso me kin doadoahngki arail lokaia. Ma ih duwen, kitail anahne luke irail me perenki rong ahpw lokaiahki ehu lokaia tohrohr en iang atail mihting kan. Atail kasamwo oh kasalehda nsenohki irail kak kamwakid irail en kaukaule iang mihting. Nin tapio, ele e pahn mie kahpwal en wekpeseng en lokaia oh tiahk. Ahpw, limpoak mehlel en Kristian en Sounkadehdehn Siohwa kan nan sampah pwon kak powehdi kahpwal wet. (Sohn 13:35) Ke ese lokaiahki ehu lokaia tohrohr? Ma ke ese oh perenki sewese aramas akan me kin lokaiahki lokaia me ke ese, menlau kehsehkin sekteri en omw mwomwohdiso pwe en kak kehsehki ohpis en Sounkadehdehn Siohwa kan. Met pahn kak sewese ohpiso ni arail rapahki sounkalohk men me kak sewese aramas kan me kin lokaiahki lokaia wet.

9. Iahd me kasukuhl en ehu lokaia ong sounkalohk kan kak wiawi? Ia duwen koasoandi wet eh pahn kak wiawi?

⁹ Koasoandi Duwen Ehu Lokaia: Ma ke kin sewese irail me kin lokaiahki ehu lokaia tohrohr, keieu mwahu en kangoange irail en tepida iang mwomwohdiso ehu me kin doadoahngki arail lokaia ma e keren. Ahpw ma met sohte kak wiawi, ekei sounkalohk kan kak pilada en sukuhlki ehu lokaia tohrohr pwehn kak sewese irail me perenki rong. Ma sohte mie mwomwohdiso me kin doadoahngki arail lokaia, ohpis en Sounkadehdehn Siohwa kan ele pahn kak koasoanehdi kasukuhl en ehu lokaia pwehki irail me kin lokaiahki lokaia wet kin wie tohtohla. Ma met pahn wiawi, ohpiso pahn kehsehkin mwomwohdiso kan nan wasao duwen anahn wet oh wiahda pakair me pid duwen kasukuhl wet. Irail me men iang kasukuhl wet anahne koasoanehdi en keseula nan pwihn de mwomwohdiso me kin doadoahngki lokaia wet pwehn sawas.

10. Ia duwen pwihn en ehu lokaia kak wiawihda?

¹⁰ Wiahda Pwihn Ehu: Ire pahieu me anahn pwehn wiahda pwihn en ehu lokaia tohrohr. (1) Mie aramas tohto me kin perenki rong oh lokaiahki ehu lokaia tohrohr. (2) Mie ekei sounkalohk kan me ese lokaia wet de suksukuhlki lokaia wet. (3) Mie emen elder de sounsawas me kak apwalih pwihno oh wia ehu mihting nan ehuehu wihk ni lokaia wet. (4) Pwihn en elder kan kin perenki sewese pwihn wet. Ma ire pahieu pwukat kak wiawi, pwihn en elder kan pahn ntinglahng ohpis en Sounkadehdehn Siohwa kan duwen ire kan me pid duwen pwihn wet oh peki ohpiso en pohnese me mwomwohdiso wet kin apwalih pwihn en lokaia wet. (Kilang pwuhk en Organized ni lokaiahn wai, pali 106-107.) Eldero de sounsawaso me kin apwalih de pwukoahki pwihn wet pahn adaneki “sounapwalih en pwihn” de “sounsawas en pwihn.”

11. Dahme kahrehda e wia kapai ehu en sewese irail kan me kin lokaiahki ehu lokaia tohrohr nan atail wasahn kalohk?

¹¹ Sewese irail kan me kin lokaiahki ehu lokaia tohrohr nan atail wasahn kalohk wia mehkot me inenen kesempwal nan doadoahk en kalohk en sampah pwon me atail Soun kahlemeng, Sises Krais ketin koasoanehdier. Kitail en ngoangki wia atail pwukoa oh kilang ia duwen Siohwa eh pahn ketin kamwakid wehi kan oh kahrehdo irail kan me e kupwurki. (Ak. 2:7) Ia uwen kaperen en wia uwen atail kak nan doadoahk wet! Kitail kapakapki me Siohwa pahn ketin kapaiada atail doadoahk en sewese irail kan me kin lokaiahki ehu lokaia tohrohr nan atail wasahn kalohk. Kitail en tamataman me Siohwa kak ketin sewese aramas sohte lipilipil soangen lokaia dah me re kin lokaiahki.—1 Kor. 3:6-9.