Kaunopada Mwahu Atail Padahk
1. Dahme kahrehda kitail anahne nantihong en sewese tohnsukuhlo en kalahnganki dahme e kin sukuhlki sang nan Paipel?
1 Ni ahnsou me kitail kin wia onop en Paipel, kitail anahne kaunopada mwahu pwehn kamwakid tohnsukuhlo en papah Siohwa. Kitail anahne nantihong en sewese tohnsukuhlo en kalahnganki dahme e kin sukuhlki sang nan Paipel. (Deud. 6:5; Lep. Pad. 4:23; 1 Kor. 9:26) Eri, ia duwen kitail kak wia met?
2. Ia duwen kapakap kak sewese kitail en kaunopada ong onop en Paipel?
2 Kapakapki Sawas: Pwehki Siohwa me kin ketin kakairada weren tuhkehn padahk mehlel nan mohngiong en tohnsukuhlo, e konehng kitail en kapakapki sawas ong ih oh eh anahn akan mwohn atail kin kaunopada ong onopo. (1 Kor. 3:6; Seims 1:5) Kapakap wet kak sewese kitail en ese ia duwen kitail kak doulahte audehkihda nan eh mohngiong soahng kan duwen Siohwa duwehte “kupwure iangahki erpit koaros oh marain.”—Kol. 1:9, 10.
3. Ia duwen kitail kak kaunopada ni atail kin medemedewe tohnsukuhlo?
3 Medemedewe Tohnsukuhlo: Sises mwahngih kesempwalpen en medemedewe duwen irail kan me kin rong ih. Pak riau, mie me idek rehn Sises peidek wet: “Dahme I uhdahn pahn wia pwe I en kak ale mour soutuk?” Ehuehu ahnsou me e ketin sapeng peideko, mwomwen eh ketin sapeng kin wekpeseng. (Luk 10:25-28; 18:18-20) Ni ahnsou me kitail kin kaunopada ong onopo, kitail anahne medemedewe dahme tohnsukuhlo pahn anahne sukuhlki. Medewehla peidek pwukat: Mehnia iren Paipel me kitail pahn wadekpene rehn tohnsukuhlo? Parakrap depe me kitail pahn onopki? Mehnia ire kan me tohnsukuhlo pahn apwalki wehwehki de pwungki? Ma kitail kin medemedewe ekei peidek kan me tohnsukuhlo ele pahn idek, kitail pahn kak ese ia duwen kitail pahn sapeng ni ahl me pwung.
4. Dahme kitail anahne wia pwehn kaunopada mwahu ong onopo?
4 Onopki Pwuhko Mwowe: Mendahki pak tohto kitail kin onopkier pwuhko rehn meteikan, kitail pahn ahpwtehn onopki pwuhko rehn tohnsukuhlo. E inenen kesempwal en kaunopada mwahu ong ehuehu onop pwehn kamwakid tohnsukuhlo en kekeirda. Met wehwehki me kitail en wia dahme kitail kin kangoangehki tohnsukuhlo en wia. Kitail anahne onopki pwuhko mwowe, iangahki iren Paipel kan, medemedewe tohnsukuhlo, oh pil lainihala ire kesempwal kan.—Rom 2:21, 22.
5. Ia duwen kitail kak kahlemengih Siohwa?
5 Siohwa kin ketin nsenohki mehlel kekeirdahn emenemen tohnsukuhl. (2 Pit. 3:9) Kitail kak kasalehda soangen pepehmohte ni atail kin kaunopada mwahu ong ehuehu onop en Paipel.