Nekidala Mwahu Doaropwe wet
Ekei Padahk kan Ke Kak Doadoahngki Nan Kalohk
Iaduwen Ke Kak Doadoahngki Doaropwe wet
Pali laud en padahk kan me kileledi wasaht kohsang Atail Doadoahk Ong Wehio en sounpwong teiko. Ke kak song doadoahngki padahk pwukat nan ahmw wasahn kalohk, oh kilang mehnia padahk kan kin pweida mwahu. Nekidala mwahu doaropwe wet (insert wet), oh pwurehng wadek padahk pwukat ahnsou me ke kaunopada ong kalohk.
Ke kak kahrehong aramas emen en perenki rong Mahsen en Koht ma ke pahn kasansalehda mwahu dahme ke men nda. Kihda peidek ehu, oh mwurin mwo, kasalehda ni mwotomwot pasapengpen peideko sang nan Pwuhk Sarawi. Ke kak doadoahngki peidek oh pasapeng pwukat:
“Ni ahmw kin medewehla duwen dahme pahn wiawi ahnsou kohkohdo, e kin kahrehong uhk en koapworopwor de peikasal? [Mweidong tohnihmw en sapeng.] Paipel kin kohpada irair suwed kan me kitail kin kilang rahn pwukat oh pil dahme pahn wiawi ehu rahn.”—2 Tim. 3:1, 2, 5; Lepin Padahk 2:21, 22.
“Rahnwet, aramas tohto kin nsenohki duwen epwelpen roson en paliwar. Ke wehwehki me Koht inoukihong aramas akan me E pahn kamwahuwihala soumwahu koaros kohkohlahte?”—Aiseia 33:24; Kaudiahl 21:3, 4.
“Ke wehwehkiher me Paipel kohpada me ehu rahn koperment ehute me pahn kaunda sampah pwon?”—Dan. 2:44; Madiu 6:9, 10.
“Ia ahmw madamadau—ma Sises Krais kaunda sampah ahnsouwet, ia mwomwen irair en sampah?”—Mel. 72:7, 8.
“Aramas tohto kin lelohng kahpwal pwehki aramas teikan kin lipilipilki irail pwehki irail lih (de ohl), de arail pelien lamalam, de wehi oh keinek me re kohsang. Dahme ke lemeleme duwen sapwellimen Koht pepehm ong aramas akan me kin lipilipilki aramas teikan?”—Wiewia 10:34, 35.
“Kitail koaros wehwehki me Sises Krais wiahda manaman tohto mahs. Ma ke kak peki reh en wiahda pil ehu manaman, soangen manaman dahieu ke pahn mwahuki ih en wiahda?”—Mel. 72:12-14, 16.
“Pali laud en aramas kin pwangahki rong duwen kahpwal kan. Re kin men rong duwen dahme pahn kamwahuwihala kahpwal kan. Ahpw, iawasa kitail kak diar dahme pahn kamwahuwihala atail kahpwal kan?”—2 Tim. 3:16, 17.
“Ke wehwehki duwen Wehio me ke kin kapakapki nan Kapakap en Kauno de Kapakap en Samat?”—Kaudiahl 11:15.
Dahme Kitail Kak Koasoia
Pasapeng kan en peidek kan me mihmi pah kin kohsang pwuhken Reasoning, oh kitail kak diar pasapengpen peidek pwukat ni pali depe me sansalda pah:
Dahme kahrehda kitail kin mahla oh mehla? (98)
Ia irair en me melahr akan? (100)
Mie kahrepe mwahu kan me kitail kak kamehlele me mie Koht? (145)
Koht kin nsenohki dahme kin wiawiong kitail aramas akan? (147)
Uhdahn mie Koht? (147)
Aramas mwahu koaros kin kohdahla nanleng? (162)
Aramas emen pahn anahne kohdahla nanleng ma e men ahneki peren mehlel ong ahnsou kohkohdo? (163)
Dahme kahrehda e kesempwal en wehwehki oh doadoahngki mwaren Koht? (196)
Sises Krais oh Koht—emen de riemen? (212)
Dahme Wehin Koht pahn wia? (227)
Ia kahrepen aramas kin mour? (243)
Dahme pahn kamwahuwihala pwopwoud? (253)
Koht kin kupwurki pelien lamalam koaros? (322)
Iaduwen aramas emen pahn wehwehki mehnia pelien lamalam me mehlel? (328)
Ia uwen kehlail manaman en Sehdan nan sampah rahnwet? (364)
Dahme kahrehda Koht kin mweidohng suwed en mihmihte? (393)
Dahme kahrehda soahng suwed kan kin wie tohtohla? (427)
Ihs me kin kaunda sampah ahnsou wet—Koht de Sehdan? (436)
Ekei Padahk kan Ke Kak Doadoahngki Ong Kihla Kupwurki Brochure
“Uhdahn ke pahn pwungki me aramas tohto kin kamehlele me mie Koht. Irail koaros pil kin kamehlele me Koht kin kupwurki aramas en wia mehkot pwehn kaperenda Ih. Ahpw dahme aramas sohte kak pwungkihpene iei met: Dahme Koht kupwurki kitail en wia?” Mwurin mwo, ke kak kasalehda Kupwurki brochure, pahkalahng ni Iren Mehn Kasukuhl 1, oh koasoia duwen oaralapo.
“Pwehki kahpwal tohto kin pwarada nan mour en peneinei rahnwet, mie pak me ke medemedewe dahme tohnpeneinei kak wia pwehn miniminpene oh nsenamwahu?” Mwurin tohnihmw sapeng peidek wet, kawehwe me nan Paipel, Koht kin ketin kasalehda duwen dahme tohnpeneinei kak wia pwehn miniminpene oh nsenamwahu. Wadek Aiseia 48:17. Mwurin mwo, pahkalahng Iren Mehn Kasukuhl 8 nan Kupwurki brochure, oh kasalehda duwen ekei iren Paipel kan me kin kihda kaweid mwahu ong emenemen nan peneinei. Wadek peidek kan ni tepin Iren Mehn Kasukuhlo. Idek rehn tohnihmwo ma e men wadek duwen pasapengpen peidek pwukat.
“Brochure wet kin audaudki koasoandi en onop Paipel ehu me pahn kasalehda padahk kesempwal kan sang nan Paipel oh kawehwehda padahk pwukat ni ahl me mengei oh sansal. Nan brochure wet, ke pahn diar pasapengpen peidek kan me aramas akan kin wahpwonki sounpahr tohto. Karasepe ehu, Ia kupwuren Koht ong sampah?” Pahkalahng Iren Mehn Kasukuhl 5, oh wadek peidek kan ni tepin Iren Mehn Kasukuhlo. Idek rehn tohnihmwo mehnia peidek e keieu perenki, oh wadek parakrapo me pasapeng mihmi loale, iangahki wadek iren Paipel kan me pahn sapeng peidek kan. Kawehwe me pasapengpen peidek teikan kin mengei en dierekda duwehte me kumwa ahpwtehn wia. Idek rehn tohnihmwo ma ke kak pwurodo oh kasalehda pasapengpen pil ehu peidek.
“Dahme ke lemeleme duwen kahrepe me seri kan kin wia tiahk lemei oh mwersuwed nan sukuhl kan? Ke lemeleme kahrepeo pwehki arail pahpa oh nohno kan sohte kin kaiahne irail mwahu? De ke lemeleme mie pil ehu kahrepe, duwehte kasongosong kan sang Tepil?” Mweidohng tohnihmw en sapeng. Ma tohnihmwo lemeleme me Tepil me kahrehda soahng pwukat kin wiawi, wadek Kaudiahl 12:9, 12. Kasalehda duwen dahme Tepil wia pwehn kahrehong tohnsampah en lelohng kahpwal tohto rahnwet. Mwurin mwo, kasalehda Kupwurki brochure oh pahkalahng Iren Mehn Kasukuhl 4, oh idek rehn tohnihmwo ma e kin medemedewe iawasa Tepil kohsang. Mwurin mwo, wadek oh koasoia parakrap 1 oh 2 nan Iren Mehn Kasukuhl 4. Ma tohnihmwo sapeng peidek me ke wia ong ih oh e lemeleme pahpa oh nohno sohte kin kaiahne mwahu seri kan, kahrehda seri kan kin wia tiahk lemei oh mwersuwed, ke kak wadek 2 Timoty 3:1-3 oh kasalehda irair kan me pahn kahrehda kahpwal kan en pwarada. Mwurin mwo, kasalehda Kupwurki brochure oh pahkalahng Iren Mehn Kasukuhl 8, wadek parakrap 5, oh pousehla amwa koasoipene duwen met.
“Ke lemeleme Sounkapikpatail pahn ketin kihong kitail loalokong me kitail anahne pwehn sewese atail peneinei en miniminpene oh nsenamwahu?” Mwurin tohnihmwo sapeng, ke kak kasalehda Kupwurki brochure. Pahkalahng Iren Mehn Kasukuhl 8, oh kawehwe me e kin audaudki kaweid kan sang Pwuhk Sarawi ong emenemen tohnpeneinei. Idek rehn tohnihmwo ma ke kak wia kisin kamwomwada pwehn kasalehda iaduwen re pahn kak doadoahngki brochure wet oh Paipel pwehn paiekihda laud.
“Mendahki kahpwal koaros me kin lelohng kitail nan atail mour rahnwet, ke lemeleme kapakap kak sewese kitail? [Mweidohng tohnihmw en sapeng.] Aramas tohto kin nda me kapakap kin kihong irail kehl loale. [Wadek Pilipai 4:6, 7.] Ahpw, ekei aramas kin nda me Koht sohte kin sapeng arail kapakap akan. [Kasalehda Kupwurki brochure oh pahkalahng Iren Mehn Kasukuhl 7.] Brochure wet pahn kawehwehda iaduwen kapakap kak wia mehn sawas mwahu ong kitail.”
“Se kin koasoi ong mehn mpatail kan duwen ia kahrepe soangsoangen pelien lamalam tohto kin mie nan sampah ahnsou wet. Ahpw, Pwuhk Sarawi ehute. Ia ahmw madamadau: dahme kahrehda soangsoangen pelien lamalam kan mie oh irail koaros wekpeseng? [Mweidohng tohnihmw en sapeng. Kasalehda Kupwurki brochure oh pahkalahng Iren Mehn Kasukuhl 13, oh wadek peidek kan me mihmi nin tepio.] Ke kak diar pasapengpen peidek pwukat ma ke pahn wadek Iren Mehn Kasukuhl 13.”
Mwurin ahmw kihong tohnihmwo Watchtower oh Awake! makisihn kan, idek reh ma ke kak wadek ehu parakrap mwotomwot ong ih. Ma tohnihmw mweidohng uhk en wia met, kasalehda Kupwurki brochure oh pahkalahng Iren Mehn Kasukuhl 5. Kasalehda peidek kan me mihmi ni tepin oaralapo, oh idek reh ma e pahn kak rong ahmw wadek keieun parakrap oh ma e pahn rong pasapengpen keieun peidek. Mwurin ahmw wadek parakrapo, idek rehn tohnihmwo peideko oh mweidohng ih en sapeng. Idek reh ma e men wadek brochure, oh ma e mwahuki, koasoanehdi ahnsou ehu en pwurodo oh ndaiong ih me ke men rong dahme e pahn nda pwehn sapeng peidek keriau oh kasiluh.
Ekei Padahk kan Ke Kak Doadoahngki Ong Kihla Pwuhken Knowledge
Ni ahmw kolokol noumw Pwuhk Sarawi, ke kak tepikihda dahme ke pahn nda ni ahmw koasoia: “Se men ehukihong koaros me se tuhwong nan ahmw wasaht rahnwet iren Paipel ehu. E mahsanih . . . ” Wadek Sohn 17:3, oh idek rehn aramaso: “Ke kilang dahme aramas pahn kak ale ma re pahn sukuhliki loalokong pwung? [Mweidohng en sapeng.] Iawasa aramas akan kak diar soangen loalokong wet?” Mwurin aramaso sapeng, kasalehda pwuhken Knowledge, oh koasoia: “Pwuhk wet kin kasalehda duwen loalokong me pahn kahluwalahng mour soutuk. Pwuhk wet kin sapeng peidek kan me aramas tohto kin wia me pid Pwuhk Sarawi.” Kasalehda audepen pwuhko (Table of Contents), oh idek rehn aramaso ma mie pak e medemedewe duwen soangen oaralap kan.
“Mie pak me ke medemedewe ma Koht kin uhdahn nsenohki duwen kopwung sapwung oh kalokolok me kin wiawi nan sampah de kin lelohng pein kitail? [Mweidohng tohnihmw en sapeng.] Pwuhk Sarawi kin kamehleleiong kitail me Koht kin loalloale kitail oh E pahn sewese kitail ni ahnsou me kitail kin lelohng kahpwal akan.” Wadek ekei wasa kan nan Melkahka 72:12-17. Kasalehda pwuhken Knowledge oh pahkalahng irelaud 8, oh kasalehda me e kin sapeng peidek ehu me aramas rar kei kin rapahki pasapengpe: “Dahme kahrehda Koht kin ketin mweidohng lokolok en mie?” Ma mie ahnsou, ke kak pousehla oh koasoia iren Paipel kan me mihmi nan parakrap 3 lel 5, de ma sohte ahnsou, ke kak pwurodo ehu rahn oh koasoia iren Paipel kan nan parakrap 3 lel 5.
“Pali laud en kitail—mie atail peneinei de kompoakpatail me mehlahr. Mie pak me ke medemedewe me ke kak pwurehng kilang irail? [Mweidohng tohnihmw en sapeng.] Sises kasalehda mehn kadehde kan me atail peneinei oh kompoakpatail pahn kak iasada sang mehla ehu rahn. [Wadek Sohn 11:11, 25, 44.] Mendahki kaiasada pwukat wiawi sounpahr tohto samwalahro, e kin kasalehda duwen dahme Koht inoukihong aramas me E pahn wia.” Kasalehda pwuhken Knowledge oh pahkalahng kilelo me mihmi ni pali 85, oh wadek nting me mihmi pohnangin kilelo. Mwurin mwo, kasalehda kilelo me mihmi ni pali 86, oh koasoia dahme kitail kak sukuhliki sang kilelo. Kaunopada dahme ke pahn koasoia ni ahmw pahn pwurodo rehn tohnihmwo ni ahmw pahn idek reh: “Ke men wehwehki dahme kahrehda aramas akan kin mahla oh mehla?” Pwurodo rehn tohnihmwo oh koasoia irelaud 6.
“Mie pak me ke medemedewe dahme kahrehda aramas akan men mour werei?” Mwurin tohnihmwo sapeng peidek wet, kasalehda pwuhken Knowledge oh pahkalahng irelaud 6, oh wadek parakrap 3. Kasalehda duwen kesempwalpen iren Paipel kan me kileledi nan parakrapo. Ni ahmw kasalehda peidek riau me mihmi ni imwin parakrapo, idek rehn tohnihmwo ma e men ese duwen pasapengpen peidek pwukat. Ma tohnihmw nda me e men ese duwen pasapengpen peidek pwukat, ke kak koasoia ekei parakrap kan mwurin parakrap 3.
“Se kin idek rehn aramas akan ma re kamehlele dahme ntingihdi wasaht . . . ” Wadek Senesis 1:1, oh mwurin mwo, idek reh: “Ke kin kamehlele dahme ntingdi wasaht?” Ma aramaso nda me e kamehlele, ke kak nda: “Pil ngehi. Ahpw, dahme ke lemeleme—ma Koht kapikada soahng koaros, e pil kin kupwurki soahng suwed kan en wiawi?” Mwurin e sapeng peidek wet, ke kak wadek Eklesiasdes 7:29. Kasalehda pwuhken Knowledge oh pahkalahng irelaud 8, oh wadek parakrap 2. Ma aramaso sohte kamehlele dahme ntingihdi nan Senesis 1:1, kangoange ih en kasawihada mehn kadehde kan me mie Sounkapikpatail.—Tehk pwuhken Reasoning, pali 84-86.
“Ke soh pahn pwungki me pwehki irair en sampah me pid tiahk mwahu kin wia kohkohdi mwadang rahnwet, kitail anahne mehn kaweid mwahu nan atail mour? [Mweidohng tohnihmw en sapeng.] Mendahki Pwuhk Sarawi kin wia pwuhk ehu me kisehn pwuhk kan me keieu mering nan sampah, e kin kihda kaweid mwahu ong mour oh peneinei pwehn nsenamwahu oh peren.” Mwurin mwo, kasalehda pwuhken Knowledge oh pahkalahng irelaud 2, oh wadek parakrap 10 oh keieun sentence en parakrap 11, iangahki 2 Timoty 3:16, 17.
“Ke men wehwehki dahme pahn wiawiong aramas akan oh sampah ni ahnsou kohkohdo? [Mweidohng tohnihmw en sapeng.] Pwuhk Sarawi kin kasalehda dahme pahn wiawi—Paradais! Koht kapikada tepin pwopwoud oh ketikihdi ira nan paradais. Menlau tehk ia mwomwen paradais.” Kasalehda pwuhken Knowledge oh pahkalahng pali 8, oh wadek parakrap 9, pahnangin sawaspen oaralap me koasoia “Mour en Nan Paradais” (“Life in Paradise”). Mwurin mwo, koasoia ire kesempwal kan nan parakrap 10, oh wadek iren Paipel wet: Aiseia 55:10, 11. Ke kak ndaiong tohnihmwo me ke kak pwurodo oh pousehla amwa koasoipene duwen ia mwomwen mour nan Paradais oh wia parakrap 11-16.
Ni ahnsou me ke pahn pwurehng pwurala rehn irail me ale Watchtower (Kahn Iroir) oh Awake! makisihn kan, ke kak nda:
“Rahn teio, I kihong komwi noumw Watchtower (Kahn Iroir) makisihn. Mwein ke pil tehk me daidel pwon en makisihno koasoia: The Watchtower Announcing Jehovah’s Kingdom (Kahn Iroir—Pakpakairki Wehin Siohwa). Rahnwet, I men kawehwe duwen Wehi wet oh dahme e pahn kak wia ong komwi oh ahmw peneinei.” Mwurin mwo, kasalehda Kupwurki brochure oh pahkalahng Iren Mehn Kasukuhl 6, oh ma mie ahn aramaso ahnsou, ke kak wadek oh koasoia ire kesempwal kan.
“I kohdo rahn teio oh kihong komwi Watchtower oh Awake! makisihn kan. Makisihn pwukat kin kalaudehla ahn aramas akan arail wauneki Paipel oh kaweid en mour me mihmi loale. Pwehki I ahneki pepehm me e kesempwal ong aramas koaros en wehwehkihla Mahsen en Koht, I pwurodo pwehn kasalehda mehkot me pahn sewese komwi en wia met.” Kasalehda Kupwurki brochure de pwuhken Knowledge oh tepida onop en Paipel.
Ni ahnsou me ke men kihla pwuhk kan me mie teh 192, ke kak nda:
“Aramas kin kalap kesempwaliki kasukuhl me mwahu. Ia ahmw madamadau—soangen kasukuhl dahieu me pahn kihong emen mour me nsenamwahu oh pil pweida mwahu? [Mweidohng tohnihmw en sapeng. Mwurin mwo, wadek Lepin Padahk 9:10, 11.] Pwuhk wet [nda daidel en pwuhk me ke men kihla] kin poahsoanda pohn Pwuhk Sarawi. E kin kasalehda duwen loalokong me pahn kahluwalahng mour soutuk oh pil iawasa soangen loalokongo kak kohsang ie.” Kasalehda duwen met sang nan pwuhko, oh kangoange tohnihmwo en wadek pwuhko.
Pwuhk teikan
Ke kak diar ekei padahk kan ong pwuhk oh brochure teikan nan Watch Tower Publications Index pahnangin sawaspen oaralap pwukat:
Presentations
List by Publication
Padahk me Ke Pahn Tepida Onop en Paipel Rahno
Pwehn tepida onop en Paipel rehn tohnihmw rahno, ke kak nda:
“Ke wehwehki me, ni minit kei, ke kak diarada pasapengpen peidek kesempwal me pid duwen Paipel? Karasepe ieu, . . . ” Mwurin mwo, ke pahn wia peidek me kin mihmi ni tepin Iren Mehn Kasukuhl kan nan Kupwurki brochure de peidek me ke lemeleme tohnihmw pahn perenki wehwehki duwen pasapeng.
“I kohdo rahnwet pwehn wia kisin kamwomwada duwen aht koasoandi en onop Paipel ni soh isepe. E pahn wiawi erein minit limau. Mie ahmw ahnsou ekis—minit limaute—pwe ken kilang kamwomwada wet?” Ma tohnihmw nda “ei,” ke kak doadoahngki Iren Mehn Kasukuhl 1 nan Kupwurki brochure pwehn kamwomwada onop, oh wadek ihte iren Paipel ehu de riau. Mwurin mwo, idek rehn tohnihmw: “Iahd me pahn mie ahmw ahnsou—mwein minit 15—pwe kita kak wia Iren Mehn Kasukuhl 2?”
“Aramas tohto kin naineki Pwuhk Sarawi, ahpw re sohte kin wehwehki me pasapengpen peidek kesempwal kan me pid dahme pahn wiawi ahnsou kohkohdo kin mihmi nan Pwuhk Sarawi. Ni ata pahn doadoahngki sawaspen Pwuhk Sarawi wet [Kupwurki brochure de pwuhken Knowledge] oh koasoiapene audepe kan—mwein awa ehu de mwotomwot sang—ehuehu wihk, ke kak tepida wehwehki padahk kesempwal nan Pwuhk Sarawi nan sounpwong keite. I men kasalehong komwi duwen koasoandi en onop Paipel.”
“I kohdo rahnwet pwehn idek rehmwi ma ke men onop Paipel ni soh isepe. Ma ke pahn mweidohng, I men wia kisin kamwomwada erein minit keite pwehn kasalehda iaduwen aramas nan sahpw 200 samwa kin onop Paipel nin duwen peneinei. Kita kak wia sohte lipilipil oaralap me ke men wia. [Kasalehda audepen pwuhken Knowledge (Table of Contents).] Mehnia oaralap me ke men wia?” Mweidohng tohnihmw en pilada mehnia oaralap me e men wia. Ahnsou me e piladahr mehnia oaralap e men wia, ke kak pahkalahng wasao oh tepida onop en Paipel ni keieun parakrap.
“I kin koasoanehdi rehn aramas akan pwehn wia onop en Paipel ni sohte isepe rehrail oh mie ahi ahnsou nan ahi koasoandi ong irail me pil men onop Paipel. Se kin doadoahngki sawaspen Paipel wet ong onop en Paipel. [Kasalehda pwuhken Knowledge.] Koasoandi en onop Paipel rehn aramas akan kakete wiawi erein sounpwong keite oh se kin doadoahngki Paipel pwehn sapeng peidek kan duwehte: Dahme kahrehda Koht kin mweidohng lokolok en mie? Dahme kahrehda kitail kin mahla oh mehla? Dahme kin wiawiong kompoakpatail me mehlahr kan? Oh iaduwen kitail kak karanih Koht? I kak wia kisin kamwomwada en onop en Paipel ong komwi?”
Ma ke diarada me padahk ehu me ke kin doadoahngki kin kahrehong tohnihmw en perenki rong, menlau nantihong doadoahngkihte padahko! Ihte ke pahn kilang mehnia pwuhk de brochure Society koasoanehdi en kihla sounpwongo oh kawekila ahmw padahko pwehn kihla pwuhk de brochure me Society koasoanehdi ong sounpwongo.