Kalohk nan Telephone Kak Imwila Mwahu
1. Dahme kahrehda doadoahngki telephone kak kesempwal ong atail kalohk?
1 Ia kahrepen kitail en pil doadoahngki telephone nan kalohk? Pwehki met pil ehu ahl en sewese meteikan en alehdi loalokong pwung me kin kahluwalahng mour soutuk. (2 Pit. 3:9) Mendahki kalohk ihmw-lel-ihmw iei ahl me kitail kin keieu doadoahngki ong kalohki Wehin Koht, kitail kin pil isaneki wiepe teikan pwehn kak koasoiong irail kan me kitail sohte kin tuhwong ni imwarail.—Mad. 24:14; Luk 10:1-7; Kaud. 14:6.
2. Ia koasoandi ong kalohk nan telephone?
2 Ia Koasoandi ong Met? Duwehte koasoandien kalohk ihmw-lel-ihmw, pil mie wasahn kalohk kan me kin kohwong sounkalohk kan me pahn kalohk nan telephone. Sounkalohk emente kak kelehpw wia met, de pil rehn emen de riemente. Wasa me kalohk en telephone pahn wiawi anahne sohte katairong oh sohte mehn kerempwa. Me tohto kin diar me e mwahu en mwohd ni ehu tehpel me soahng koaros re kin doadoahngki nan kalohk pahn kaunopadahier mwohrail.
3. Dahme kitail anahne tamataman ni ahnsoun kalohk nan telephone?
3 Ia Duwen Atail Pahn Kalohk nan Telephone? Atail kalohk nan telephone pahn duwehte atail kin koasoakoasoi ong aramas. Irail kan me ahpwtehn tepida kak wadek sang nan doaropwe dahme re pahn koasoia ahpw re pahn wia met duwehte ar kin koasoakoasoipene. Mie wiepen tepin koasoi kan me mi nan pwuhken Reasoning, Atail Doadoahk ong Wehio, oh doaropwe me oaralape koasoia Ke Sou Men Esehla Duwen Padahk Mehlel? me kak sewesehkin uhk met. Ma ke pahn pein wiahda omw padahk en kalohko, eri ke pahn anahne medewehda ehu oaralap, oh ehu peidek me ke kak idek rehn tohnihmwo me pid oaralapo, oh pil kaunopada ekei iren Paipel kan me pahn kihda pasapeng. Pwuhk kan me kitail pahn kihla pahn duwehte pwuhk kan me kitail kin kihla nan doadoahk en kalohk ihmw-lel-ihmw. Tamatamante mepwukat: Dehr saloh oh koasoi malamal. Koasoi ni wahu, kanengamah oh kadek pwe tohnihmwo en kak rong oh ese me ke kin wia met. Rong ni en tohnihmwo pahn kasalehda eh madamadau, oh eri kihda koasoi kan me kasalehda omw kin rongorong oh kalahnganki eh pasapeng kan. Kanaiehng pwe ken dehr koasoia duwen koasoandi en sawas en mwohni, pwe re de medewe me kitail kin pekipekihseli sent nan telephone.
4. Ia duwen atail doadoahngki telephone kak sewese kitail en kanekehla atail wasahn kalohk?
4 Aramas me ke koasoiong nan telephone ele wia aramas me kohwahki soumwahu oh kin mihmihte nan ihmw. De ih emen me kin doadoahk ahnsou me kitail kin lelahng imweo ahnsoun kalohk ihmw-lel-ihmw. Ekei kin kousoan nan wasa kan me kin kelpene oh mie sounsile ewen kehlo de nan wasa me kin keinapwih aramas sohte lipilipil en kohla wasao. Ihme kahrehda, kitail pil men doadoahngki wiepen kalohk mwahu wet en doadoahngki telephone pwehn kak kapwaiada mwahu atail doadoahk en kalohk.