Ia Duwen Omw Pahn Kalohk Doadoahngki Doupen Pwuhk ong Mehn Kasansal

Kalohk doadoahngki mehn kadahr me pwuhk kan kin mi loale de tehpel en doupen pwuhk ong mehn kasansal kan kasalehda me e kin pweida mwahu en sewese kainangedo me mohngiong mehlel kan nan padahk mehlel. (Sohn 6:44) Ihme kahrehda, elder kan ale kangoang en koasoanehdi kalohk ong wehipokon nan en mwomwohdiso wasahn kalohk kan me aramas tohto kin alialu ie. Pwehki tehpel en doupen pwuhk ong mehn kasansal kan kak mwekidseli, kitail sohte anahne ale mweimwei sang me ahneki manaman kan en wasao. Ihs me warohng iang doadoahk wet? Sounkalohk kan me kin koahiek en madamadau, mwomwarail kin kasalehda wahu, oh ahneki koahiek en koasoakoasoi. Ire kan me mi pah iei ekei soahng kan me ke pahn wia de sohte pahn wia, me pahn sewese sounkalohk kan en pweida mwahu.

Wia:

Kasalehda kadek, kasamwo, oh sewese me kin alu daulih kumwail. Ekei sounkalohk kan kin kasalehda kadek, ni arail kin sirei oh rahnmwahwih aramas akan. Ma emen kilanglahng doupen pwuhko ni eh alu daulih, ele ke kak nda, “Ke kak ale mehkot ma ke mwahuki.”
Kesihnen ekis dohlahsang tehpel en pwuhko. Nan ekei wasa kan sounkalohk kan kin pweida mwahu ni arail kin kesihnen ekis dohlahsang tehpel en pwuhko. Ekei kin diarada me wiepe wet kahrehiong me kin alialu kan en kahng uhdi, eri irail kesihnen ekis dohlahsang oh awih lao emen kohdo uhdi ni tehpel en pwuhko. Ahnsou me aramas men kohdo ni tehpel en pwuhko, song en tapiada koasoakoasoiong, ele ke pahn nda, “Mie pak ke kin medewe duwen peidek en?”
Doadoahngki Paipel ni ahnsou me konehng oh kak.
Kawehwehiong koasoandi en onop en Paipel ong emen me ale neitail pwuhk en onop kan, me duwehte pwuhken Paipel Padahngki. Peki ma ke kak kasalehiong kasdo Dahme Kahrehda ken Onopki Paipel? nan noumw dipwisoun kilang kasdo me ke kin weuwa.
Alehdi wasa de nempehn delepwohn sang irail me perenki rong ahnsou me kak. Ma aramaso sohte kin mi nan amwail wasahn kalohk, audehda doaropwehn Please Follow Up (S-43), oh kihong sekteri ni ahnsou mwadang.