Kalohk Sang Ihmw Lel Ihmw
1. Peidek dahieu kin kohda me pid doadoahk en kalohk ihmw lel ihmw oh pwekida?
1 “Irail ako me ahneki ekspiriens en kalohkiseli Padahk Mehlel ni soangen ahl wekpeseng kan pahn pwungki me doadoahk en ihmw lel ihmw ki sawas en pwuhk me oaralap MILLENNIAL DAWN ni ahnsouwet iei ahl keieu pweida mwahu ohng ni kalohkpen me Mehlelo.” Lepin koasoi wet kohsang nan Zion’s Watch Tower en July 1, 1893, kin kasalehda kesempwalpen kalohk en ihmw lel ihmw. Aramas akan nan sampah pwon kin kilangwohng met nin duwen kilel ehu en irail Sounkadehdehn Siohwa kan. Elen kalohk wet kin pweidahte, mendahki ekei wasa e kin apwalla en diar aramas ni imwarail?
2. Ia iren Pwuhk Sarawi me poahsoankihda kalohk en ihmw lel ihmw?
2 Poasoanda Pohn Pwuhk Sarawi oh Kesempwal: Kalohk en ihmw lel ihmw kin poasoanda pohn Pwuhk Sarawi. Sises kaweidki tohnpadahk 70 en kohla ni ihmw akan ni wad riemen. (Luk 10:5-7) Ahnsou kis mwurin Sises pwoula, Paipel mahsanih met duwen irail tohnpadahk ko: “Eri, rahn koaros, nan Tehnpas Sarawio oh sang ihmw lel ihmw, irail kin wonoweite ni padahk oh kawehwe Rongamwahu duwen Sises me iei Mesaia.” (Wiewia 5:42) Wahnpoaron Pohl pil kin ngoangki padahk sang ihmw lel ihmw.—Wiewia 20:20.
3. Ia ekei kamwahupen kalohk ihmw lel ihmw?
3 Kalohk sang ihmw lel ihmw kin pil wiewiahte ahl kesempwal ehu en kihseli rongamwahu en Wehio rahnwet. E kin kahrehiong kitail en “rapahki” irail kan me konehng ale padahk mehlel nin duwen koasoandi me soandi mwahu. (Madiu 10:11) Aramas akan kin nsenamwahu nan pein imwarail. Lokaiahng irail ni atail kilikilang irail—rongorong ngilarail, kilikilang wekwekilahn pohn meserail, oh tehk duwen soahng kan me kapilirailpene—kin sewese kitail en kilangada dahme irail perenki oh kin nsenohki. Met kin kihong kitail ahnsou mwahu en pil doula koasoia soahng teikan.
4. Iaduwen atail kak wiaiong kalohk en ihmw lel ihmw en pweida?
4 Wiahda Kawekila kan ohng Ahmw Mour: Wahnpoaron Pohl kin men kawekila ah mour “pwehki rongamwahuo.” (1 Korint 9:23) Mwein kitail kak kawekila atail koasoandi en kalohk ahnsou me aramas tohto pahn mih ni imwarail kan, mwein ni soutik kan, ni imwin wihk kan, de holiday kan. Ntingihdi ihmw akan me sohte towe, oh pwurehng pwurala ni ehu rahn tohrohr nan wihko de ehu ahnsou tohrohr.
5. Iaduwen irail akan me ahneki soumwahu en paliwar kak iang pidada doadoahk en ihmw lel ihmw?
5 Pil irail kan me ahneki soumwahu en war akan kak pil iang doadoahk en ihmw lel ihmw. Mwein kitail kak koasoanehdi en wahla soangen irail pwukat en iang kitail kohla ni ihmw akan me irail pahn mengeiki kohla ie oh mweidohng irail en wia doadoahk wet ni ahl ehu me irail pahn nsenamwahuki. Emen sister me kin kehmwopw kin kak kohla ni ihmw ehute nan elep en awa ehu koaros. Ahpw ia uwen peren oh pepehm en itarki me kin e kin ahneki mwurin ah kin iang ehu pwihn wia doadoahk en kalohk!
6. Dahme kahrehda kitail en kin kaukaule iang wia doadoahk en kalohk ihmw lel ihmw?
6 Tohto irail me rasehng sihpw kan kin dierek nan doadoahk en ihmw lel ihmw. Emen sounkalohk letelet ni wenihmw ieu oh tohnihmwo padahkihong: “Pidelong. I ese ihs kowe. I kin wie kapakap ohng Koht en kadarodo emen en sewese ie, oh I ahpw rongada letelet ni wenihmwen. E karonge ie oh kadaruhkedo.” Imwilahn doadoahk wet kin kadehde me Siohwa kin kapaia elen kalohk wet. (Madiu 11:19) Nantihong ke en kaukaule iang wia doadoahk en kalohk ihmw lel ihmw.