Ke Pahn Kak Iang Kalohk ni Soutik?
1. Nin duwen pwuhk ehu koasoia, iahd me wahnpoaron Pohl kin kalohk ihmw lel ihmw?
1 Ehu pwuhk koasoia me wahnpoaron Pohl kin kalohk ihmw lel ihmw “sang kuloak 4 mwurin souwas lella nipwong.” (Daily Life in Bible Times) Kitail sehse ma iei met uhdahn ahn Pohl koasoandi, ahpw kitail ese me e perenki wia mepwukat koaros “pwehki rongamwahu.” (1 Kor. 9:19-23) Met kin iangahki eh wiahda koasoandi kan en kalohk ihmw lel ihmw ni ahnsou e keieu kak koasoi ong aramas tohto.
2. Dahme kahrehda ni soutik kan wia ahnsou mwahu en iang kalohk?
2 Sounkalohk kan nan wasa tohto kin kalapw kalohk ihmw lel ihmw ni menseng erein wihk kan. Ahpw ni menseng kin wiahte ahnsou me keieu mwahu nan omw wasa? Emen pioneer koasoiahki eh wasahn kalohk: “Aramas sohte kalapw mi ni imwarail ko nin rahn, ahpw tohtohn irail kin mi ni imwarail ni soutik.” Kalohk en ni soutik pahn kihda ahnsou keieu mwahu en ehukihong rongamwahu aramas akan, ahpw keieu ohl akan. Ih ahnsou me tohnihmw kan kin saledek oh men koasoi. Ma e konehng, elder kan anahne koasoanehdi tuhpenehn kalohk kan ni soutik.
3. Ia duwen atail kasalehda me kitail kin medewe dahme konehng ni atail kin kalohk ni soutik?
3 Medewe Dahme Konehng: Ni atail kin kalohk ni soutik, e kesempwal en medewe dahme konehng. Karasepe ma ke kasaing emen ahnsou sohte mwahu, duwehte eh ahnsoun mwenge, e keieu konehng ken ndaiong me ke pahn pwurala mwuhr. Ma e rotorot, kesihnenda wasa me tohnihmwo kak kilang uhk oh mwadang kasalehda ihs kowe oh kahrepen omw pwarala. E pil konehng en wad riemen kohla ni ehu ihmw a meteikan awih wasa me keren oh ken mi ni wasa me marain oh sohte kelehpw. Ke dehr nohn pwand en kohla rehn tohnihmw kan pwehn dehr kedirepwe arail onopadahng meir. (2 Kor. 6:3) Ma wasahn kousoan ehu kin keper mwurin kihrlahn ketipin, kalohk wasao erein ahnsou me maramarainte.—Lep. Pad. 22:3.
4. Kapai dah kan me kohsang kalohk en ni soutik?
4 Kapai kan: Atail peren pahn laudla ni atail kak koasoiong aramas akan. Ma kitail kak koasoiong aramas tohto, kitail pahn kak sewese me tohto ren “ale komourparail oh marainkihla me mehlel.” (1 Tim. 2:3, 4) Ke pahn kak wekidala omw koasoandi pwehn iang kalohk en ni soutik?