Ke Kak Wekidala Ahmw Koasoandi?
1. Dahme kahrehda kitail anahne wekidala atail koasoandi en ahnsoun kalohk?
1 Nin duwen Kristian mehlel kei, kitail kin alehda luhk en wia “sounlaidih aramas akan.” (Madiu 4:19) Duwehte irail me kin laidih mwahmw akan, e kin pweida mwahu ma kitail pahn “laidih aramas” de kalohk ni soangsoangen ahnsou kan me kitail kak tuhwong aramas akan. Nan sahpw tohto, sounpwong kan me pahn kohdo, awa en ni rahn kan pahn tohtohla. Mwurin souwas oh ni soutik kan, aramas pahn mihier ni imwarail kan. Pak tohto, nan soangen ahnsou kan, tohnihmw kan kin meleilei oh kin kak kasamwo aramas akan. Ke kak wekid ahmw koasoandi en ahnsoun kalohk pwe en kalohk nan soangen ahnsou pwukat?—1 Korint 9:23.
2. Ia ekei ahl akan me kitail kak ehukihong aramas tohto duwen Rongamwahu?
2 Kalohk en Soutik: Wiahda ahmw koasoandi kan en kalohk ni soutik pahn sewese kitail en tuhwong aramas tohto oh ehukihong irail Rongamwahu. (Lepin Padahk 21:5) Irail me pwulopwul kan kak kalohk mwurin sukuhl. Irail me kin doadoahk kak koasoanehdi en kalohk mwurin doadoahk. Ekei tohn Pwuhk Study kan kin koasoanehdi en kalohk awa ehu mwohn tepidahn onopo.
3. Ni ahl dah kan me ke kak kalohk mwurin souwas oh ni soutik kan nan ahmw wasahn kalohk?
3 Kalohk sang ihmw lel ihmw ni mwurin souwas akan oh ni soutik kan pahn kahrehiong kitail en kak tuhwong irail akan me sohte kalap mih nan ihmw. Nan wasahn kalohk tohto, kalohk nanial oh kalohk wasa teikan kak wiawi ni soutik. Sounkalohk tohto diarada me ni soutik kin wia ahnsou keieu mwahu en wia return visit kan oh tepiada Paipel Study kan.
4. Dahme kahrehda e kesempwal en kasalehda kadek lamalam ni atail pahn kin wia atail doadoahk en kalohk ni soutik kan?
4 Anahne Kadek Lamalam: Ni atail kin kalohk ni soutik kan, kitail anahne doadoahngki atail loalokong oh kadek lamalam. Pali laud en ahnsou, e kin mwahu en kalohk ni tepin awa kan en soutik, ah kaidehn ni ahnsou me tohnihmw kan pahn kaunopadahng meir. (Pilipai 4:5) Ni ahmw pahn letelet ni wenihmwo, kesihnen wasa me tohnihmwo pahn kak kilang uhk oh nda ihs kowe. Mwadang kasalehda kahrepen ahmw mwemweitla mwo. Ma ke kohla ni ahnsou sohte nohn mwahu, duwehte ma peneineio wie mwengemwenge, e pahn mwahu en peki mahk oh nda me ke nek pwurala mwuhr. Kadek lamalam ahnsou koaros.—Madiu 7:12.
5. Iaduwen atail kak kalekeikitailsang keper kan ni atail pahn kalohk?
5 Kitail pil anahne pohnese duwen keper kan me kak pwarada. Ma ke kalohk ni soutiklahr de rotorotlahr, e wia elen loalokong en kalohk ni pwihn pwe ke en dehr kelepwala. Kalohk wasa kante me ke pehm me sohte keper. Ieremen kohla wasa keper kan ma e rotorotalahr.—Lepin Padahk 22:3.
6. Soangen kapai dah kan me kitail pil kak ale sang atail pahn iang kalohk en mwurin souwas oh ni soutik kan?
6 Kalohk mwurin souwas kan de ni soutik kan kak elehiong kitail en iang irail me Auxiliary Pioneer de Regular Pioneer kalohk. (Rom 1:12) Ke kak wekidala ahmw koasoandi pwe ken kak iang doadoahk en Auxiliary Pioneer de Regular Pioneer?