Kapakapki Sapwellimen Siohwa Sawas

¹ Sises kasalehong sapwellime tohnpadahk kan duwen kesem­pwal­pen ale sapwellimen Siohwa kapai kan ong arail doadoahk en kalohk. (Madiu 9:​37, 38) Sang nan mohngiongatail kan atail kapakap en kapinga Koht oh kalahngan kan oh atail peki dahme kitail kin anahne oh kapakap ngidingid kan kin kasansalehda atail kin likih Siohwa ni unsek. (Pilipai 4:​6, 7) Iren Paipel kan kin kangoange kitail en kapakap ahnsou koaros oh wia “kapakap ngidingid, pekipeki sawas,” oh met pil pahn dokedoke atail kapakap kan me kin pid kalohk.​—Episos 6:​18.

² Nan atail kapakap kan kitail kin kapinga Siohwa pwehki sapwellime irair kan me siksang irair teikan koaros oh sapwellime wiewia kan me siksang koaros. Kitail kin pil kapingahki Ih nin duwen Sounketkihda rongamwahu me kitail kin kalohki. E warohng atail kaping kan pwehki Ih kelepw kin kahrehong atail doadoahk en kalohk en pweida.​—Melkahka 127:1.

³ Atail kapakap en kalahngan kan kin kasansalehda atail kalahnganki sawas me Siohwa ketikihong kitail en wehwehkihla duwen sapwellime kupwur kan. E soh wia pwais kaselel ehu en ehukihong meteikan padahk mehlel kan en Wehio? Soahng koaros me kitail kin wia nan doadoahk en kalohk, kitail men kalahngan­kihong Siohwa.​—Melkahka 107:8; Episos 5:​20.

⁴ E konehng me kitail kin peki rehn Siohwa en sewese kitail en rapahki aramas akan me men onop Paipel oh kitail kin pil peki sawas pwe kitail en kak wia padahk me pahn lel mohngiongarail ki padahk mehlelo. Sang ni atail pahn wia soangen pekipek pwukat, kitail kin pohnese me Koht kelepw pahn kak kapaiada atail doadoahk en kalohk.​—1 Kor. 3:​5-7.

⁵ Emen sister kin kalapw pwurala rehn emen lih oh kihong ih makisihn kan ahnsou koaros, ahpw sister menet lemeleme me liho sohte kin wadek The Watchtower oh Awake! makisihn kan. E sohte men kilang makisihn kesempwal pwukat en wonohnseli mwahl nan imwen liho, eri e wia eh kapakap en pekipek ong Siohwa me ma liho sohte kin wadek makisihn kan, e pahn tepida kangala ale. Ni ahnsou me sister menet pwurala rehn liho, ahn liho pwoud nda met: “Kalahngan­ki omw kin wahdohng kiht makisihn pwukat ahnsou koaros. I kin wadek makishin pwukat oh I kin perenki.”

⁶ Sang ni atail pahn wia atail kapakap kan ni lamalam aktikitik, kitail kak peki rehn Siohwa en sewese kitail en powehdi soahngen irair akan duwehte ni ahnsou aramas akan sohte kin perenki rong oh kapailoke kitail oh pil sewese kitail en powehdi masak aramas pwehn dehr kerempwa kitail en kalohk ong meteikan ni eimah. (Wiewia 4:​31) Ma kitail pahn pousehla en kapakap ahnsou koaros oh wia “kapakap ngidingid, pekipeki sawas” nin duwen me kitail kin ni peik papah Siohwa, kitail kak likih me Siohwa pahn sewese kitail.​—1 Sohn 3:​22.