Dahme Omw Kapakap Kin Kasalehda Duwen Kowe?
“Pwehki omwi kin ketin sapeng pekipek kan. Aramas koaros pahn pwarewei rehmwi.”—MEL. 65:2.
1, 2. Dahme kahrehda sapwellimen Siohwa ladu kan kin kapakapohng ih ni likilik?
SIOHWA kin ketin karonge pekipek kan en sapwellime ladu lelepek kan ahnsou koaros. Kitail kak kamehlele me e kin ketin karonge kitail. Mehnda ma Sounkadehdehn Siohwa rar kei kin kapakapohng Siohwa ahnsou ehute, e kin ketin karonge ehuehu kapakap.
2 Sounmelkahka Depit kin kamehlele me Koht kin ketin karonge eh pekipek kan ni eh koulki: “Pwehki omwi kin ketin sapeng pekipek kan. Aramas koaros pahn pwarewei rehmwi.” (Mel. 65:2) Siohwa kin ketin karonge ahn Depit kapakap pwehki Depit kin kaudokiong Ih ni loalopwoat. Kitail anahne idek rehtail: ‘Ei pekipek ni karakarahk kin kasalehda me I kin likih Siohwa oh kin keieu nsenohki kaudok min? Dahme ei kapakap kin kasalehda duwen ei nanpwungmwahu rehn Siohwa?’
Kapakapohng Siohwa ni Karakarahk
3, 4. (a) Ia pahn mwomwen atail madamadau ni atail kin kapakapohng Koht? (b) Dahme kitail anahne wia ma kitail kin lokolongki “lamalam akan” duwen atail dihp laud?
3 Kitail anahne kapakapohng Koht ni karakarahk ma kitail men Koht en ketin karonge kitail. (Mel. 138:6) Kitail anahne peki rehn Siohwa en ketin kasawih kitail duwehte Depit kin wia ni eh nda: “Maing Koht, komw ketin kasawih ie, pwe komwi en mwahngih mohngiongiet; komw ketin song ie, pwe komwi en mwahngih ei lamalam akan. Komw ketin rapahki ma mie suwed ehu rehi oh ketin kahluwa ie nan ahl en mour soutuk.” (Mel. 139:23, 24) Kitail en dehr ihte kapakap ahpw kitail anahne peikiong dahme Koht ketin kasawiher duwen kitail oh pil kaweid en sapwellime Mahsen. Siohwa kak ketin kahluwa kitail “nan ahl en mour soutuk.”
4 Ia duwen ma kitail kin lokolongki “lamalam akan” duwen atail dihp laud? (Wadek Melkahka 32:1-5.) Atail kin song en pohnsehsehla ohlahn atail nsenmwakelekel kak kihsang atail kehl rasehng tuhke me kin mengila pahn karakar en ketipin. Depit solahr nsenamwahu oh ele soumwahuda pwehki eh dihp. Ahpw ia uwen eh nsenamwahula ni eh wehkohng Koht dipe! Medewehla ahn Depit peren ni eh pehm me e ale “lapwepen dipe kan” oh Siohwa ketin mahkohng ih. En wehkada dihp ong Koht kak wahdo nsenamwahu, oh sawas en elder kan pahn pil kamwahwihala en me dipan men eh nanpwungmwahu rehn Siohwa.—Lep. Pad. 28:13; Seims 5:13-16.
Peki ni Karakarahk oh Kalahngan ong Koht
5. Dahme kitail en wia ni ahnsou me kitail uhdahn pwunodki mehkot?
5 Ma kitail uhdahn pwunodki mehkot, kitail anahne doadoahngki kaweid en Pohl: “Kumwail dehr pwunodki mehkot, ahpw ni soahng koaros kumwail en kehsehkin Koht amwail pekipek kan sang ni amwail kin kapakap oh pekipek karakarahk iangahki kapingkalahngan.” (Pil. 4:6, NW) Keieu, ni ahnsou me kitail lelohng kalokolok oh keper, kitail anahne peki ni karakarahk sapwellimen Siohwa sawas oh kaweid.
6, 7. Ia kahrepen atail kin kasalehda kapingkalahngan nan atail kapakap?
6 Ma kitail kin kapakap ihte ahnsou me kitail anahne mehkot, dahme met pahn kasalehda duwen atail nanpwungmwahu rehn Siohwa? Pohl koasoia me kitail anahne kehsehki Koht atail pekipek kan “iangahki kapingkalahngan.” Kitail uhdahn ahneki kahrepe en kasalehda kalahngan duwehte Depit ni eh nda: “Komwi me lapalahpie oh roson, manaman, lingan, oh wahu. Sapwellimomwi mehkoaros me mi pahnlahng oh nin sampah, oh komwi me nanmwarki, kaun lapalap en mehkoaros. . . . Eri, maing at Koht, se kapingkalahngan ong komwi, oh se kapinga mwaromwi lingan.”—1 Kron. 29:11-13.
7 Sises ketin kapingkalahngankihong Koht mwenge oh pil pilawa oh wain me e ketin doadoahngki ong Sak en Soutik en Kauno. (Mark 8:6; Mark 14:22, 23) Patehng soangen madamadau wet, kitail kin “kapinga KAUN-O” pwehki “manaman kapwuriamwei kan” me e ketin wiahiong aramas akan oh sapwellime “kadeik pwung kan,” oh sapwellime mahsen kan me mi nan Paipel.—Mel. 107:15; 119:62, 105.
Kapakapki Meteikan
8, 9. Dahme kahrehda kitail kin kapakapki riatail Kristian kan?
8 Kitail kin kapakapki pein kitail, ahpw atail kapakap anahne pidada meteikan, pil Kristian kan me kitail sehse ederail. Mendahki wahnpoaron Pohl sohte ese me pwoson akan koaros nan Kolose, e ntingihdi: “Se kin poaden kapingkalahngan ong Koht, Semen atail Kaun Sises Krais, ni at kin kapakapkin kumwail. Pwe se rongehr duwen amwail pwoson Krais Sises, oh amwail limpoak ong sapwellimen Koht aramas akan koaros.” (Kol. 1:3, 4) Pohl pil kin kapakapki Kristian kan en Deselonika. (2 Des. 1:11, 12) Soangen kapakap duwehte met kin kasalehda duwen kitail oh ia duwen atail kin kilangwohng riatail kan nan pwoson.
9 Atail kapakapki Kristian keidi kan oh iengerail “sihpw teikan” kin kadehdehda atail nsenohki sapwellimen Koht pwihn. (Sohn 10:16, NW) Pohl peki ienge tohnkaudok kan en kapakapkin ih ‘pwe Koht en ketikihong ih sapwellime kupwur, pwe ni eh pahn kawehwehda, en kak eimah oh kasalehda sapwellime kupwur rir en nan rongamwahu.’ (Ep. 6:17-20) Kitail kin kapakapki Kristian teikan ni ahl wet?
10. Ia duwen atail kapakapki meteikan eh kamwakid kitail?
10 Atail kapakapki meteikan kin kakete wekidala atail madamadau duwen irail. Ma kitail kapakapki emen me kitail sohte nohk perenki, met pahn wekidala atail madamadau duwen ih. (1 Sohn 4:20, 21) Soangen kapakap wet kin kakehlaka oh kakairada miniminpene en riatail kan. Patehng met, kapakap pwukat kin kasalehda me kitail ahneki limpoak me duwehte Krais. (Sohn 13:34, 35) Irair wet iei kisehn wahn sapwellimen Koht manaman. Ia duwe, emenemen kitail kin kapakapki sapwellimen Koht manaman oh peki rehn Siohwa en sewese kitail kasalehda wah kan duwehte limpoak, peren, popohl, kanengamah, kadek, kamwahu, pwoson, opampap, oh en kaunda paliwaratail? (Luk 11:13; Kal. 5:22, 23) Ma ei, atail lokaia oh wiewia kan pahn kasalehda me kitail kin kekeid oh momourki sapwellimen Koht manaman.—Wadek Kalesia 5:16, 25.a
11. Dahme kahrehda e konehng kitail en peki meteikan ren kapakapkin kitail?
11 Ma kitail esehda me neitail seri kan kin lelohng songosong en mwersuwed nan arail des kan nan sukuhl, kitail anahne kapakapkin irail oh pil doadoahngki iren Paipel kan pwehn sewese irail en mehlel oh dehr wia mehkot sapwung. Pohl padahkihong Kristian kan en Korint: “Se patohwan peki rehn Koht pwe kumwail dehpa wiahda sapwung ehu.” (2 Kor. 13:7) Soangen kapakap karakarahk wet kin kaparanda Siohwa oh kin kasalehda atail mwahu. (Wadek Lepin Padahk 15:8.) Kitail kak peki rehn meteikan en kapakapkin kitail, duwehte me wahnpoaron Pohl wia. E ntingihdi: “Kumwail woneweite kapakapkin kiht. Se pepehm me nan kapehdit me uhdahn mwakelekel, pwehki at kin men wia dahme pwung ahnsou koaros.”—Ipru 13:18.
Soahng Teikan me Atail Kapakap Kin Kasalehda Duwen Kitail
12. Ire dah kan me pahn keieu kesempwal nan atail kapakap?
12 Ia duwen, atail kapakap kin kasalehda me kitail Sounkadehdehn Siohwa peren oh ngoang kei? Atail pekipek ni karakarahk kin keieu pidada atail kin kapwaiada kupwuren Koht, kalohki rongamwahu en Wehio, kadehdehda sapwellimen Siohwa pwung en kaunda lahng oh sampah oh pil kasarawihlahn mware? Ire pwukat iei me pahn keieu kesempwal nan atail kapakap kan, duwehte me sansal nan sapwellimen Sises kapakap me tepikihda mahsen pwukat: “Samat me ketiket nanleng: Mwaromwi en sarawihla rehn aramas koaros, mweimwi en pweida wasa koaros, kupwuromwi en kin wiawi nin sampah duwen eh kin wiawi nanleng.”—Mad. 6:9, 10.
13, 14. Dahme atail kapakap kin kasalehda duwen kitail?
13 Atail kapakap ong Koht kin kasalehda duwen kahrepen atail wiewia kan, dahme kitail nsenohki oh pil atail ineng kan. Siohwa mwahngih soangen aramas dah kitail. Lepin Padahk 17:3 mahsanih: “Kohl oh silper kin sosohngki kisiniei, oh KAUN-O me kin sohng nan kapehd en aramas.” Koht kin mwahngih dahme mi nan mohngiongitail. (1 Sam. 16:7) E mwahngih atail pepehm ong atail mihting kan, atail kalohk, oh riatail kan. Siohwa kin mwahngih duwen atail madamadau ong rien Krais kan. (Mad. 25:40) E kin mwahngih ma kitail kin inengieng mehlel dahme kitail kapakapki de kitail kin ihte pwurepwurehng ndinda mehkan. Sises mahsanih: “Ni amwail kin kapakap, dehr kin pwurepwurehng nda soangen lokaiaohte, duwehte aramas en wehi kan kin wia, pwe re kin lemeleme [ni sapwung] me Koht pahn ketin karonge irail pwe re kin doadoahngki diren lokaia kan.”—Mad. 6:7, NW.
14 Dahme kitail kin nda nan atail kapakap pil kin kasalehda ia uwen atail kin koapworopworki Koht. Depit koasoia: “Komwi [Siohwa] me silepei, soundoarepei kehlail en pelian ei imwintihti kan. Komw ketin mweidohng ie pwe I en kin patopatohte nan mwoalomwi sarawi erein ei mour; pwe I en kin diar ei wasahn ruk oh meleilei pahn mwetehn nin limomwi.” (Mel. 61:3, 4) Ni ahnsou me Koht kin ketin “apwalih” kitail, kitail kin pehm sapwellime epwel mwahu oh pil duwen eh kin ketin pere kitail. (Kaud. 7:15) Ia uwen eh kin kansenamwahu en karanihala Siohwa ni kapakap oh kamehlele me e kin ketin ‘ieiang kitail’ ni ahnsou me soangsoangen kasongosong kan kin lelohng kitail!—Wadek Melkahka 118:5-9.
15, 16. Dahme kapakap kin sewese kitail en wehwehkihla me pid atail ineng en men ale pwukoa kan nan mwomwohdiso?
15 En kapakap ong Siohwa ni mehlel pahn sewese kitail en wehwehkihla duwen kahrepen atail wiewia kan. Karasepe, atail kin men papah nin duwen sounapwalih men nanpwungen sapwellimen Koht aramas akan kin kohsang atail men papah irail ni lamalam aktikitik oh wia uwen atail kak nan doadoahk en kalohk oh pil nan mwomwohdiso? De kitail kin men “keieu” oh men “kaunda” meteikan? Met sohte konehng wiawi nanpwungen sapwellimen Siohwa aramas akan. (Wadek 3 Sohn 9;b Luk 22:24-27.) Ma kitail ahneki soangen ineng sapwung kan, atail kapakap ong Siohwa ni mehlel pahn kak kapwarehda soangen ineng pwukat oh sewese kitail en wekidala ineng pwukat mwohn re tengala nan loalatail.
16 Lih pwopwoud Kristian akan ele men arail pwoud kan en papah nin duwen sounsawas kan oh mwehin ehu rahn wiahla sounapwalih de elder men. Lih Kristian pwukat ele kak nantihong wiahda mehn kahlemeng mwahu kan me pahn pahrekiong dahme irail kin kapakapki. Met kesempwal pwehki lokaia oh wiewiahn ahn ohl emen eh peneinei kin pidada mwomwen en mwomwohdiso kin kilangwohng ih.
Wiliandi Meteikan oh Kapakap
17. Dahme kahrehda e mwahu en kelehpwla oh kapakap?
17 Pak tohto Sises kin ketila sang pokon akan pwehn kalapwukala oh loulou ong Semeo. (Mad. 14:13; Luk 5:16; 6:12) Kitail pil anahne kelehpwla oh kapakap. En kapakap ni wasa meleilei pahn sewese kitail en wiahda pilipil kan me pahn kaperenda Siohwa oh sewese kitail en kehlail nan atail kaudok ong ih. Ahpw Sises pil kin ketin wiliandi wehipokon oh loulou, oh e konehng kitail en tehk ia duwen met eh kak wiawi ni pwung.
18. Ia ekei ire kesempwal me brother kan anahne tamataman ni arail kin wiliandi mwomwohdiso oh kapakap?
18 Nan atail mihting kan, ohl lelepek kan kin wiliandi mwomwohdiso oh kapakap. Tohn mwomwohdiso kan anahne nda “amen,” me wehwehki “en pweida,” ni kaimwiseklahn kapakap. Ahpw en wia met, irail anahne pwungki audepen kapakapo. Sohte mehkot kapwuriamwei de kansensuwed mi nan sapwellimen Sises loulou. (Luk 11:2-4) E pil sohte ketin oaritikiada anahn akan de kahpwal kan koaros en emenemen me rongorong ih. Mehkan me pid en emenemen eh mour kin wia ire kei me konehng pein irail en kapakapki, ahpw kaidehn ong wehipokon. Ni atail kin wiliandi pwihn ehu kapakap, kitail en dehr kapatahiong soahng kan me meteikan sohte anahne iang ese.
19. Ia pahn atail wiewia ni ahnsoun kapakap nan mihting?
19 Ni ahnsou me kitail wiliandi meteikan oh kapakap, kitail anahne en kasalehda atail “lemmwiki Koht.” (1 Pit. 2:17) Mie ahnsou de wasa ong ekei wiewia kan me sohte konehng wiawi nan mihting en Kristian akan. (Ekl. 3:1) Karasepe, ia duwen ma emen kin men koaros nan pwihn ehu en kol peh ni ahnsoun kapakap? Met kakete kerempwa de kansensuwedihala meteikan, pil iangahki irail akan me iang mihting ahpw sohte mi nan padahk mehlel. Ekei pwopwoud kan ele kin kol peh, ahpw ma ira pahn pwoaloapwoal ni ahnsoun kapakap, meteikan me kilang kakete dipekelekelki met. Irail kakete leme me pwopwoudo kin medemedewe duwen ara limpoak a kaidehn wahu ong Siohwa. Soahng koaros kitail en “wia ong ni kalinganpen Koht” pwehki kitail wauneki ih. Kitail en liksang wiewia kan me kak kerempwa, de kapwuriamwei, de kadipekelekelih meteikan.—1 Kor. 10:31, 32; 2 Kor. 6:3.
Dahme Kitail en Kapakapki?
20. Ia duwen omw pahn kawehwe Rom 8:26, 27?
20 Ekei pak, kitail kin sehse dahme kitail pahn nda nan pein atail kapakap kan. Pohl ntingihdi: “Duwehte met sapwellimen Koht manaman pil kin iang sewese atail luwet; pwe ni atail kin sehse dahme kitail pahn anahne kapakapki duwen kahpwal, ahpw pein manamano kin peki kin kitail ni atail kin weirek oh sohte kak kasalehda. Ahpw ih [Koht] me kin ketin kasawih mohngiong kan kin mwahngih wehwehn manamano, pwehki e kin pekipeki nin duwen kupwuren Koht ong me sarawi kan.” (Rom 8:26, 27, NW) Siohwa ketin kahrehiong kapakap tohto en ntingdi nan Paipel. E kin ketin kilangwohng pekipek pwukat nin duwen pein atail oh kin ketin kapwaiada mepwukat. Koht mwahngih duwen kitail oh wehwehn soahng kan me sapwellime manaman kin kamwakid sounnting en Paipel kan en kasalehda. Siohwa kin ketin sapeng atail pekipek ni karakarahk ni ahnsou me sapwellime manaman kin “peki” kin kitail. Ahpw ni atail wehwehkihla sapwellimen Koht Mahsen, kitail pahn esehla dahme kitail anahne kapakapki.
21. Dahme kitail pahn tehk nan iren onop en mwuhr?
21 Nin duwen me kitail sukuhlkier, atail kapakap kin kasalehda laud duwen kitail. Karasepe, atail kapakap kak kasalehda ia uwen atail kin karanih Siohwa oh ia uwen atail ese sapwellime Mahsen. (Seims 4:8) Nan iren onop en mwuhr, kitail pahn tehk ekei kapakap kan oh lokaia kan me kadoadoahk nan kapakap me kileldi nan Paipel. Ia duwen atail kasawih iren Paipel kan eh pahn kamwakid atail pwarowohng Koht ni kapakap?
[Nting tikitik me mi pahs]
a Kalesia 5:16, 25 (NW): “Ahpw I koasoia, Kumwail weweidki sapwellimen Koht manaman oh kumwail sohte douluhl pahn kapwaiada ineng en uduk. Ma kitail kin momourki sapwellimen Koht manaman, kitail en pil woneweite kekeidki manaman wet ni soandi mwahu.”
b 3 Sohn 9 (NW): “I ntingihdi mehkot ong mwomwohdiso, ahpw Diohtrepihs, me kin men keieu nanpwungarail, sohte kin alehdi mehkot sang reht ni wahu.”
Ia Duwen Omw Pahn Sapeng?
• Ia pahn duwen atail madamadau ni atail pwarowohng Siohwa ni kapakap?
• Dahme kahrehda kitail kin kapakapki iengetail me pwoson akan?
• Dahme atail kapakap kin kasalehda duwen kitail oh kahrepen atail wiewia kan?
• Ia pahn duwen atail wiewia ni ahnsoun kapakap nan mihting?
[Kawehwehpen kilel kan nan ehu ehu pali 10]
Ke kin kaukaule kapinga oh kasalehda kalahngan ong Siohwa?
[Kawehwehpen kilel kan nan ehu ehu pali 12]
Mwomwatail ni ahnsoun kapakap nan mihting anahne kawauwih Siohwa ahnsou koaros