“Kehsehki Koht Amwail Pekipek Kan”
“En wia mehkoaros ni kapakap oh pekipek karakarahk iangahki kapingkalahngan kehsehki Koht amwail pekipek kan.”—PILIPAI 4:6.
1. Ihs me kitail ahneki saledek en koasoiong, oh dahme kahrehda e wia mehkot kaselel?
MA KE peki ken wia mihding kesempwal ieu ohng kaun me keieu lapalap en ahmw wehio, dahme ke leme e pahn nda? Ele ke pahn alehdi pasapeng wahu sang tohn ah ohpiso, ahpw pali laud en ahnsou ke pahn sohte mweimwei ohng koasoi ohng uhdahn kauno. Ahpw, ohng Kaun me lapalap sang kaun koaros, Siohwa Koht, me Kaunepen lahng oh sampah, met inenen weksang douluhl. Kitail kak tuhwong ih wasa koaros me kitail mihmi ie oh ahnsou koaros me kitail mwahuki. Kapakap konehng koaros pahn kin lelohng ih ahnsou koaros. (Lepin Padahk 15:29) Met inenen mwahu! Atail kalahnganki irair wet sou konehng kamwekid kitail en kin kapakap kaukaule ohng Ih me mwarenki “Soun Karonge Kapakap”?—Melkahka 65:2.
2. Dahme anahn pwe Koht en kupwurki atail kapakap akan?
2 Ahpw, aramas kak peidengki, ‘Soangen kapakap dah kan me Koht ketin kupwurki?’ Paipel kawehwehda ehu irair me kesempwal pwe kapakap akan en pwung ni ah mahsanih: “Sohte me kak kenikenla pahn kupwur en Koht ma sohte eh pwoson. Pwe mehmen me men kowohng rehn Koht uhdahn pahn kamehlele me Koht ketin mie, oh me Koht kin ketin katingih irail kan me kin raparapahki.” (Ipru 11:6) Duwen ah kawehwehdahr nan artikel en mwohn met, me keieu kesempwal nan kapakap ohng Koht iei pwoson. Koht kupwurki kapakap akan en irail me kin pekipek reh, ahpw irail en wia ni pwoson oh ni doadoahk pwung oh mehlel, oh pil sang nan mohngiong mwahu.
3. (a) Nin duwen me sansal sang rehn irail ladu lelepek kan en kawao, soangen kasaladahn koasoi dah kan me kak wiawi? (b) Atail kapakap akan kak wiawi ni mwohmw dah kan?
3 Wahnpoaron Pohl kangoangehki Kristian akan nan ah ahnsou oh mahsanih: “Kumwail dehr pwunodki mehkot, ahpw en wia mehkoaros ni kapakap oh pekipek karakarahk iangahki kapingkalahngan, kehsehki Koht amwail pekipek kan.” (Pilipai 4:6, 7) Nan Paipel mie karasepe tohto en irail akan me kin wahdohng Koht arail katoutou kan. Nanpwungen irail pwukat iei Ana, Elaisa, Esekaia, oh Daniel. (1 Samuel 2:1-10; 1 Nanmwarki 18:36, 37; 2 Nanmwarki 19:15-19; Daniel 9:3-21) Kitail en kahlemengih irail. Tehk me mahsen en Pohl kasalehda me atail kapakap akan kin wiawi ni soangen mwohmw ekei. E koasoia duwen kapingkalahngan, me wehwehki kapakap me kitail kin kasalehda atail kalahnganki dahme Koht ketin wiahiong kitail. Met pil kak wiawi iangahki atail kaping. Pekipek karakarahk, kin wehwehki kasalada ni lokaiahn wauneki oh sang kapehde mehlel. Oh kitail kak wia pekipek, oaritikiada atail anahn akan. (Luk 11:2, 3) Samatail nanleng kin kupwurperenki en ketin kapwaiong kitail atail pekipek kan me kitail wia ni soangen ahl pwukat.
4. Edetehn Siohwa mwahngih atail anahn akan, dahme kahrehda kitail en peki reh?
4 Ekei aramas kak peidengki, ‘Siohwa kin mwahngihier atail anahn akan koaros?’ Ehi, e mwahngih. (Madiu 6:8, 32) Eri, dahme kahrehda e pil kupwurki kitail en wiahki pekipek ong ih? Tehk mahs karasepe wet: Soun netinet men kak kihong kisakis ohng ekei me kin pwain ah kepwe kan. Ahpw, pwe aramas en ale kisakiso, irail anahne kohdo rehn me ahneki sidohwa oh pein alehsang reh. Irail akan me sohte nsenohki wia met kin wia kasalepen me irail sohte perenki kisakiso. Pil ni mwohmwohte, ni atail soukautihong kasalehda atail pekipek kan nan kapakap pil kin wia kasalepen me kitail sohte perenki dahme Siohwa kin ketikihda. Sises mahsanih: “Peki ah kumwail pahn ale.” (Sohn 16:24) Sang ni ahl wet, kitail kin kasalehda me kitail kin kehliki Koht.
Ia Mwomwen Atail en Pwaredohng Mwohn Koht?
5. Dahme kahrehda kitail anahne kapakap ni mwaren Sises?
5 Siohwa sohte kin ketikihdi kosonned kehlail akan ohng iaduwen atail pahn kapakap. Ahpw, kitail anahne sukuhliki ahl pwung ohng pwaredohng mwohn Koht, nin duwen me kawehwehpe mie nan Paipel. Karasepe, Sises padahkiong sapwellime werek kan: “Sahmo pahn ketikihong kumwail mehkoaros me kumwail pahn peki reh ni edei.” (Sohn 16:23) Kahrehda, kitail uhdahn pahn wia kapakap ni mwaren Sises, pohnese me Sises ieite elen ale kapai en Koht akan ohng tohn sampah.
6. Ni ahnsou en kapakap, soangen mwomwen soandi en paliwar dah me kitail en wia?
6 Ia pahn mwomwen soandi en paliwaratail ni ahnsou en kapakap? Nan Paipel, sohte mwomwen soandi en paliwar ieu me dene ma kitail wia oh Koht pahn karonge atail kapakap. (1 Nanmwarki 8:22; Nehmaia 8:6; Mark 11:25; Luk 22:41) Dahme kesempwal iei kitail en kapakap ong Koht ni mehlel oh ahneki ineng en mohngiong pwung.—Soel 2:12, 13.
7. (a) Ia wehwehn “amen”? (b) Iaduwen e kin konehng iang atail kapakap akan?
7 Ahpw iaduwen nda “amen”? Pwuhk Sarawi kasalehda me e konehng wia kaimwisekpen atail kapakap, ahpw mehlel ni ahnsou me atail kapakap kin wiawi nan pokon en aramas ieu. (Melkahka 72:19; 89:52) Lepin lokaiahn Ipru ʼa·menʹ ni lokaia mengei kin wehwehki “e mehlel.” Nein McClintock oh Strong Cyclopedia kin kawehwehda me kesempwalpen aramas en nda “Amen” ni imwin kapakap akan iei en “kamehlelehda kasaladah kan me wiawihier mwowe me pwung, oh peki ren pweida.” Kahrehda, ni ah kin mehlel oh kaimwisekihla “Amen,” aramas me wia kapakapo kin kasalehda ah ngoangki dahme e koasoia. Ni ahnsou me Kristian emen wiliandi mwomwohdiso ieu oh wia kapakap oh kaimwisekihla lepin mahsen lepet, irail me rongorong kan pahn iang nda “Amen” nan kapehderail de pil ngihl laud pwehn kasalehda me irail inenen utung audepen kapakapo.—1 Korint 14:16.
8. Iaduwen ekei atail kapakap akan a kak duwehte ahn Seikop oh Eipraam kapakap akan, oh dahme me pahn kasalehda duwen kitail?
8 Mie ekei ahnsou me Koht pahn ketin mweidohng kitail en kasalehda loal en atail nsenohki dahme kitail kapakapki. Kitail kak anahne en duwehla Seikop me mihmi kawao, me poadoar ohng tohnleng emen pwong ehu pwon pwe en kak alehdi kapai. (Senesis 32:24-26) De pil ekei pak kitail ele anahne duwehte Eipraam, me kin kapwukapwurehiong oh kapakapki Lohd oh aramas pwung teikan me mihmi nan Sodom ohng Siohwa. (Senesis 18:22-33) Ni ahlohte ele kitail kin peki rehn Siohwa soahng kan me kesempwal ohng kitail, de kaperen ong kupwure pwehki e poahsoankihda sapwellime kopwungpwung, limpoak-kadek, oh sapwellime mahk.
Dahme Kitail Kak Peki?
9. Dahme kitail pahn keieu nsenohki ni ahnsou me kitail wia kapakap?
9 Tamanda me Pohl mahsanih: “Ni mehkoaros . . . kehsehki Koht amwail pekipek kan.” (Pilipai 4:6) Kahrehda, pein atail kapakap akan kak sairada irair en mour koaros. Ahpw, me kitail en keieu nsenohki nan atail kapakap akan iei mehkan me kin kaperenda kupwuren Siohwa. Daniel kihda mehn kahlemeng mwahu ohng met. Ahnsou me wehin Israel ale kalokolok pwehki diparail akan, Daniel peki rehn Siohwa en ketin mahkohng irail, ni ah mahsanih: “Komw dehr pwand, ohng pein kamwahupemwi, Maing ei Koht, ohng kalinganpen mwaromwi.” (Daniel 9:15-19) Iaduwe, atail kapakap akan pil kin kasalehda kasarawihpen mwaren Siohwa oh pweidahn sapwellime kupwur me iei me kitail keieu kesempwaliki?
10. Iaduwen atail ese me e konehng kitail en kapakapki mehkan me mwahu ohng kitail?
10 E pil konehng kitail en peki mehkan me pahn mwahu ohng kitail. Karasepe, duwehte soun melkahkao, kitail kak kapakapki atail wehwehkihla ire loal ngenin kan. E kapakapki: “Komw ketin kawehwehiong ie sapwellimomwi kosonned kan, oh I pahn kapwaiada ni mohngiongi unsek.” (Melkahka 119:33, 34; Kolose 1:9, 10) Sises “ketin loulou oh peki ni ngidingid oh kapitie laudida, iangahki pilen silangi, ong Koht me kak doarehsang pwoula.” (Ipru 5:7) Ni ah ketin wia met, e ketin kasalehda duwen ah konehng kitail en peki kehl ni ahnsou me kitail lelohng kahpwal oh kalokolok kan. Ni ahnsou me Sises padahkiong sapwellime wahnpoaron kan iaduwen arail pahn kin wia kapakap, Sises mahsanih duwen irair me pid ahn emenemen mour, duwehte mahkpen dihp akan oh mwengehn ehuehu rahn.
11. Iaduwen kapakap ah kak sewesei kitail pwe kitail dehr pwupwudiong nan kasongosong?
11 Nan karasepen kapakap wet, Sises kapatahiong pekipek wet: “Komw dehr ketin mweidohng kiht se en kin lelohng nan songosong laud, a komw ketin nekid kiht sang ni me suwed en Sehdan.” (Madiu 6:9-13) Mwurin mwo e ketikihda kaweid: “Kumwail pepehd oh kapakap pwe kumwail dehr lohdiong nan songosong.” (Madiu 26:41) E kesempwal kitail en kin kapakap ni ahnsou me atail kin lel songosong. Kitail kak lelohng kasongosong pwe kitail en dehr peikiong kaweid en Paipel akan nan atail wasahn doadoahk de nan sukuhl. Irail me sohte iang Sounkadehdehn Siohwa kan kak lukei kitail en iang irail nan wiewia soh konehng kan. Irail kak ndahiong kitail en iang wia mehkot me pahn kotehla kaweid en wiewia pwung kan. Nan soangen ahnsou pwukat, e pahn mwahu kitail en dadaurete kaweid en Sises me kitail en kapakap—mwohn atail lelohng songosong oh pil ahnsou me kitail mihier nan kasongosong—peki rehn Koht en sewesei kitail pwe kitail en dehpa pwupwudi.
12. Soangen kapwunod dah kan me kin kahrehda kitail en kapakap, oh dahme kitail en kasik sang Siohwa?
12 Soangsoangen apwal oh kapwunod akan kin pwarada nan mour en sapwellimen Koht ladu kan nan rahn wet. Soumwahu oh kahpwal en madamadau wia irair me keieu pohsonnihada kapwunod nan mour en aramas tohto. Wiewiahn loallap akan me pidakihkitailpene kin wiahda mour kapwunod. Apwallahn pai en wehi kan wiahda koukousoan en apwal. Ia uwen nohn kansenamwahu en ese me Siohwa kin karonge sapwellime ladu kan me kin pwarkihdohng ih mehpwukat ni kapakap! Melkahka 102:17 mahsanihki duwen Siohwa: “E pahn ketin karonge sapwellime aramas me lekdeklahr akan oh karonge ar kapakap.”
13. (a) Soangen irair dah kan me pein atail me konehng kitail en kapakapki? (b) Koasoiahda karasepen soangen kapakap wet.
13 Ni mehlel, soahng sou lipilipil me pahn kerempwahla atail papah Siohwa de atail ehuong ih kak wia audepe konehng kitail en kapakapki. (1 Sohn 5:14) Ma mie omw pilipil me ke pahn wiahda ohng me pid pwopwoud de repen doadoahk de kalaudehla atail doadoahk en kalohk, kitail en saledek oh wahdo mepwukat mwohn Koht, peki reh sapwellime kaweid. Karasepe, serepein pwulopwul men nan Philippines men wiahla sounkalohk kaukaule men. Ahpw, sohte ah doadoahk en mwohni en sewesehki ah anahn pwehn kak wia sounkalohk kaukaule men. E koasoia: “Ehu Rahn Kaunop, I kapakap ohng Siohwa wehkohng ih ni oaritik me pid wiahla pioneer. Mwuri ekis nan rahnohte, ni ahi wia kalohkseli, I kihong pwuhk ehu rehn me pwulopwul men. Ni sohte kahrepe, serepein pwulopwulo nda: ‘Ke anahne kohla ni wasahn ahi sukuhl ni menseng en Ni Ehd wet.’ Ngehi eri idek, ‘Pwekida?’ Ih eri kawehwehiong ie me mie doadoahk ieu me ahpwtehn langahda oh anahne aramas ni ahnsou karuwaru. Ngehi kohla oh irail aleiehda ahnsowohte. Kisin ahnsoukis a soahng koaros wiawi.” Sounkadehde tohto pidakihdi sampah pwon kin ahneki soangen ekspiriens duwehte met. Kahrehda ke dehr perki wahdohng mwohn Koht audepen mohngiongomw ni kapakap!
Iaduwen ma Kitail Wiahda Dihp?
14, 15. (a) Dahme kahrehda aramas emen en dehr uhdihsang wia kapakap ma e wiahda dihp? (b) Likin pein kapakap, pil dahme pahn sewese aramas emen en mwahula sang dipe?
14 Iaduwen kapakap ah kak sawas ma aramas emen wiahda dihp? Pwehki namenek, ekei aramas me kin wiahda dihp kin sohla kapakap. Ahpw, met kaidehn elen loalokong kitail en wia. Karasepe: Pailet en Sompihr akan ese me ma re salongala, irail kak koasoiong ‘air traffic controllers’ pwe irail en ale sawas. Ahpw, iaduwen, ma pailet salongalah men perki kehsehki ‘controllers’ me e salongalahr pwehki e namenek nda me e salongala? Met kak imwikihla mehkot laud! Ni ahl wette, ma aramas men wiahda dihp oh namenengki kapakap ohng Koht kak lelohng kahpwal me laudsang. Namenengki wiahda dihp en dehr kahrehda aramaso en sohla koasoiong Siohwa. Ni mehlel, Koht ketin luhkehkin irail oko me wiahda dihp toutou kan en kapakap ong ih. Soukohp Aiseia kangoangehki aramas dipan akan nan ah mwehio ren likweriong Siohwa, “pwe ih me kupwurkalahngan oh kin mwadang mahkikihong kitail dipatail kan” (Aiseia 55:6, 7) E pil mehlel me aramas emen anahne ‘kaparanda kupwur en Siohwa’ sang ni eh pahn kapwungala mahs irair en nan ah mohngiong oh wekidekweisang elen dihp oh koluhla mehlel.—Melkahka 119:58; Daniel 9:13.
15 Wasa me dihp pwarada ie, kapakap kin inenen kesempwal en wiawi. Tohnpadahk Seims mahsanihki aramas emen me anahne sawas en pali ngehn: “En ekerodo me mah kan en mwomwohdiso pwe re en kapakapki ih, . . . oh Kauno pahn ketin kakehlahda.” (Seims 5:14, 15) Ehi, aramas emen anahne en pein wehkada dipe ohng Siohwa ni kapakap, ahpw e kak pil peki rehn ohl mah kan en kapakapki ih. Met pahn sewese ih nan ah mwahulahn pali ngehn.
Pasapeng Kan ohng Kapakap Akan
16, 17. (a) Iaduwen Siohwa kin ketin sapeng kapakap? (b) Ekspiriens dah kei me kasalehda me kapakap oh doadoahk en kalohk kin sawaspene?
16 Iaduwen kapakap akan ahr kin pasapeng? Ekei kak ale pasapeng mwadang oh sansal mwahu. (2 Nanmwarki 20:1-6) Ah ekei kak werei, oh pasapeng kan pahn sohte mengei en kilang me e pasapengehr. Duwen sansal nan sapwellimen Sises karasaras duwen liohdi me pwurepwure sounkopwung, kahrehda ekei pak e pil kin anahn emen en pwurepwure Koht ni kapakap. (Luk 18:1-8) Ahpw, kitail en ese me ni ahnsou me kitail kin kapakapki soahng me pahrekiong kupwuren Koht, Siohwa sohte pahn mahsanihong kitail: “Ke dehr kedirepwe ie”—Luk 11:5-9.
17 Sapwellimen Siohwa aramas akan kin ale pasapengpen ahr kapakap pak tohto. Met kin kalap sansal nan ahnsou en kalohk. Karasepe, Kristian sister riemen nan Phillipines kin wia kihseli pwuhk sawasepen Paipel nan wasakis me doh likin kahnimw. Ni ara kihong tract rehn lih emen, pilen mese dirpene. E nda: “Pwohng I kapakap ong Koht en kadarodo emen aramas en pwehn padahkiong ie Paipel, oh I leme met iei pasapengpen ahi kapakap.” Mwurinte mwo, liho tepida iang mihding nan Kingdom Hall. Nan ehu wasa nan Palieir en Eisia, Kristian brother men masak kalohk nan wasa me ihmw kan kin kehlda oh aramas sohte kin kohkohla mwahl wasao. Ahpw, e kapakap ohng Siohwa, ih kommwadada, oh pedolong nan ihmwo. E letelet ni wenihmw en apartment ehu, oh peinakapw emen pwarado. Ni ahnsou me brother kawehwehda kahrepen ah pwaredo wasao, serepeino tepida sengiseng. E nda me e kin wie raparapahki Sounkadehdehn Siohwa kan oh kin kapakap peki sawas en diar irail. Brothero perenkihda en sewese ih en kalelehlang ni mwomwohdisohn Sounkadehdehn Siohwa kan.
18. (a) Ni atail kapakap akan kin pasapeng, dahme kitail en wia? (b) Dahme kitail en koapwoaroapwoarki ma kitail kin kapakap ni ahnsou mwahu koaros?
18 Kapakap wia sawas kaselel. Siohwa kin ketin onohnop karonge oh sapeng kapakap. (Aiseia 30:18, 19) Ahpw, kitail anahne tehk kanaiehng iaduwen Siohwa eh kin ketin sapeng atail kapakap akan. E kak pwarada ni mwohmw me kitail sohte kasik. Ahpw, ni atail wehwehkihda sapwellime kaweid, kitail dehpa manokehla en kasalehda atail kalahngan oh kaping ohng ih. (1 Deselonika 5:18) Laud sang met, ahnsou koaros tamataman ahn wahnpoaron Pohl kehkehlik: “En wia mehkoaros ni kapakap oh pekipek karakarahk iangahki kapingkalahngan, kehsehki Koht amwail pekipek kan.” Ei, isaneki ahnsou mwahu kan koaros en koasoiong Koht. Ni ahl wet, ke pahn kaukaule ale mehlelpen dahme Pohl mahsanih duwen irail oko me ale pasapengpen arail kapakap: “Sapwellimen Koht popohl, me inenen laudsang uwen atail dehdehki, ahpw pahn nekinekid mohngiongimwail oh pil amwail lamalam.”—Pilipai 4:6, 7.
Ke Kak Sapeng?
• Ni soangen mwohmw dah me kitail en wia atail kapakap akan?
• Iaduwen atail pahn wia kapakap?
• Ia pahn audepen atail kapakap akan?
• Ia katepen kapakap ni ahnsou me aramas emen wiahda dihp?
[Kawehwehpen kilel kan nan ehu ehu pali 21]
Kapakap me kohsang nan mohngiongatail kin sewese kitail en dehr lohdi pahn kasongosong kan
[Kawehwehpen kilel kan nan ehu ehu pali 23]
Ni kapakap, kitail kin kasalehong Koht atail kalahngan, nsenoh, oh pekipek kan