Irelaud 16
Iaduwen Omw Kak Karanihala Koht
1. Soahng dah kan me kin wiawi nan sarawi tohto me duwepenehte?
EMEN lih me seiloaklahng ehu wehi nan sampah me aramas kin kahdaneki “Orient” pwuriamweiki kilang soangen wiepen sarawi kan nan imwen kaudok en Buddha. Edetehn sansal takai ko kaidehn sansal takai en Mery de Sises, tohtohn wiepen sarawi pwukat me e kilang duwehte soangen wiepen sarawi kan nan sarawi me e iang nan pein ah wasa. Karasepe ieu, e kilangada me re kin doadoahngki rosario oh kin mwomwen koulki arail kapakap akan. Aramas teikan pil kilangehr me soahng pwukat sohte weksang soangen wiepen sarawi kan me kin wiawi nan pein arail wasa. Wasa koaros nan sampah, soahng kan me aramas kin doadoahngki oh wia pwehn karanih Koht oh dikedik kan me re kin kaudokiong kin kereniong duwepenehte.
2. Iaduwen aramas kin kawehwehda duwen wehwehn kapakap, oh dahme kahrehda aramas tohto kin kapakap?
2 Aramas tohto kin song en karanih Koht ni arail kin kapakap ong Ih. Aramas kin kawehwe me kapakap wehwehki “elen koasoakoasoi ieu en aramas ohng Koht de ohng mehkan me kin ahneki kehl lapalap.” (The New Encyclopædia Britannica) Ahpw, nin doken aramas kin kapakap ohng Koht, ekei kin medemedewehte dahme pahn mwahu ohng pein irail. Karasepe ieu, ohl emen idek rehn Sounkadehdehn Siohwa men: “Ma ke pahn kapakapkin ie, e pahn kak kamwahuwihala kahpwal kan me mie nan ahi peneinei, ahi wasahn doadoahk, oh paliwerei pahn kak kehlailda?” E sansal me iei me ohl menet kamehlele me pahn wiawi, ahpw aramas tohto kin kapakap oh diarada me arail kahpwal akan mihmihte. Eri, kitail kak idek, ‘Dahme kahrehda kitail en uhdahn karanihki Koht?’
DAHME KAHREHDA KITAIL EN KARANIH KOHT
3. Ihs me kitail en kapakap ong, oh pwekihda?
3 Kapakap kaidehn en wiawi ni mwohmw oh sohte mouren audepe kan, oh kaidehnte en wia ahl ehu pwe kitail en alehkihdi mehkot. Kahrepe keieu kesempwal kitail en kapakap iei en karanih Koht pwe kitail en ahnekihla kerenpene ieu de ehupene ieu nanpwungen Ih oh kitail. Eri, kitail en kapakap ong Siohwa Koht. Sounmelkahka David mahsanih: “Siohwa kin ketin karanih irail koaros me kin likweriong Ih.” (Melkahka 145:18, NW) Siohwa kin luhke kitail en ahnekihla ehupene meleilei ieu ohng Ih. (Aiseia 1:18) Irail akan me kin alehda luhk wet kin iang pwungki sounmelkahka me mahsanih: “Ah ohng ngehi, karanih Koht kin mwahu ohng ie.” Pwekihda? Pwehki irail akan me kin karanih Siohwa Koht pahn ale kapai en ahneki peren mehlel oh meleilei en madamadau.—Melkahka 73:28, NW.
4, 5. (a) Dahme kahrehda e kesempwal en kapakap ong Koht? (b) Soangen ehupene dah me kitail kak wiahda ong Koht sang ni atail kin kapakap?
4 Dahme kahrehda kitail anahne kapakap oh peki rehn Koht sawas ma E ketin ‘mwahngihier dahme kitail anahne mwohn atail peki reh’? (Madiu 6:8, NW; Melkahka 139:4) Kapakap kin kasalehda me kitail pwoson Koht oh kitail wehwehki me Ih me Utupen “soangen wiewia sapan koaros oh kisakis mwahu koaros.” (Seims 1:17; Ipru 11:6) Siohwa kin ketin kupwurperenki atail kapakap akan. (Lepin Padahk 15:8) E kin ketin kupwurperenki en karonge atail pato ni peren oh wehwe mwahu kan oh iangahki kaping, duwehte sahm emen me kin perenki ni ah kin rong nah seri tikitik men kin kasalehda mehlel lokaiahn kaping kan. (Melkahka 119:108) Ma mie ehupene mwahu nanpwungen pahpa oh nah seri, eri kin mie kaperen en koasoakoasoipene nanpwungara. Seri men me kin ale limpoak sang eh papah kin perenki koasoakoasoiong ih. Met pil kin duwehte atail irair en ehu ong Koht. Ma kitail uhdahn kin perenki dahme kitail kin sukuhliki duwen Siohwa oh perenki limpoak me E kin ketin kasalehong kitail, kitail pahn ahneki pepehm kehlail en wehkada loaletail ohng Ih ni kapakap.—1 Sohn 4:16-18.
5 Ni atail pahn patohdong rehn Koht me Keieu Lapalahpie, kitail pahn uhdahn kasalehda wahu, ahpw kitail sohte anahne nohn ngoangkihla mehnia lepin lokaia kan me kitail pahn doadoahngki. (Ipru 4:16) Kitail kak pwaredohng rehn Siohwa ni ahnsou kan koaros. Oh ia uwen atail pai pwehki atail kak ‘wehkada mohngiongatail’ ohng Koht ni kapakap! (Melkahka 62:8) Kalahngankihong Siohwa soahng koaros me E kin ketin wia kin kahrehong kitail en men ahneki nanpwung mwahu reh, ni soangen mwohmwohte me Eipraam kin paiekihda ni ah kin wia kompoakepahn Koht. (Seims 2:23) Ahpw, ni atail kin kapakap ong Kaun me Keieu Lapalap nanleng oh sampah, kitail uhdahn pahn wia ni uhdahn dahme anahnepe mie ohng wiepen atail pahn patohdohng reh.
DAHME KITAIL ANAHNE WIA PWEHN KARANIH KOHT
6, 7. Edetehn Koht sohte kupwurki kitail en pwainki Ih mwohni pwehn kak karonge atail kapakap akan, dahme E kin ketin kupwurki sang rehtail ni ahnsou me kitail kin kapakap?
6 Mwohni anahn pwe aramas en kak patohdohng rehn Koht? Aramas tohto kin pwain kaunen lamalam akan en kapakapkin irail. Ekei pil kin kamehlele me arail kapakap akan pahn ale pasapengpe me pahn pahrekiong uwen meirong kan me re kin kihda. Ahpw, sapwellimen Koht Mahsen sohte kasalehda me meirongki mwohni wia anahn ieu pwehn kahrehong kitail en kak kapakap ohng Siohwa. Sapwellime kisakis kan en ngehn oh kapai kan en ahneki nanpwung mwahu ohng Ih ni atail kapakap kin mie ni sohte isepen mwohni.—Aiseia 55:1, 2.
7 Eri, dahme anahn? Ahneki mohngiong me poahsoankihda madamadau pwung kin wia anahn kesempwal ieu. (2 Kronikel 6:29, 30; Lepin Padahk 15:11) Kitail en pwoson Siohwa Koht nan mohngiongatail me Ih me kin wia “Sounkaronge kapakap” oh “soun ise irail akan me kin rapahki Ih ni mehlel.” (Melkahka 65:2, NW; Ipru 11:6, NW) Kitail pil uhdahn pahn ahneki mohngiong karakarahk. (2 Nanmwarki 22:19; Melkahka 51:17) Nan ehu sapwellimen Sises karasaras kan, e kasalehda me, ni ahnsoun patohdohng rehn Koht, sounrik daksis men me ahneki mohngiong karakarahk pwung sang Parisi me aklapalap. (Luk 18:10-14) Ni atail patohdong rehn Koht nan atail kapakap, kitail en tamataman me “irail koaros me kin ahneki mohngiong aklapalap kin wia mehkot me Siohwa kin ketin kalahdeki.”—Lepin Padahk 16:5, NW.
8. Ma kitail men Koht en ketin sapeng atail kapakap akan, dahme kitail en kamwakele sang pein kitail?
8 Ma kitail men Koht en ketin sapeng atail kapakap akan, kitail uhdahn pahn kamwakele kitail sang wiewiahn dihp. Ahnsou me wahnpoaron Seims kangoange meteikan en kohdohng rehn Koht, e kapatahiong: “Kumwail me dipan akan, kumwail kamwakelehda pehmwail kan. Kumwail me mwalaun kan, kumwail kaminehla loalamwail kan.” (Seims 4:8) Pil irail me dipan akan kak ahnekihda ehupenehn popohl rehn Siohwa ma re pahn koluhla mehlel oh kesehla arail mour en mahs. (Lepin Padahk 28:13) Siohwa sohte pahn kak karonge atail kapakap akan ma kitail kin mwomwehdahte me kitail kamwakelehdahr atail mour. Mahsen en Koht mahsanih: “Pwe silangin Siohwa kin mahmahsanih me pwung kan, oh E kin karonge ar pekipek kan; ahpw, silangin Siohwa kin uhwong me kin wia me suwed.”—1 Piter 3:12, NW.
9. Ki ihs me kitail kak pwarkihla mwohn Siohwa, oh pwekihda?
9 Paipel mahsanih: “Sohte aramas emen nin sampah me kin wia me pwung ahnsou koaros oh sohte sapwungala pak ehu.” (Eklesiasdes 7:20) Mwein ke pahn wia peidek wet: ‘Eri, ia mwomwen ahi pahn kak pwaredohng mwohn Siohwa Koht?’ Paipel sapeng mahsanih: “A ma emen pahn wiahda dihp, sounsawasapatail mie rehn Koht, iei Sises Krais, pwe ih me pwung.” (1 Sohn 2:1, NW) Edetehn kitail aramas dipan ekei, kitail kak pwaralahng mwohn Koht ni saledek en koasoi pwehki Sises Krais, me matkinkitailla oh pwainkitailda. (Madiu 20:28) Iei ih ete me ahl me kitail kak pwarekihla mwohn Siohwa Koht. (Sohn 14:6) Kitail dehr mwamwahleki menen meirong en pweinen dihp me Krais ketin wia oh lemeleme me sapwellime meirong en tomw pahn pwainla dipatail kan koaros iangahki dihp kan me kitail kin kaukaule wia ni atail ese me sapwung. (Ipru 10:26) Ahpw, ma kitail kin wia uwen atail kak koaros en dehr wia dahme suwed ahpw kitail pil pwupwudi ong nan dihp, kitail kak koluhla oh peki rehn Siohwa en ketin mahk ohng kitail. Ni atail kin pwarodohng Ih ki mohngiong karakarahk, E pahn ketin karonge kitail.—Luk 11:4.
AHNEKI AHNSOU MWAHU EN PATOH ONG KOHT
10. Iaduwen kitail kak alasang Sises me pid duwen kapakap, oh soangen ahnsou dah kan me kitail kak wia atail kapakap?
10 Sises Krais kin ketin kesempwaliki ah nanpwung mwahu rehn Siohwa. Kahrehda, Sises kin ketin katohrehla sapwellime ahnsou pwehn kin mahsen ong Koht ni ah kin ketin kalapwukala oh kasakas. (Mark 1:35; Luk 22:40-46) E pahn mwahu ong kitail ma kitail pahn kahlemengih Sises oh kin wia atail kapakap ohng Koht kaukaule. (Rom 12:12) E pahn kin konehng kitail en tepiada atail rahn ki kapakap, oh mwohn atail pahn kin meir, e pwung kitail en kin kalahngankihong Siohwa atail wiewia kan en rahno. Erein rahno, kitail en kapakap ong Koht “ahnsou koaros.” (Episos 6:18) Kitail pil kak wia atail kapakap nan kapehdatail, pwehki kitail wehwehki me Siohwa kak ketin karonge kitail. Kapakap ong Koht ni atail kelehpw pahn kak sewese kitail en katengepene atail irair en ehuiong Ih, oh pil kapakap ong Siohwa rahn koaros pahn kahrehong atail ehuiong Ih a pahn keren sang mahs.
11. (a) Dahme kahrehda peneinei kan anahne patpene kapakap? (b) Ia wehwehn atail kin nda “Amen” ni imwin atail kapakap?
11 Siohwa pil kin ketin karonge soangen kapakap me kin wiawi pwehn wilian pwihn en aramas ieu. (1 Nanmwarki 8:22-53) Kitail kak karanih Koht nin duwen peneinei ieu, ni ahnsou me tapwin peneinei kin wia kapakap. Met kin kakehlailihala ehupenehn peneineio, oh me pwulopwul kan kak kamehlelehla Siohwa ni arail pein rong arail pahpa oh nohno kin wia ara kapakap ohng Koht sang kapehd karakarahk. Ahpw, iaduwen ma aramas emen kin wiliandi pwihn en aramas ieu oh wia kapakap, mwein ele ahnsoun mihding kan en Sounkadehdehn Siohwa kan? Ma kitail iang mihmi wasao, kitail en rongorong kanahieng pwehki ni imwin kapakapo, kitail kak nda sang nan mohngiong unsek “Amen” me wehwehki “I pwungki.”—1 Korint 14:16.
KAPAKAP AKAN ME SIOHWA KIN KETIN KARONGE
12. (a) Dahme kahrehda Koht sohte kin sapengki ekei kapakap? (b) Dahme kahrehda kitail en dehr medemedewekihte pein atail anahn akan ni ahnsoun kapakap?
12 Ekei aramas kin pehm me arail kapakap akan sohte kin alehdi pasapengpe edetehn re kin wia kapakap pwukat ong Koht ni mwaren Krais. Ahpw, wahnpoaron Sohn mahsanih: “Sohte lipilipil dahme kitail kin peki nin duwen me pahrekiong kupwuren [Koht], E kin ketin karonge kitail.” (1 Sohn 5:14, NW) Kahrehda, kitail anahne wia atail pekipek kan nin duwen me pahrekiong kupwuren Koht. Pwehki E kin ketin nsenohki dahme pahn mwahu ohng atail irair en pali ngehn, mehkan sohte lipilipil me pid atail irair en pali ngehn pahn wie mehkan me konehng en wia audepen atail kapakap. Kitail en nantihong dehr medemedewehte pein atail anahn akan en paliwar. Karasepe ieu, nin doken e konehng en kapakapki erpit oh kehl pwehn powehdi soumwahu kan, nohn pwunodki roson en war en dehr kaitoniehla mehkan en ngehn. (Melkahka 41:1-3) Emen lih Kristian pehmada me e nohn kin pwunodki ah soumwahu, ih eri peki sawas rehn Siohwa en kak ahneki madamadau toupahrek ong ah soumwahu. Mwurin mwo, ah pwunodki ah soumwahu sohla wia irair laud ehu, oh e kin pehm me Koht kin ketikihong ih “kehl tohrohr.” (2 Korint 4:7, NW) Ah ineng en sewese meteikan ni pali ngehn inenen laudla, oh ih eri wiahla sounkalohk kaukaule men en Wehio.
13. Nin duwen me sansal nan Madiu 6:9-13, soahng dah kan me konehng kitail en kapakapki?
13 Dahme pahn wia audepen atail kapakap akan pwe Siohwa en kak ketin karonge mehpwukat? Sises Krais padahkiong sapwellime tohnpadahk kan duwen kapakap. Nan kapakap me ntingihdi nan Madiu 6:9-13, Sises ketin kairekedi soahng kan me konehng kitail en kapakapki. Dahme pahn keieu kesempwal kitail en kapakapki? Mwaren Siohwa Koht oh sapwellime Wehi en wia audepe me keieu kesempwal sang mehkoaros. Peki atail anahn en paliwar pil konehng en mih nan atail kapakap akan. E pil kesempwal en peki mahkpen dihp akan oh en ketin nekid kitail sang kasongosong kan oh ih me suwedo, Sehdan me Tepil. Sises sohte men kitail en mwomwen koulki kapakap wet de pil kapwukapwurehiong mahsen kan en kapakap wet ni atail sohte medemedewe ia wehwehn kapakapo. (Madiu 6:7) Ia pahn mwomwen ehupenehn seri men oh ah pahpa ma serio kin kapwukapwurehiong ndinda lepin pwuloi kei ohng ah pahpa ahnsou koaros?
14. Likin pekipek, soangen kapakap dah kan kitail en pil wia?
14 Likin kapakap en pek sawas oh pil kasalehda tihwohn mohngiong kan, kitail en pil kapinga Siohwa oh kasalehda atail kalahngan ong Ih ni kapakap. (Melkahka 34:1; 92:1; 1 Deselonika 5:18) Kitail en pil kapakapki meteikan. Kapakap akan me kin pid riatail brother oh sister kan ni pali ngehn me kin mihlahr pahn kalokolok oh apwal akan, kin wia kasalepen atail nsenohkin irail, oh Siohwa kin ketin kupwurperenki atail kin kasalehda atail nsenohki irail. (Luk 22:32; Sohn 17:20; 1 Deselonika 5:25) Ni mehlel, wahnpoaron Pohl ntingihdi: “Kumwail dehr pwunodki mehkot, ahpw nan amwail kapakap akan, kumwail en peki dahme kumwail kin anahne. Amwail kasapahlkalahngan en pil iang amwail kapakap ahnsou koaros. Eri, sapwellimen Koht popohl, me inenen laudsang uwen atail dehdehki, ahpw pahn nekinekid mohngiongimwail oh pil amwail lamalam rehn Krais Sises.”—Pilipai 4:6, 7.
POADIDIONG KAPAKAP
15. Dahme kitail kak tamataman ma atail kapakap akan likamwete sohte kin alehdi pasapengpe?
15 Edetehn e kin lalaudla ahmw loalokongkihla Koht, ke mwein kin pehm me ahmw kapakap akan sohte kin ahnsou koaros alehdi pasapengpe. Met kak wiawi ma e saikinte lel ahnsou me Koht ketin kilelehiong en ketin sapeng audepen kapakap ieu. (Eklesiasdes 3:1-9) Siohwa kak ketin mweidong irair ehu en wiwiawi erein lepin ahnsou kis, ahpw E kin ketin sapeng kapakap akan ahnsou me keieu konehng.—2 Korint 12:7-9.
16. Dahme kahrehda kitail en poadidiong kapakap, oh iaduwen atail wiewia met pahn pidada atail nanpwung mwahu rehn Koht?
16 Atail kin poadidiong kapakap kin wia kasalepen atail uhdahn ngoangki dahme kitail kin peki rehn Koht. (Luk 18:1-8) Karasepe ieu, kitail kak peki rehn Siohwa en ketin sewese kitail en powehdi luwet ehu. Ni atail pahn kin poadidiong kapakap oh kitail wia mwekid kan me pwung ong atail kapakap akan, mehpwukat kin kasalehda atail mehlelki dahme kitail kin peki. Kitail en oaritikihada anahn akan oh mehlel nan atail pekipek kan. E pil kesempwal kitail en kapakap ngidingid peki sawas ni atail kin mihla pahn kasongosong. (Madiu 6:13) Nin doken atail kin wiewiahte atail kapakap oh ni ahnsowohte nantihong powehdi atail ineng en wiahda dihp, kitail pahn kilangada duwen Siohwa ah kin ketin sewese kitail. Met pahn kin kalaudehla atail pwoson oh kakehlailihala atail nanpwung mwahu rehn Koht.—1 Korint 10:13; Pilipai 4:13.
17. Iaduwen kitail pahn ale kapaipen madamadau en kehliki kapakap nin doken atail papah Koht?
17 Ni atail pahn kin kaiahnehda atail madamadau en kehliki kapakap nin doken atail papah Siohwa Koht, kitail pahn diarada me kitail sohte kin papah Ih ki pein atail kehl. Pein Siohwa me kin ketikihong kitail kehl pwehn papah Ih. (1 Korint 4:7) Atail pohnese irair wet pahn kin kahrehong kitail en ahneki lamalam karakarahk oh kalaudehla atail ehuiong Ih. (1 Piter 5:5, 6) Ei, mie kahrepe mwahu kan me kahrehda kitail anahne poadidiong kapakap. Atail ngoang en kapakap oh ahneki loalokong kesempwal me pid iaduwen kitail en kak karanih Samatail limpoak me ketiket nanleng pahn kahrehong kitail en ahneki peren mehlel.
KOASOIONG SIOHWA SOHTE KIN TOUPALI
18. Iaduwen kitail pahn kak rong Koht?
18 Ma kitail men Koht en karonge atail kapakap akan, kitail uhdahn pahn pil rong dahme E kin mahsanih. (Sekaraia 7:13) E solahr kin kadar sapwellime mehn kair akan ni a doadoahngki sapwellime soukohp akan oh e sansal mwahu me E pil sohte kin doadoahngki ngehn suwed akan de wunahni. (Deuderonomi 18:10-12) Ahpw, kitail kak rong dahme Koht mahsanih ni atail pahn sukuhliki sapwellime Mahsen, iei Paipel. (Rom 15:4; 2 Timoty 3:16, 17) Duwehte atail kin kakete anahne en ioukihla nemenemen mwenge kan me kin katapan ohng paliwaratail akan, kangoang pil kin kohwong kitail en “kaiahnehda atail en ioukihla pilendihdi mwakelekel me kin pid Mahseno.” Kaiahnehda pwe ken ioukihla mwengehn ngehn sang ni ahmw pahn kin wadewadek Mahsen en Koht rahn koaros.—1 Piter 2:2, 3; Wiewia 17:11.
19. Kamwahu dah kan ke kak ale ma ke kin doudouloale dahme ke wadek nan Paipel?
19 Doudouloale dahme ke wadek sang nan Paipel. (Melkahka 1:1-3; 77:11, 12) Met kin wehwehki ken medemedewe laud audepe kan. Ke kak karasaiong met kamwute mwenge nan mpwei en mwenge. Ke pil anahne kamwutehdi mwengehn ngehn ni ahmw pahn kin karasapene dahme ke wadek oh dahme ke ese mwohn ahmw wadek mehpwukat. Medemedewe iaduwen ire pwukat kin sair pein ahmw mour, de iaduwen re kin kasalehda duwen sapwellimen Siohwa irair akan oh pil sapwellime wiewia kan. Kahrehda, sang pein ahmw onop, ke kak koledi mwengehn ngehn me Siohwa kin ketikihda. Met pahn kakaranihiukodohng Koht oh pahn sewese iuk en kak powehdi kahpwal akan en ehu ehu rahn.
20. Iaduwen iang towehda mihding en Kristian akan pahn sewese kitail pwe kitail en karanih Koht?
20 Ke pil kak karanih Koht sang ni ahmw pahn kin rong sapwellime Mahsen nan mihding en Kristian akan, me duwehte ahn mehn Israel akan arail kin rongorong kanahieng ahnsou me re kin pokonpene pwehn rong wadawadepen Sapwellimen Koht Kosonned. Sounkaweid akan en ahnsowo kin wadek Kosonnedo ni wehwe mwahu, kahrehda e kin sewese irail me rongorong kan en wehwehki oh mwekidki pwehn kapwaiada dahme re rongehr. Met kin wahdo peren laud. (Nehmaia 8:8, 12) Kahrehda wiahkihla ahnepomw en iang towehda mihding kan en Sounkadehdehn Siohwa kan. (Ipru 10:24, 25) Met pahn sewese iuk en wehwehkihla oh pil kak doadoahngki loalokong me pid duwen Koht nan ahmw mour oh pahn wahdong uhk peren. Iang wia kisehn pirien en Kristian akan sampah pwon pahn sewese iuk en mihmihte ni irair en karanih Siohwa. Oh ke pahn diar meleilei mehlel rehn sapwellimen Koht aramas akan.
SONG UWEN ME KE KOLEDI
Dahme kahrehda e kesempwal ken karanih Siohwa?
Soahng dah kan me anahn ong karanih Koht?
Dahme ke kak nda nan ahmw kapakap akan?
Dahme kahrehda ke anahne poadidiong kapakap?
Iaduwen ke pahn kak rong Siohwa rahnwet?
[Kilel nan pali 157]