Wasahn Kalohk en Ahmw Mwomwohdiso kin Laud?
1 Sang kahnimw en Sudea ko lel nan wehin Kalili, Sises kalohkseli oh tuhwong aramas tohto nan wehin Israel en mahs me inenen laud. (Mark 1:38, 39; Luk 23:5) Kitail pil anahne nantihong kalohk ong aramas koaros me kitail kin tuhwong pwehn ehukihong irail Rongamwahu. (Mark 13:10) Ahpw, met kin wia mehkot me apwal. Dahme kahrehda?
2 Mwomwohdiso tohto nan United States kin ahneki wasahn kalohk kan me sohte mihmi nan kahnimw oh pil e kin wia wasa me uhdahn laud: mwail epwiki epwiki kei. Tohnmwomwohdiso me kin doadoahngki lokaia likin sahpw re kin kousoanla loale kin kalohkseli nan kahnimw kan, raparapahki aramas me kin doadoahngki lokaia me re ese. Dahme kitail kak wia pwehn sewese aramas akan me mihmi nan wasa pwukat en sukuhliki padahk mehlel duwen Siohwa, Sises oh Wehin Koht?
3 Kaunopada Mwahu: Sounapwalih en Kalohk oh pil brother me kin apwalih wasahn kalohk kan anahne koasoanehdi mwahu oh apwalih mwahu doadoahk en sounkalohk kan pwe ren kak pweida mwahu nan arail doadoahk en kalohk. Mwein brother pwukat kak koasoanehdi ekei Rahn Kaunop kan pwehn kalohk rahn pwon oh kalohk soangen wasa pwukat. Ni ahnsou me sounkalohk kan pahn kalohk wasa doh kan, e pahn mwahu ma re kak koasoanehdi pwehn kalohk rahn pwon oh wahda kanarail mwengehn souwas. Mwein sounkalohk pwukat kak pil tuhpene ong kalohk en rahno mwadang pwehn kak mie ahnsou en lel wasahn kalohk de re kak koasoanehdi pwe tuhpene ong kalohk pahn wiawi karanih arail wasahn kalohk en rahno. Koasoanehdi pwe ekeite sounkalohk mihmi nan sidohsa apwoat pwe sounkalohk koaros pahn kak lel ihmw tohto rahno. Koasoanehdi pwehn kalohk nan wasa doh kan nan sounpwong kan me irair en nan wehwe oh irair en ahl kan me mwahu.
4 Irail akan me kin kalohk nan wasahn kalohk kan me re rapahki aramas me kin lokaiahki lokaia me sounkalohk kan kin ese—e pahn mwahu ma irail pahn ntingihdi eden irail me perenki rong iangahki neirail address ko oh mep me pahn kasalehda wasa kan me imwarail kin mihmi ie. Koasoanehdi wasahn kalohk kan pwe sounkalohk kan me iang ehu pwihn en kalohk kak kohla rehn irail koaros me re men kohla reh nan ehu wasa.
5 Tehk pwe ke wahda pwuhk kan, brochure kan oh makisihn kan itar ong amwail kalohk rahno. Ma sounkalohk kan sohte kin kalap kohla wasahn kalohk me kumwail kohla, e pahn konehng en kihdi tract de makisihn en pahr samwalahro ni ihmw kan me sohte towe. Ma tract me oaralap koasoia Would You Like to Know More About the Bible? kin mihmi nan Kingdom Hall, ke kak kihong aramas sohte lipilipil me ke kin tuhwong oh kihdi ni ihmw kan me sohte towe.
6 Wia Uwen Me Kumwail Kak en Sawaspene: Sounkalohk koaros anahne sawaspene ni ahnsou me re kalohk nan wasahn kalohk kan me doh oh laud. Ma ekei sounkalohk kan kin kohpene oh doadoahngki sidohsa pwoat pwe irail anahne diraip wasa doh, e pahn konehng koaros en sawaspene pwehn pwainda gas ong sidohsa. E pil kesempwal sounkalohk kan en doadoahngki arail loalokong ni ahnsou me re kin tuhwong tohnihmw kan me kin mwahuki koasoakoasoi. Tamataman me kumwail men tuhwong aramas tohto nan wasahn kalohk en rahno, eri, e pahn mwahu en kasalehda limpoak ong meteikan me mihmi nan sidohsa. Ma ke men pousehla ahmw koasoiong tohnihmw me mwahuki koasoakoasoi werei, mie mehkot ke kak koasoanehdi pwe irail sounkalohk kan me mihmi nan sidohsa sohte anahne awiawih werei nan sidohsa?
7 E pahn mwahu en koasoanehdi rehn tohnihmw kan me kin perenki rong pwehn kak pwurala rehrail oh sewese irail en kekeirada ni pali ngehn. E kesempwal en kaidehn ihte ntingihdi neirail address, ahpw pil idek rehn tohnihmwo ma ke kak ale nah nempehn telephone pwe ke kak pil call ih oh pwurehng kalohk ong ih ni amwa doadoahngki telephone. Ma sohte eden ahl kan me mihmi nan wehi kan de sohte nempe kan pohn ihmw kan, ke kak wiahda kisin mep ni keneinei pwe ke pahn kak pwurehng diar imwen aramaso me perenki rong.
8 Kitail ahneki pwais kaselel ni atail kin nantihong kapwaiada kaweid me Sises kaweidki sapwellime tohnpadahk kan: “Ni amwail pahn kin lel nan kahnimw de nan kousapw ehu, kumwail pedolong oh rapahki mahs aramas emen me pahn kin men kasamwo kumwail; kumwail eri kin mihmihte reh, kumwail lao pahn kin mwesel”! (Madiu 10:11) Siohwa uhdahn pahn kapaiada ahmw nannanti ni ahmw kin tohnmeteiki ahmw kehl, ahmw ahnsou, noumw mwohni, waromw sidohsa nan doadoahk katapan wet!