Nantihong “Wia Dahme Mwahu”
1 Ke wia mehkot mwahu ahnsou me ke wiahla emen sapwellimen Siohwa Koht ladu. Ahpw, ahmw mehn akadei me apwal ahnsou wet iei en nantihong “wia dahme mwahu” mendahki kitail mihmi nan ahnsou apwal akan. (Kalesia 6:9) Mendahki met pahn wie doadoahk laud, ke kak nantihong “wia dahme mwahu.” Iaduwen?
2 Kahlemengih Sapwellimen Sises Lamalam: Duwehte Sises, ke kak dadaur pahn kasongosong kan ma ke pahn tamataman duwen koapworopwor en Wehio. (Ipru 12:2, 3) Ken kamehlele me Siohwa kin poakohng uhk oh E kupwurki ken pweida mwahu nan ahmw mour. (2 Pit. 3:9) Likih Ih ni mongiongomw unsek, oh kamehlele me E pahn sewese iuk. (1 Kor. 10:13) Poadidiong kapakap ahnsou koaros, oh peki rehn Siohwa en sewese iuk en dadaurete. (Rom 12:12) Ken peren pwe Koht pahn kupwurki ahmw dadaurete. (Rom 5:3-5) Ahmw lelepek ni ahmw men ahneki “lamalam teieu ni amwail kin kahlemengih Krais Sises” pahn kihong uhk nsenamwahu mehlel oh kaperenda Siohwa.—Rom 15:5; Lepin Padahk 27:11.
3 Nantihong Wia Dahme Pwung: Kitail en kapwaiada koasoandi kan me Siohwa ketikihong sapwellime aramas pwehn sewese irail en nantihong wia dahme pwung. Kitail en kapwaiada pein atail koasoandi mwahu en wadek Mahsen en Koht oh pil onopki sawaspen Pwuhk Sarawi kan me pwihn en ladu lelepek oh loalokong kin kihong kitail. Wia uwen me ke kak en kaunopada ong mihding kan, iang towehda mihding kan koaros oh iang pasapeng nan mihding kan oh wia mehpwukat ni lelepek. Mwohn oh mwurin mihding kan, miniminiong riatail brother oh sister kan ni pali ngehn. Koasoanehdi ong pein uhk mehn akadei kan me ke kak wiahda me pid duwen ahmw kalohk oh me pahn sewese iuk en koahiekla nan kalohk oh lel mohngiong en aramas akan ni ahmw pahn kalohki Rongamwahu en Wehin Koht ong irail.
4 Met iei duwen omw kak wiewia dahme pwung oh ahneki peren mehlel ni ahnsowohte. Emen brother nan Italy koasoia duwen met: “Ni ahnsou me e soutikdiher, oh I kin pwurodo sang kalohk rahn pwon, . . . mehlel, I kin pwang. Ahpw, I uhdahn nsenamwahu, oh I kin kalahnganki ong Siohwa pwe E kin ketikihong ie peren mehlel me sohte me kak kihsang.” Eri, kitail en nantihong wia dahme mwahu, oh ni ahl wet, kitail kak ahneki peren laud.