Diar Peren Mehlel Nin Duwen Ahmw Papah Siohwa
1 Re pwurodo “pereperen kowahlap.” Iren Paipel wet kin kasalehda duwen tohnpadahk isiakan ko arail pepehm kan ahnsou me re ripohtkihong Sises duwen dahme wiawi nan arail seiloak en kalohk. Re ahneki peren pwehki re wehwehki me re kapwaiada kupwuren Koht. (Luk 10:17) Dahme kak sewese iuk en diar peren mehlel nin duwen ahmw kin papah Siohwa?
2 2Ahneki Lamalam en Pweida: Ke kin ahneki pwais kaselel en sewese aramas akan en wehwehkihla duwen sapwellimen Siohwa kupwur kaselel kan. Ni ahmw kin kalohk, ke kak sewese aramas akan en saledek sang tiahk suwed en sampah wet oh pil saledek sang kaudok likamw. Ke kak pil sewese aramas akan en ahneki koapworopwor en mour nan sampah me sohte kahpwal akan me duwehte kahpwal akan me kin wiawi rahnwet. Medemedewe duwen peren me Siohwa kin sapwellimaniki ahnsou me e kin mahsanih me ke pweida mwahu ni ahmw padokedi waren padahk mehlel nan mohngiong en aramas mehlel men. Ken ahneki lamalam en pweida mwahu ni ahmw pahn kapakap oh peki sawas en sapwellimen Koht ngehn sarawi en sewese iuk en kekeirada wahn peren ni ahmw pahn wia uwen me ke kak nan kalohk.
3 Kaiahn Mwahu: Ahnsou me Sises ketikihong tohnpadahk isiakan ko kaweid kan, e kin rasehng atail Service Mihding kan en rahnwet. E kihda kaweid oh kaiahn me re anahne pwehn wia arail doadoahk en kalohk ni ahl me keieu mwahu. (Luk 10:1-16) Rahnwet, atail Service Mihding kan kin kaiahne iuk iaduwen ke pahn tuhwong aramas akan, iaduwen ke pahn tepida koasoi ong aramas akan, oh iaduwen ke pahn tepida oh kaukaule wia onop en Paipel rehn aramas akan. Ni ahmw pahn nantihong koahiekla nan kalohk, ke pahn diarada me ahmw pepehm en saloh oh ahmw pepehm me ke sohte itar pahn sohla oh ahmw pepehm en peren oh lamalam me ke kak pweida pahn laudla.
4 Medemedewe Duwen Ahnsou Kohkohdo: Sises kin sapwellimaniki peren ni e kin papah Siohwa mendahki kalokolok kan me e kin lelohng. Pwekihda? Pwehki e kin medemedewe duwen kapai kan oh pwais kan me kin mihmi mwowe. (Ipru 12:2) Ke kak wia duwehte met ni ahmw pahn medemedewe laud duwen mwaren Siohwa oh kapai kan me pahn kohdo nan sapwellimen Koht koasoandi kapw. Met pahn sewese kitail en ahneki peren oh wehwe nan kalohk.
5 Kitail kak nda me atail papah Siohwa kin wia pwais me keieu kaselel me kitail kak ahneki rahnwet. Ihme kahrehda, ke kak nda: “Maing ei Koht, ia uwen ei kin ngoangki kapwaiada kupwuromwien!”—Mel. 40:8.