Peren​—Irair Ehu me Koht Ketikihong Kitail

ARAMAS akan kin men ahneki mour me peren. Ahpw ni imwin rahn pwukat, koaros kin lelohng “ahnsou apwal” akan. (2 Tim. 3:1) Wiewia sapahrek, soumwahu, sohla doadoahk en mwohni, pahtou, de soahng kan me kin kahrehda pwunod oh nsensuwed laud kak ekisekis kahrehiong ekei en sohla peren. Sapwellimen Koht aramas akan pil kak luwetala oh sohla peren. Ma met wiawihong uhk, ia duwen omw kak pwurehng ahneki peren?

Pwehn sapengala peidek wet, keieu kitail anahne wehwehki ia wehwehn peren mehlel oh ia duwen meteikan ar kak kolokolete arail peren mendahki kahpwal kan. Mwuhr, kitail pahn sukuhlki dahme kitail kak wia pwehn kolokolete oh pil kalaudehla atail peren.

DAHKOT PEREN?

Peren mehlel sohte wehwehki me kitail en kin pereperente ahnsou koaros. Karasepe, mwurin aramas emen kin niminim, ele e kin sakaula oh men kokouruhr. Ahpw ni eh kin sohla sakau, e sohla kin kokouruhr, oh mwein e kin pwuralahng mour ehu me diren pahtou oh kahpwal tohto. Peren me e ahneki ahnsoukis kaidehn uhdahn peren mehlel.​—Lep. Pad. 14:13.

Weksang met, peren mehlel iei irair ehu me kin kohsang mohngiongitail. E kin wehwehki en “kakairada pepehm en kasikasik dahme mwahu.” Peren mehlel iei pepehm ehu me kitail kin ahneki mehnda ma atail irairo mwahu de suwed. (1 Des. 1:6) Ni mehlel, aramas men kak pwunodkihda mehkot ahpw ni ahnsowohte pil ahneki peren. Karasepe, kamakam laud lelohng wahnpoaron ko pwehki arail kin lohki duwen Krais. Ahpw re “mweselsang rehn Tohn Mwoalen Kopwung Lapalapo, re ahpw perenkihda kowahlap duwen Koht eh ketin kupwure re en warohng lokolongki saroh pwehki mwaren Sises.” (Wiewia 5:41) E sansal me re sohte perenki kamakam me re aleo. Ahpw nin duwen sapwellimen Koht aramas akan, re diar peren mehlel sang ni arail kin kolokolete arail lelepek ong ih.

Kitail sohte ipwidihte ahneki soangen peren wet, oh e sohte kin uhdahte miehla. Dahme kahrehda? Pwehki peren mehlel wia kisehn wahn sapwellimen Koht manaman. Sapwellimen Koht manaman pahn sewese kitail en kak kakairada irair en “aramas kapw,” me iangahki peren mehlel. (Ep. 4:24; Kal. 5:22) Oh ni atail kin kakairada soangen peren wet, kitail kak dadaur pahn kapwunod kan en mour.

MEHN KAHLEMENG KAN ME KITAIL MEN ALASANG

Siohwa ketin kupwurki soahng mwahu kan en wiawi nin sampah, a kaidehn soahng suwed kan me kitail kin kalapw kilang rahnpwukat. Ahpw wiewia suwed en meteikan sohte kin kihsang peren me Siohwa sapwellimanki. Paipel mahsanih: “Manaman oh peren kin kadirehla Tehnpese.” (1 Kron. 16:27) Patehng met, soahng mwahu kan me sapwellime ladu kan wiahdahr kin kahrehiong Siohwa en ketin “pereperen.”​—Lep. Pad. 27:11.

Kitail kak kahlemengih Siohwa sang atail en dehr nohn pwunodki ma soahng kan me kitail kasik sohte pweida. Kitail en dehr sohla ahneki peren mehlel, ahpw kitail kak medemedewehte soahng mwahu kan ahnsou wet oh kanengamah awiawih soahng mwahu kan me pahn kohdo.a

Kitail pil kak diar mehn kahlemeng tohto duwen aramas kan nan Paipel me kin kolokolete arail peren nan irair apwal akan. Eipraam wia emen me kin dadaur pahn irair keper oh apwal laud kan me meteikan wiahiong ih. (Sen. 12:10-20; 14:8-16; 16:4, 5; 20:1-18; 21:8, 9) Mendahki soangen kahpwal pwukat, Eipraam kolokolete eh peren. Ia duwen eh wia met? E kin medemedewehte koapworopwor en mour nan sampah kapwo pahn kaundahn Mesaia. (Sen. 22:15-18; Ipru 11:10) Sises mahsanih: “Samamwail Eipraam perenkihda eh pahn kilang ei rahn.” (Sohn 8:56) Kitail kak alasang mehn kahlemeng en Eipraam ni atail medemedewehte peren me pahn wiawi.​—Rom 8:21.

Duwehte Eipraam, wahnpoaron Pohl oh iengeo Sailas kin medemedewehte sapwellimen Koht inou kan. Ira ahneki pwoson kehlail, oh ira kin kolokolete ara peren mendahki soahng suwed kan me lelohng ira. Karasepe, mwurin ara dadaurete pahn kamakam laud oh lekdekiong nan imweteng, ni “lukepen pwong, Pohl oh Sailas wie kapakap oh kapikapingahki Koht koul.” (Wiewia 16:23-25) Pil patehng ara ale kehl sang ara koapworopwor, Pohl oh Sailas kin ahneki peren mehlel pwehki ara lokolongki mwaren Krais. Kitail kak alasang Pohl oh Sailas sang ni atail pahn medemedewehte soahng mwahu kan me kohsang atail kin papah Koht ni lelepek.​—Pil. 1:12-14.

Rahnwet, mie mehn kahlemeng mwahu kan en riatail Kristian kan me kin kolokolete arail peren mendahki re kin lelohng kahpwal kan. Karasepe, nan November 2013, melimel laud me adaneki Haiyan kauwehla wasa kan nan werengen Philippines, e kauwehla imwen Sounkadehde daulih 1,000. George, me imweo nan kahnimw en Tacloban ohla, nda: “Mendahki dahme wiawi, riatail Kristian kan kin peren. I apwalki kawehwehda peren me se ahneki.” Ahnsou koaros me kitail kin lelohng kahpwal laud kan, kitail pahn kolokolete atail peren ma kitail kin medemedewe oh kalahnganki dahme Siohwa ketin wiadahr ong kitail. Dahme Siohwa pil ketikihda pwe en kihong kitail kahrepe kan en kin peren?

KAHREPEN ATAIL KIN PEREN

Ia duwe, mie pil ehu kahrepe laud en ahneki peren likin atail ahneki nanpwungmwahu rehn Koht? Medewehla met: Kitail ese Kaunepen lahng oh sampah. Iei ih me Samatail, atail Koht, oh Kompoakepatail!​—Mel. 71:17, 18.

Kitail pil kin kesempwalki kisakis en mour oh atail koahiek en perenki atail mour. (Ekl. 3:12, 13) Nin duwen aramas kei me kapikipikda me Siohwa ketin kainangihedo reh, kitail wehwehki kupwuren Koht ong kitail. (Kol. 1:9, 10) Eri, kitail ese ia kahrepen atail mour. Weksang met, pali laud en aramas akan sohte uhdahn wehwehki ia kahrepen mour. Pohl kasalehda wekpeseng wet ni eh ntingihedi: “‘Pwoaren mas me saikinte kilang oh saleng me saikinte rong, de mohngiong en aramas me saikinte medewehda soahng kan me Koht ketin kaunopadahng irail kan me kin poakohng ih.’ Pwe iei kitail me Koht ketin kasalehiong soahng pwukat sang ni sapwellime manaman.” (1 Kor. 2:9, 10, NW) Kitail sou kin perenki atail wehwehki kupwuren Siohwa?

Tehk dahme Siohwa pil ketin wiadahr ong sapwellime aramas akan. Kitail sou kin kalahnganki me mie mahkpen dipatail kan? (1 Sohn 2:12) Pwehki sapwellimen Koht mahk kalahngan, kitail ahneki koapworopwor me sampah kapw ehu pahn kereniong miehla. (Rom 12:12) Pil ahnsou wet, Siohwa ketikihda pwihn ehu me iei iengatail tohn kaudok kan. (Mel. 133:1) Mahsen en Koht pil kamehlelehiong kitail me Siohwa kin ketin pere sapwellime aramas akan sang Sehdan oh ienge ngehn saut kan. (Mel. 91:11) Ma kitail kin doudouloale soangen kapai pwukat koaros sang rehn Koht, kitail pahn kilang me atail peren pahn laudla oh kekeirda.​—Pil. 4:4.

IA DUWEN ATAIL PAHN KALAUDEHLA ATAIL PEREN

Ia duwe, Kristian men me ahneki peren kak kalaudehla eh peren? Sises mahsanih: “I padahkihongkumwailehr mepwukat pwe ei peren en mi rehmwail, oh amwail peren en unsekla.” (Sohn 15:11) Met sou kasalehiong kitail me atail peren kak laudla? Ke kak kapahrekihong omw nanti en kalaudehla omw peren duwehte omw kin sasaun kisiniei. Ke anahne saun kisinieio pwe en kin kehlail. Pil duwehte met, ke anahne wia soahng kan pwehn kalaudehla omw nanpwungmwahu rehn Siohwa. Ni ahl wet omw peren pahn laudla. Tamataman met: Sapwellimen Koht manaman kin kalaudehla peren. Eri, ke pahn kalaudehla omw peren sang ni omw pahn kaukaule peki sapwellimen Siohwa manaman oh doudouloale kanahieng sapwellime Mahsen.​—Mel. 1:1, 2; Luk 11:13.

Ke pil kak kalaudehla omw peren sang ni omw pahn soupisengki doadoahk kan me kin kaperenda Siohwa. (Mel. 35:27; 112:1) Dahme kahrehda? Pwehki kitail kapikipikda pwehn “lemmwiki Koht, oh kapwaiada sapwellime mahsen, pwehki ih kahrepe wet me aramas kepikipikihda.” (Ekl. 12:13) Met pil wehwehki me kitail kapikipikda pwehn wia kupwuren Koht. Eri ni atail kin papah Siohwa, kitail kin uhdahn perenki mour.b

KAMWAHU KAN ME KOHSANG PEREN

Ni atail kin kakairada peren me Koht ketikihong kitail, kitail kin paiekihda kamwahu kan me laudsang dahme kitail kin pehm loalatail. Karasepe, kitail pahn kaperenda Samatail nanleng ni atail papah ih ni peren mendahki sohte lipilipil soangen kahpwal dah me kitail lelohng. (Deud. 16:15; 1 Des. 5:16-18) Oh pil imwilahn atail kin ahneki peren mehlel, kitail pahn soikala mourki mour en noahrok kepwe ahpw kitail pahn wiahda tounmetei kan ong Wehin Koht. (Mad. 13:44) Ni atail kilang kamwahu kan me met kin wiahda, kitail pahn kalaudehla atail peren, ahneki nsenamwahu laud, oh met kin kalaudehla ahn meteikan ar peren.—Wiewia 20:35; Pil. 1:3-5.

Emen sounroporop ni ehu sukuhl laud nan Nebraska, Wehin Amerika, me wia eh roporop kan duwen roson mwahu, nda: “Ma ke kin perenki oh nsenamwahuki omw mour ahnsou wet, ke pahn pil ahneki roson mwahu ni ahnsou kohkohdo.” Met pil kin pahrekiong dahme Paipel mahsanih: “Ma ke pahn pereperen rahn koaros, ke pahn ahneki roson mwahu en paliwar.” (Lep. Pad. 17:22) Ei, ni omw kin kalaudehla omw peren, ke pahn pil ahneki roson mwahu.

Eri mendahki atail kin mi ni ahnsou apwal akan, kitail kak kakairada peren mehlel ni atail kin kapakapki sapwellimen Koht manaman, onop, oh doudouloale sapwellimen Siohwa Mahsen. Kitail pil kin kalaudehla atail peren ni atail kin medemedewe kapai kan ahnsou wet, kahlemengih pwoson en meteikan, oh rapahki mahs kupwuren Koht. Ni soangen ahl pwukat koaros, e pahn kalaudehla atail kamehlele mehlelpen iren Paipel wet nan Melkahka 64:10, me mahsanih: “Aramas pwung kan koaros ahpw pahn perenda pwehki wiepen nin limen KAUN-O. Re pahn diar reh arail wasahn ruk.”