Siohwa Iei ‘Poahsoan en Atail Peren’

1-2. (a) Dahme aramas tohto rahnwet sohte ahneki? (b) Dahme kitail pahn koasoiapene nan iren onop wet?

ARAMAS tohto rahnwet kin wia uwen arail kak pwehn ahneki peren. Ahpw mendahki arail nannanti, irail saikinte ahneki peren mehlel. Me tohto kin nsensuwed oh medewe me soahng kan sohte pahn mwahula. Ekei sapwellimen Siohwa aramas akan ele pil kin ahneki pepehm wet. Kitail mi ni “imwin rahn akan,” eri kitail kakete ahneki kahpwal kan me kahrehiong kitail en uhdahn pwunod de nsensuwed.—2 Tim. 3:1.

² Nan iren onop wet, kitail pahn koasoiapene dahme kak kihsang atail peren oh ia duwen atail kak pwurehng ahneki peren ma sohla atail peren. Ahpw keieu, kitail pahn kilang ihs me kak sewese kitail en ahneki peren mehlel.

IHS ME KAK KIHONG KITAIL PEREN MEHLEL?

3. Dahme kitail sukuhlki duwen Siohwa sang ni soahng kan me e ketin kapikada? (Pil kilang kilel kan.)

³ Siohwa kin ketin ahnsou koaros peren. Oh e ketin kupwurki kitail en peren. Ihme kahrehda e ketin kapikada soahng tohto me kin kahrehiong kitail en peren. Karasepe, kitail kin peren ni atail kilang sampah eh diren soangen poh kaselel, kilang mahn akan ar mwadomwadong, oh perenki kang soangsoangen mwenge iou kan. Koht uhdahn ketin poakohng kitail oh kupwurki kitail en perenki mour!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Dahme kahrehda Siohwa ketin sapwellimankihte peren mendahki eh kilang aramas akan kin lokolok? (b) Kisakis dah me Siohwa ketikihong kitail? (Melkahka 16:11)

⁴ Siohwa sohte kin ketin pohnsehsehla ahn aramas akan lokolok. E kin uhdahn kupwurtoutoukihla lokolok kan. Ahpw, Paipel kahdaneki ih “Koht me peren.” (1 Tim. 1:11) Dahme kahrehda Siohwa kin ketin sapwellimankihte peren? Ehu kahrepe, pwehki e ketin koasoanedier rahn me e pahn ketikihsang nsensuwed oh lokolok koaros kohkohlahte. Ahpw ahnsou wet, Siohwa ketin mwahngih dahme kin wiewiahiong kitail oh kupwurki sewese kitail. Ia duwen eh kin ketin wia met? E ketikihong kitail peren nin duwen kisakis ehu. (Wadek Melkahka 16:11.) Kitail pahn kilang ia duwen Sises eh kin ahneki peren pwehki eh esehla Siohwa.

5-6. Dahme kahrehda Sises kin ketin peren?

⁵ Nanpwungen kepikipik kan koaros, Sises me kin keieu ketin peren. Dahme kahrehda? Medewehla kahrepe riau. (1) “Ih me kasalepen Koht me soh sansal,” ihme kahrehda e kin uhdahn ketin peren. (Kol. 1:15; 1 Tim. 6:15) (2) Sises kin patopato rehn Semeo wereisang koaruhsie.

⁶ Sises kin peren pwehki e kin ahnsou koaros kapwaiada dahme Semeo ketin kupwurki en wia. (Lep. Pad. 8:​30, 31; Sohn 8:29) Pwehki eh lelepek, Siohwa kin ketin ahnsou koaros kupwurperenki ih.—Mad. 3:17.

7. Ia duwen atail kak diar peren mehlel?

⁷ Kitail pil kak diar peren mehlel sang ni atail karanihala Siohwa, me ketin wia utupen peren. Ni atail kalaudehla atail ahnsou en sukuhlki duwen Siohwa oh kahlemengih, atail peren pahn pil laudla. Kitail pahn pil diar peren ni atail wia kupwure oh ese me e kin ketin kupwurperenkin kitail.a (Mel. 33:12) Ahpw ia duwen ma ekei pak de erein ahnsou werei kitail sohla ahneki peren? Ia duwe, met wehwehki me Koht sohla ketin kupwurperenkin kitail? Soh! Siohwa ketin mwahngih me nan sampah wet, ekei pak kitail kin lokolongki atail medek oh nsensuwed laud. (Mel. 103:14) Kitail pahn koasoiapene dahme kak kihsang atail peren oh ia duwen atail kak pwurehng ahneki peren.

DAHME KAK SEWESE KITAIL EN PWUREHNG AHNEKI PEREN?

8. Dahme kak wiawihong kitail ni atail ahneki kahpwal kan?

⁸ Ni atail ahneki kahpwal kan. Ele ke lelohng kalokolok, soumwahu, mahla, semwehmwe, melimel, de rerrer en sahpw ape. Kahpwal pwukat kak kahrehiong kitail nsensuwed laud, ahpw mehlel ma kitail sohte kak kamwahwihala irairo. Paipel mahsanih me kitail kak nsensuwedla laud ma kitail medewe me kitail sohla pahn pwurehng ahneki peren. (Lep. Pad. 15:13) Babis, elder men nan ehu mwomwohdiso pil lelohng met. Erein sounparte pahieu, rie pwutako, eh nohnou, oh eh pahpao mehla. E koasoia: “I pehm me I kelehpwla oh sohte me kak sewese ie. Ekei pak I kin uhdahn pwunod pwehki I men mi rehn ei pahpa nohno oh riei pwutako mwohn arail mehla, ahpw I sohte kak.” Duwehte met, ekei pak atail kahpwal kan kak uhdahn apwal me kahrehda kitail en uhdahn pwangada oh mworusala.

9. Dahme kak sewese kitail en pwurehng ahneki peren? (Seremaia 29:​4-7, 10)

⁹ Dahme kak sewese kitail en pwurehng ahneki peren? Kitail kak ahneki peren ma kitail sohla pwunodki soahng kan me kitail sohte kak wekidala, oh kalahnganki soahng kan me kitail ahneki. Kitail kak peren mehnda ma atail irairo kaidehn ihme kitail mwahuki. Met weksang dahme me tohto nan sampah wet kin medewe. Karasepe, Siohwa ketin padahkihong aramas ako me kalipilipala Papilon ren wia uwen arail kak pwehn ahneki peren wasao. (Wadek Seremaia 29:​4-7, 10.) Ia mehn kasukuhlo? Song kilang soahng mwahu kan nan omw mour oh kalahnganki mepwukat. Tamataman me Siohwa sohte pahn ketin likidmelieiukala, ahpw e pahn seweseiuk. (Mel. 63:7; 146:5) Effie, me mwoatorala mwurin aksident ehu koasoia: “Siohwa, ei peneinei, oh riei Kristian kan nan mwomwohdiso sewese ie oh kangoange ie. I men kasalehiong irail me I kalahnganki dahme irail wia oh wiadahr. Eri I kin song wia uwen ei kak en ahnekihte peren.”

10. Dahme kahrehda kitail kak ahnekihte peren mendahki atail kahpwal kan?

¹⁰ Mehnda ma mie atail kahpwal de ni soahng suwed kan wiawihong kitail de atail peneinei, kitail kak ahnekihte peren.b (Mel. 126:5) Dahme kahrehda? Atail irairo kaidehn ihme kin wadohng kitail peren. Maria, pioneer men, koasoia: “Ni atail ahneki kahpwal kan kitail kin ahnekihte peren pwehki kitail taman dahme Siohwa ketin inoukihong kitail. Met sohte wehwehki me kitail sohte kin sengiseng de kasalehda atail pepehm. Ahpw Samatailo kak sewese kitail en ahnekihte peren sohte lipilipil kahpwal dah me kitail ahneki.” Tamataman me mehnda ma omw irairo uhdahn apwal ahnsou wet, e sohte pahn mihmi kohkohlahte. Ni ahnsou keren, Siohwa pahn ketikihsang soahng koaros me kin kahrehiong kitail lokolok oh nsensuwed.

11. Ia duwen mehn kahlemeng en wahnpoaron Pohl eh kangoangeiuk?

¹¹ Ahpw ia duwen ma kitail tepida medewe me kitail kin lelohng kahpwal kan pwehki Siohwa sohte ketin kupwurkin kitail? E pahn mwahu en medewe duwen sapwellimen Siohwa ladu lelepek teikan me lelohng irair kan me uhdahn apwal. Medewehla mehn kahlemeng en wahnpoaron Pohl. Sises ketin pilada en kalohkihong “mehn liki kan oh nanmwarki kan oh pil mehn Israel kan” rongamwahwo. (Wiewia 9:15) Sises ketikihong Pohl doadoahk kesempwal ehu. Ahpw, Pohl ahnekihte kahpwal tohto. (2 Kor. 11:​23-27) Ia duwe, pwehki Pohl ahneki kahpwal tohto met wehwehki me Siohwa sohte ketin kupwurperenki? Uhdahn soh! Eh kin dadaurete kasalehda me Siohwa kin ketin kupwurperenki. (Rom 5:​3-5) Met medewehla omw irair. Ke pil kin pousehlahte papah Siohwa ni lelepek mendahki omw kahpwal kan. Eri ke pil kak kamehlele me Siohwa ketin kupwurperenkin uhk.

12. Ia duwen soahng kan me kitail men wia ahpw sohte pweida eh kak kihsang atail peren?

¹² Soahng kan me kitail men wia ahpw sohte pweida. (Lep. Pad. 13:12) Kitail poakohng Siohwa oh kalahnganki soahng koaros me e ketin wiahiong kitail. Eri kitail kin song en medewehda ahl akan me kitail kak patohwanohng uwen atail kak koaros. Ahpw, ma kitail kin song wia mehkot me kitail sohte kak uhdahn wia pwehki atail irairo, kitail kakete uhdahn mworusala. (Lep. Pad. 17:22) Pioneer men me adaneki Holly koasoia: “I men iang Sukuhl ong Sounkalohki Wehio pwe ien kohla iang kalohk nan ehu sahpw, de iang doadoahk en kauwada ihmw nan Ramapo. Ahpw ei irairo wekila, oh I sohla kak lel mehn akadei ko. Met kahrehda ei uhdahn nsensuwedla. E uhdahn kamworus me ni omw men wia soahng kan, ahpw sohte kak.” Sapwellimen Siohwa ladu tohto kin ahneki pepehm wet.

13. Ia ekei soahng kan me kitail kak song wia sohte lipilipil irair dah me kitail ahneki?

¹³ Dahme kak sewese kitail en pwurehng ahneki peren? Tamataman me Siohwa sohte ketin kasik kitail en wia laudsang dahme kitail kakohng. Siohwa ketin kesempwalkin kitail mehnda ma kitail sohte kak wia dahme meteikan kin wia. Siohwa ketin kupwurki kitail en lelepek oh pohnese dahme kitail kakohng de sohte kakohng. (Maika 6:8; 1 Kor. 4:2) E kin ketin nsenohki atail madamadau, pepehm, oh atail irair kaselel kan laudsang dahme kitail kin wia. Eri kitail en dehr kasik en wia laudsang dahme kitail kakohng.c Eri ma ke sohte kak wiahiong Siohwa soahng kan me ke mwahuki, wia dahme ke kakohng. Karasepe, ke kak sewese kaiahne emen me pwulopwul de kangonge riomw Kristian mah kan. De mwein ke kak mwemweitla rehn emen, call ih, de kadarala kisinlikou pwehn kangoange. Siohwa kin ketin kupwurperenki omw kin wia dahme ke kakohng, oh e pahn ketin kapaiukada pwe ken ahneki peren. Oh tamataman me ni ahnsou kohkohdo, kitail pahn kak papah Siohwa ni ahl tohto. Ih met me kangoange Holly. E koasoia: “Ni ei kin tepida mworus, I kin uhdi oh tamanda me I pahn ahneki mour kohkohlahte. Oh pwehki sapwellimen Siohwa sawas, I kak kapwaiada ekei ahi mehn akadei kan nan sampah kapwo.”

14. Dahme pil kak kihsang atail peren?

¹⁴ Ma pein atail peren me keieu kesempwal. Ele nan Internet kitail kin kilang aramas akan me mwomwen ahneki peren pwehki ahnsou koaros irail kin mwomwen ahneki soahng mwahu kan. Kitail kakete tepida kamehlele me ma kitail wia soahng kan me kitail mwahuki, pwainda dahme kitail men ahneki, oh seiloakla wasa teikan, kitail uhdahn pahn peren. E sohte sapwung en wia soahng kan me kitail perenki. Siohwa ketin kupwurki kitail en perenki soahng kaselel kan me e ketin kapikada. Ahpw, me tohto me song en kaperenda pein irail mwuhr esehda me soahng kan me re medewe pahn kaperenda irail, sohte uhdahn wiawi. Eva, pioneer men, koasoia: “Ni omw medemedewehte ia duwen omw pahn ahneki peren, ke sohte pahn ahnsou koaros itarki.” Ma kitail kin ahnsou koaros song en kaperenda pein kitail, kitail pahn nsensuwedla.

15. Dahme kitail kak sukuhlkihsang Nanmwarki Solomon?

¹⁵ Nanmwarki Solomon wia soahng tohto pwehn kilang ma soahng pwukat pahn kaperenda ih. Karasepe, e song soangen mwenge iou tohto, rong koul kaselel kan, oh pwainda soahng pweilaud kan. Ahpw soahng pwukat sohte kaperenda ih. E koasoia: “Masatail kan sohte itarki kilikilang, oh salengatail kan sohte itarki rongorong.” (Ekl. 1:8; 2:​1-11) Ekei aramas medewe me ma irail naineki mwohni oh wia dahme re mwahuki, irail pahn ahneki peren. Ahpw met sohte mehlel. Soahng pwukat sohte kak kihong kitail peren mehlel.

16. Ia duwen atail sewese meteikan eh kak sewese kitail en pwurehng ahneki peren? (Pil kilang kilel kan.)

¹⁶ Dahme kak sewese kitail en pwurehng ahneki peren? Sises ketin padahkihong kitail me “kihwei kin kaperen sang ale.” (Wiewia 20:35) Elder men me adaneki Alekos koasoia: “I kin song wia soahng tikitik kan pwehn sewese meteikan. Ni ei kin sewese irail, I sohte kin medewe dahme I mwahuki, oh I kin ahneki peren.” Dahme ke kak wia pwehn sewese meteikan? Ma ke kilang emen me nsensuwed, ke kak kangoange. Ele e pahn nsenamwahula ma ke rong mwahu ih oh song wehwehki eh pepehm. Ke kak katamankihong en padahkihong Siohwa eh pepehm pwehki e ketin nsenohki. (Mel. 55:22; 68:19) Ke pil kak katamankihong me Siohwa sohte pahn ketin likidmeliehla ih. (Mel. 37:28; Ais. 59:1) Ke pil kak wia mehkot me pahn sewese, duwehte kukihada kene mwenge de iang ih kohla alu. De ke kak iang ih kohla kalohk. En ehukihong meteikan rongamwahwo kin ahnsou kaperenda kitail. Mweidohng Siohwa en ketin doadoahngkin uhk pwehn kangoange meteikan. Ni atail kin doadoahngki atail ahnsou pwehn sewese meteikan, kitail uhdahn pahn peren!—Lep. Pad. 11:25.

17. Ma kitail men ahneki peren mehlel, dahme kitail anahne wia? (Melkahka 43:4)

¹⁷ Kitail kak uhdahn peren ma kitail pousehlahte karanihala Samatailo nanleng. Paipel kamehlelehiong kitail me Siohwa iei ‘poahsoan en atail peren.’ (Wadek Melkahka 43:4.) Pil ni atail ahneki kahpwal kan, kitail sohte anahne pwunod de perki mehkot. Ma Siohwa iei kompoakepatail me keieu mwahu, eri e kak ketin sewese kitail en ahneki peren kohkohlahte!—Mel. 144:15.