E Dahme Kahrehda Kitail en Nantihong Kalohk?
1 Doadoahk en kalohki Rongamwahu en Wehin Koht wiawiehr nan ahmw wasa sangete mahs? (Madiu 24:14) Ma iei, mwein ke pahn pehm me itarehr amwail kalohk nan ahmw wasa oh kumwail koasoiongehr pali laud en aramas akan. Nan rahn pwukat, ahnsou me ke kin kalohk, ke pehm me pali laud en aramas akan sohte perenki rong duwen Wehio. Ahpw, mendahki met, menlau tehk dahme ntingdi nan pwuhken Isaiah’s Prophecy II, pali 141 me koasoiahki sapwellimen Sises tohnpadahk kan: “Nan ekei wasa kan, aramas malaulau kin mwekidki doadoahk en kalohk mendahki doadoahk laud oh ahnsou laud me sounkalohk kan kin kihda pwehn wia doadoahk wet. Ahpw, re kin nantiweite.” Eri, dahme kahrehda kitail en nantihong kalohk?
2 Tamataman Seremaia: E sohte pahn mwahu en nantihong wia doadoahk en kalohk ihte ma aramas akan pahn perenki rong. Seremaia kalohk sounpahr 40 nan ehute wasa mendahki aramas malaulau rong ih oh aramas tohto uhwong ih oh sohte kamehlele dahme e mahsanih. Ahpw, dahme kahrehda Seremaia nantihweite? Pwehki e wia doadoahk ehu me Koht kehkehlikiong ih en wia oh pwehki e wehwehki dahme pahn wiawi ni ahnsou kohkohdo, met pil kamwekid ih en pakairkiong aramas akan dahme pahn wiawi.—Ser. 1:17; 20:9.
3 Irair en rahnwet kin duwehte dahme wiawi ni mwehin Seremaia. Sises padahkiong kitail en “kalohkiseli Rongamwahu ong aramas akan oh kadehde me iei ih me Koht ketin idihadahr pwe en wia sounkopwung en me momour oh me melahr akan.” (Wiewia 10:42) Rohng me kitail kin pakairkiong aramas akan kin wia mehkot me pid arail mour ma re pahn rong. Siohwa pahn kadeikada aramas akan ni E pahn mahsanih ma re kin mwekidki Rongamwahu de soh. Pwehki met, e kin wia atail pwukoa en wia dahme Siohwa kehkehlikiong kitail en wia. Mendahki ekei aramas sohte men rong, met kin kihong kitail ahnsou mwahu en kasalehda uwen laud atail limpoak ong irail oh pil kasalehda atail limpoak ong Siohwa ni atail kin nantihong wia dahme kitail anahne wia. Ahpw, pil mie kamwahu teikan me kitail kin alehdi.
4 Kitail Kin Ale Kamwahu Tohto: Ma kitail kin wia kupwuren Koht, mendahki ma aramas kin rong de soh, met kin kihong kitail nsenamwahu oh peren mehlel loalatail oh irair pwukat kitail sohte kak ahneki ma kitail sohte wia kupwuren Koht. (Mel. 40:8) Ma kitail wia kupwuren Koht, atail mour pahn katapan. Ma kitail pahn kalaudehla ahnsoun kalohk, atail koapworopwor en mihmi nan sapwellimen Koht sampah kapw pahn laudla nan atail mohngiong oh madamadau. Ma kitail pahn kalap medemedewe duwen inou kan me mihmi nan Paipel oh doudouloale duwen mehpwukat, e pahn sewese atail pali ngehn en kekeirada oh kakehlailih atail nanpwung mwahu rehn Siohwa.
5 Mendahki kitail sohte pahn mwadang kilang aramas mwekidki dahme kitail kin kalohki, mwein “war en padahk mehlel” pahn mihmi nan mohngiong en aramas men oh e pahn kekeirada nan sapwellimen Siohwa ahnsou. (Sohn 6:44; 1 Kor. 3:6) Sohte emen rehtail wehwehki aramas depe pahn sukuhliki duwen Wehio sang sapwellimen Siohwa aramas akan nan pein ahmw wasa de wasa teikan nan sampah.
6 E pahn kesempwal kitail en mwadang mwekidki dahme Sises padahkiong kitail wasaht: “Kumwail mwasamwasahn oh pepehd, pwe kumwail sehse ahnsawi. Eri, dahme I ndaiong kumwail, I pil ndaiong aramas koaros: kumwail pepehd oh mwasamwasahn!” (Mark 13:33, 37) Eri, e kesempwal kitail koaros en nantihweite ni atail kin kalohki Rongamwahu en Wehio, oh kaperenda sapwellimen Siohwa mohngiong ni atail kasarawi mware me sarawi oh lapalap.