“Kohwei . . . oh Padahkihong Tohn Wehi kan Koaros; Pwe Re en Wiahla Nei Tohnpadahk”

1, 2. Peidek dah kan me pwarada pwehki mahsen en Sises kan me dierek nan Madiu 24:14?

SISES ketin kohpada me ni imwin rahn akan, rongamwahu en Wehio pahn lohkseli ong aramas koaros. (Mad. 24:14) Nin duwen Sounkadehdehn Siohwa kan, aramas tohto nin sampah eselahr kitail pwehki atail doadoahk en kalohk. Ekei aramas perenki rohngo me kitail kin kalohki, a meteikan sohte perenki. Ahpw ekei me pil sohte perenki rohngo kin wauneki kitail pwehki atail doadoahko. Kitail kin nda me kitail me kin wia doadoahko me Sises ketin kohpadao. Kitail ahneki pwuhng en nda met? Ia duwen atail kak ese me atail kalohk iei doadoahko me Sises ketin kohpadao?

² Pwihn en pelien lamalam tohto kin kose me re kin kalokalohki mahsen en Sises. Ahpw arail kalohk kin wiawihte ni arail kin wia padahk kan nan arail imwen sarawi, nan TV, de nan Internet, de ele re kin ihte ndaiong meteikan ia duwen arail sukuhlki duwen Sises. Meteikan pehm me en sewese aramas akan me anahne sawas de toukihda pein irail nin duwen toahkte, nurse, de sounpadahk kan iei elen arail wie kalokalohk. Ahpw ia duwe, mepwukat iei doadoahk en kalohko me Sises mahsanih duwe?

3. Nin duwen me kileldi nan Madiu 28:19, 20, soahng pahieu dah me sapwellimen Sises tohnpadahk kan anahne wia?

³ Ia duwe, sapwellimen Sises tohnpadahk kan anahne awih aramas akan en kohdo rehrail? Soh! Mwurin eh ketin iasada, Sises ketin mahsanihong sapwellime tohnpadahk epwiki kei: “Kohwei wasa koaros oh padahkihong tohn wehi kan koaros; pwe re en wiahla nei tohnpadahk: papidaisihirailla . . . , oh kehkehlingkihong [“padahkihong,” NW] irail re en peikiong mehkoaros me I koasoanediong kumwail.” (Mad. 28:19, 20) Eri duwehte sapwellimen Sises tohnpadahk ko, kitail anahne wia soahng pahieu. Kitail anahne katohnpadahk, papidaisihirailla, oh padahki irail. Ahpw keieu, kitail anahne kohla rehn aramas akan. Emen me kin samanih Paipel kawehwehda: “En ‘kohwei’ iei pwukoa ieu ong emenemen me pwoson, mehnda ma e kotehla ahl de madau.”​—Mad. 10:7; Luk 10:3.

4. Dahme kin pidada en wiahla soun “laidih aramas akan”?

⁴ Dahme Sises ketin kasik sang sapwellime tohnpadahk kan? E kupwurki irail en kelehpw kalohk, de irail en soandi nin duwen pwihn ehu? Pwehki e pahn apwal ong emen en kalohk ong “tohn wehi kan koaros,” sapwellimen Sises tohnpadahk kan pahn anahne soandi nin duwen pwihn ehu. Met iei wehwehn dahme Sises mahsanih ni eh ketin luke sapwellime tohnpadahk kan en wiahla soun “laidih aramas akan.” (Wadek Madiu 4:18-22.) Sises sohte ketin mahmahsanih duwen sounlaid men me kin doadoahngki pein nah sahl oh pahn, awiawih mwahmw en kangala. Ahpw laid me e mahmahsanih duwe kin pidada sounlaid kan ar doadoahngki uhk. Soangen wiepen laid wet kin pidada doadoahk laud, koasoandi mwahu, oh aramas tohto en doadoahkpene.​—Luk 5:1-11.

5. Peidek pahieu dah me kitail anahne sapengala, oh dahme kahrehda?

⁵ Pwehn ese ihs me kin kalokalohki rongamwahwo rahnwet, kitail anahne sapengala peidek pahieu pwukat:

• Rohng dahieu me sapwellimen Sises tohnpadahk kan anahne kalohki?

• Ia pahn kahrepen arail wiahki met?

• Soangen wiepe dah kan me re anahne doadoahngki?

• Ia uwen laud en doadoahko me irail anahne wia, oh ia uwen werei me re anahne pousehlahte wia met?

Pasapengpen peidek pwukat pahn sewese kitail en kadehdehda ihs me wiewia doadoahk en komour wet oh pahn kakehlakahda atail ineng en pousehlahte wie kalokalohk.​—1 Tim. 4:16.

ROHNG DAHIEU ME KITAIL EN KALOHKI?

6. Dahme kahrehda ke kak kamehlele me Sounkadehdehn Siohwa kan kin kalokalohki rohngo me Sises ketin padahkihong irail en kalohki?

⁶ Wadek Luk 4:43. Sises ketin kalohki ‘Rongamwahu en Wehio,’ oh e ketin kupwurki sapwellime tohnpadahk kan en pil wia met. Mehnia pwihn me kin kalokalohki rohng wet ong aramas koaros? Sounkadehdehn Siohwa kan kelehpw! Irail kan me sohte perenki kitail pil kin nda met. Karasepe, tehk dahme emen pahdere me wia misineri nan sahpw tohto ndaiong emen Sounkadehdehn Siohwa. Nan ehuehu sahpw, pahdereo idek rehn Sounkadehdehn Siohwa kan rohng dah me re kin kalohki. Pahdereo nda, “Irail koaros pweipwei pwe irail koaros ndahla pasapeng ehute: ‘Rongamwahu en Wehio.’” Dahme pahdereo ndahla kadehdehda me kitail sohte pweipwei ahpw me kitail koaros miniminpene nin duwen Kristian mehlel kei. (1 Kor. 1:10) Wehin Koht iei oaralapo me pil kin pwarada nan Kahn Iroir Pakpakairki Wehin Siohwa. Makasihn wet mie ni lokaia 254 oh meh limesapw duwerar (59,000,000) kin wiawihda ni ehuehu ahnsou, kahrehda e wia makasihn me kin keieu kohpeseng nan sampah pwon!

7. Ia duwen atail ese me kaunen pwihn en Kristian likamw kan sohte kin kalokalohki rohngo me Sises ketin padahkihong irail en kalohki?

⁷ Kaunen pwihn en Kristian likamw kan sohte kin kalohki duwen Wehin Koht. Ma re kin koasoia duwen Wehio, me tohto kin nda me e wia pepehm ehu nan mohngiongitail. Re sohte kin padahkihong aramas akan me Wehio iei koperment mehlel ehu nanleng me Sises kin ketin kakaun. Ahpw, re kin kalapw koasoia duwen Sises ni ahnsoun Krismas de Easter. Re sohte kin kawehwehda me Wehio pahn kamwahwihala ahn aramas kahpwal koaros oh me ahnsou keren e pahn kihsang soahng suwed koaros nin sampah. (Kaud. 19:11-21) E sansal me kaunen pwihn en Kristian likamw kan sohte ese dahme Sises pahn ketin wia nin duwen Nanmwarki en Wehin Koht. Oh pwehki re sohte wehwehki duwen sapwellimen Sises rohngo, re sohte wehwehki dahme kahrehda re anahne kalohk.

IA KAHREPEN ATAIL WIAHKI DOADOAHK WET?

8. Kahrepe sapwung dah me kitail en dehr ahneki ong kalohk?

⁸ Sapwellimen Sises tohnpadahk kan en dehr kalohk pwehn wiahda mwohni de wiahda ihmw pweilaud kaselel kan. Sises mahsanihong sapwellime tohnpadahk kan: “Nin duwen amwail aleier nin sohte pweipwei, kumwail pil kihwei nin sohte pweipwei.” (Mad. 10:8) Eri doadoahk en kalohk en dehr wia pesines ehu. (2 Kor. 2:17) Sapwellimen Sises tohnpadahk kan en dehr peki ren ale pweinerail pwehki arail doadoahk en kalohk. (Wadek Wiewia 20:33-35.) Mendahki sapwellimen Sises kaweido inenen sansal, pali laud en pwihnen sarawi kan kin kedirepwkihla arail kin ale mwohni pwehn kolokol arail imwen sarawi ko oh pwainla arail kaun ako oh neirail tohndoadoahk ko. Pwehki met, kaunen pwihn en Kristian likamw tohto uhdahn kepwehpwehla.​—Kaud. 17:4, 5.

9. Ia duwen Sounkadehdehn Siohwa kan ar kasalehda me re kin wia doadoahk en kalohk ni kahrepe pwung?

⁹ Ia duwe, Sounkadehdehn Siohwa kan kin wahseli delen meirong kan ni arail Wasahn Kaudok de mihting tohrohr kan? Soh! Sawas en mwohni me aramas kin pein toukihda iei me kin sewese arail doadoahko. (2 Kor. 9:7) Nan ehu pahr ko me neklahr, Sounkadehdehn Siohwa kan doadoahngkihla awa billion 1.93 kalokalohki rongamwahwo oh wia onop en Paipel rehn aramas daulih meh duwerar nan ehuehu sounpwong. Irail sohte kin ale pweinerail ong arail kalohk ahpw re kin perenki doadoahngki pein neirail mwohni pwehn wia doadoahk wet. Emen sounroporop koasoiahki doadoahk en Sounkadehdehn Siohwa kan. E nda: “Arail mehn akadeio iei en kalokalohk oh padapadahk.” E pil nda me Sounkadehdehn Siohwa kan kin kak nekidala mwahu neirail mwohni pwehki sohte arail kaunen mwomwohdiso me re anahne pwain. Eri ma kitail sohte kin kalohk pwehn ale mwohni, ia kahrepen atail wia met? Kitail kin men wia doadoahk wet pwehki kitail poakohng Siohwa oh pil aramas akan. Soangen madamadau wet kasalehda pweidahn kokohp me kileldi nan Melkahka 110:3, NW. (Wadek.)^[1]

WIEPE DAH KAN ME KITAIL EN DOADOAHNGKI?

10. Wiepe dah kan me Sises oh sapwellime tohnpadahk kan doadoahngki pwehn kalohk?

¹⁰ Wiepe dah kan me Sises oh sapwellime tohnpadahk kan doadoahngki pwehn kalohk? Irail kin kohla wasa koaros me re kak tuhwong aramas. Karasepe, re kin kalohk nanial kan oh wasahn netinet kan. Re pil kin kohla rehn aramas akan ni imwarail kan. (Mad. 10:11; Luk 8:1; Wiewia 5:42; 20:20) Kalohk ihmw lel ihmw wia koasoandi mwahu ehu pwe ren lella rehn soangsoangen aramas koaros.

11, 12. Me pid doadoahk en kalohki rongamwahwo, ia duwen omw kak kapahrekihpene nanti laud me pwihn en Kristian likamw kan oh sapwellimen Siohwa aramas akan kin wia?

¹¹ Ia duwe, pwihnen Kristian likamw kan kin kalohki rongamwahwo duwehte me Sises ketin wia? Dahme kalapw wiawi iei kaunen mwomwohdiso me kin ale pweinerail kin wia padahk kan ong tohn mwomwohdiso. Kaun pwukat sohte kin katohnpadahki me kapw kan ahpw re kin ihte song en kolokol tohn arail mwomwohdiso. Ekei pak, re kin song en kangoange tohn arail mwomwohdiso en kalohk. Karasepe, nan pahr 2001, pahpa sarawi John Paul II koasoia nan kisinlikou ehu me tohn mwomwohdiso kan anahne kalohki Rongamwahwo oh ahneki soangen ngoangohte me wahnpoaron Pohl ahneki, me nda: “Meid suwediong ie, ma I sohte pahn lohkiseli rongamwahu.” Pahpa sarawio uhd nda me kaidehn aramas malaulau keite me ale kasukuhl me anahne wia doadoahk en kalohk wet, ahpw tohn mwomwohdiso pwon. Ahpw, me malaulaute me wia met.

¹² Ahpw ia duwen Sounkadehdehn Siohwa kan? Irail kelehpw me kin kalohki me Sises ketin wie kakaun nin duwen Nanmwarki men sangete pahr 1914. Re kin peikiong Sises oh kin keieu mwohneki doadoahk en kalohk nan arail mour. (Mark 13:10) Pwuhko Pillars of Faith​—American Congregations and Their Partners (lokaiahn wai) koasoia me doadoahk en kalohk uhdahn kesempwal ong Sounkadehdehn Siohwa kan. Pwuhko pil koasoia me ni ahnsou me re kin tuhwong aramas akan me men mwenge, kelekelehpw, oh soumwahu, re kin song en sewese irail, ahpw re sohte kin manokehla me uhdahn arail mehn akadeio iei en kalohki duwen imwin sampah wet oh padahkihong aramas akan duwen komourparail. Sounkadehdehn Siohwa kan kin pousehlahte kalohki rohng wet oh alasang wiepen kalohk kan me Sises oh sapwellime tohnpadahk kan kin doadoahngki.

IA UWEN LAUD OH WEREI ME KITAIL EN POUSEHLAHTE WIA MET?

13. Ia uwen laud en doadoahk me kitail anahne wia nan kalohk?

¹³ Sises mahsanih me sapwellime tohnpadahk kan pahn kalohki oh padahngki rongamwahwo “wasa koaros nin sampah.” (Mad. 24:14) Re ale kehkehlik en katohnpadahk “tohn wehi kan koaros.” (Mad. 28:19, 20) Met wehwehki me rongamwahwo pahn lohkseli nan sampah pwon.

14, 15. Dahme kadehdehda me Sounkadehdehn Siohwa kan kin kapwaiada sapwellimen Sises kokohpo me pid uwen laud en doadoahk me re anahne wia? (Menlau kilang tepin kilel.)

¹⁴ Sounkadehdehn Siohwa kan kelehpw me kapwaiada sapwellimen Sises kokohpo me rongamwahwo pahn lohkseli nan sampah pwon. Dahme kahrehda kitail ndahki met? Nan Wehin Amerika, mpen meh 600,000 me wia tohn kaunen pelien lamalam en Kristian likamw akan, a mie Sounkadehdehn Siohwa mpen meh rar rielopw (1,200,000) me kin kalohki rongamwahwo nan sahpwo. Nan sampah pwon, mie pahdere en Kadolik mpen meh 400,000, ahpw Sounkadehdehn Siohwa daulih meh welirar me kin kalohki rongamwahwo nan sapw 240. E sansal me Sounkadehdehn Siohwa kan kin kalohki rongamwahwo nan sampah pwon oh met kin kawauwih oh kapinga Siohwa!—Mel. 34:1; 51:15.

¹⁵ Nin duwen Sounkadehdehn Siohwa kan, atail mehn akadei iei en kalohki rongamwahwo ong aramas tohto ni uwen me kitail kak mwohn imwio leledo. Pwehn wia doadoahk wet, kitail kawehwehdahr oh wiadahr pwuhk, makasihn, kisin doaropwe, oh doaropwehn luhk ong mihting tohrohr oh rahnen Katamano meh rar rar kei ni lokaia daulih 700. Kitail kin kihong aramas akan mepwukat ni soh isepe. Pahr me neklahro, kitail wiahda uwen tohtohn sawaspen Paipel mpen meh billion 4.5. Kitail pil wiahda pwuhken New World Translation of the Holy Scriptures daulih meh riesapw (200 million) ni lokaia daulih 130. Oh nan neitail website jw.org, mie iren sawas kan me mi ni lokaia daulih 750. Sounkadehdehn Siohwa kan kelehpw me wiewia doadoahk kapwuriamwei wet.

16. Ia duwen atail ese me sapwellimen Koht manaman kin ieiang Sounkadehdehn Siohwa kan?

¹⁶ Ia uwen werei me doadoahk en kalohk pahn pousehlahte wiawi? Sises mahsanih me rongamwahwo pahn lohkseli lao imwio leledo. Nin duwen Sounkadehdehn Siohwa kan, kitail kin kak dadaurete nan doadoahk en kalohk erein imwin rahn akan ihte pwehki sapwellimen Siohwa manaman kin ieiang kitail. (Wiewia 1:8; 1 Pit. 4:14) Ekei aramas me kin poadidiong arail pelien lamalam kakete nda: “Sapwellimen Koht manaman kin ieiang kiht.” Ahpw ia duwe, irail kak pousehlahte kalokalohk erein imwin rahn akan? Ekei pwihn kin song en kalohk duwehte Sounkadehdehn Siohwa kan, ahpw re sohte kin pweida. Ekei kin men kalohk, ahpw ongete ahnsou kis. Pil ekei ele kin kalohk ihmw lel ihmw, ahpw re sohte kin kalohki rongamwahu en Wehio. Eri re sohte kin wiewia doadoahko me Sises ketin tapiada.

IHS ME KIN UHDAHN KALOKALOHKI RONGAMWAHWO RAHNWET?

17, 18. (a) Dahme kahrehda kitail kak uhdahn kamehlele me Sounkadehdehn Siohwa kan iei me kin kalokalohki rongamwahu en Wehio rahnwet? (b) Ia duwen atail kin kak pousehlahte wiewia doadoahk wet?

¹⁷ Eri ihs me kin kalokalohki rongamwahu en Wehio rahnwet? Sounkadehdehn Siohwa kan kelehpw! Ia duwen atail ese met? Pwehki kitail kin kalokalohki rohngo me Sises ketin padahkihong kitail en kalohki, me iei rongamwahu en Wehio. Kitail kin raparapahki aramas akan nan kalohk, eri kitail kin doadoahngki wiepe pwung kan. Kitail pil ahneki kahrepe pwung en kalohk, me iei kitail kin poakohng Siohwa oh aramas akan. Doadoahk en kalohk me kitail kin wia iei me keieu laud pwehki kitail kin kalohk ong aramas en wehi oh lokaia koaros. Oh kitail pahn pousehlahte kalohki rongamwahu en Wehio lao imwio leledo!

¹⁸ E uhdahn kapwuriamwei en kilang doadoahk kaselelo me sapwellimen Siohwa aramas akan kin wiewia erein imwin rahn pwukat. Ahpw ia duwen atail kin kak kalohki rongamwahwo nan sampah pwon? Wahnpoaron Pohl kawehwehda: “Koht kin ketin wie doadoahk loalamwail ahnsou koaros, pwe kumwail en materek oh kak kapwaiada kupwure.” (Pil. 2:13) Siohwa en ketin pousehlahte ketikihong kitail kehl me kitail anahne pwe kitail en doulahte kalokalohki rongamwahwo me Sises Krais kehkehlikihong kitail en wia!​—2 Tim. 4:5.