“Ia Duwen Arail Kak Rong?”
1. Dahme kahrehda doadoahk en kalohk kak wia kahpwal ehu? Ahpw dahme kahrehda kitail anahne usehlahte wia doadoahk wet?
1 Pwehki rahnen Siohwa pahn mwadang leledo, kitail anahne sewese aramas tohto en esehla padahk mehlel duwen Koht oh kupwure kan ong tohnsampah. (Sohn 17:3; 2 Pit. 3:9, 10) Met kak wia kahpwal ehu ekei ahnsou pwehki aramas tohto sohte nsenohki padahk mehlel de re kin kapailoke kitail pwehki atail kin wia doadoahk en kalohk. (2 Pit. 3:3, 4) Ahpw kitail kamehlele me mie aramas akan nan atail wasahn kalohk me pahn perenki rong rongamwahu. Ia duwen arail kak rong ma sohte me pahn kalohk ong irail?—Rom 10:14, 15.
2. Ia duwen en Pohl mehn kahlemeng kin kangoange kitail?
2 Powehdi Uhwong kan: Pwehki mie aramas tohto me pahn perenki rong rongamwahu en Wehin Koht, kitail en dehr masak uhwong kan. Pilipai iei keieun kahnimw nan Iurop me wahnpoaron Pohl kalohki rongamwahwo. Ahnsou me aramas akan karaun likamwih Pohl oh Sailas, ira ale kamakam laud oh selidi nan imweteng. (Wiewia 16:16-24) Ahpw met sohte kahrehiong Pohl en masak oh uhdi sang kalohk. Mwurin mwo, Pohl kohla nan Deselonika nan eh seiloak en misineri oh ‘Koht ketin kakehlailih ih’ pwehn eimah kalohk. (1 Des. 2:2) Ke sou lemeleme me en Pohl mehn kahlemeng kin kasalehda dahme kahrehda kitail en dehr ‘pwangahkihda’ wia doadoahk en kalohk?—Kal. 6:9.
3. Dahme kin kak kamwakid ekei me sohte perenki rong mahs en wekidala arail madamadau?
3 Aramas tohto me sohte perenki rong rongamwahu erein sounpar tohto wekidala arail madamadau. Mwein kahpwal en mwohni, soumwahu, mehlahn peneinei, de kahpwal akan me kin wiawi nan sampah me kamwakid irail en wekidala arail madamadau. (1 Kor. 7:31) Ekei aramas, arail pahpa oh nohno kin uhwong padahk mehlel, ahpw met irail laudlahr oh perenki rong. Atail kin kaukaule kalohk kin kihong irail ahnsou mwahu en ‘likweriong mwaren Siohwa’ mwohn imwin koasoandi wet pahn leledo.—Rom 10:13.
4. Dahme kin kamwakid kitail en “wonoweite” ni doadoahk en kalohk?
4 “Wonoweite”: Atail limpoak ong Koht oh mehn mpatail pahn kamwakid kitail en “wonoweite” ni doadoahk en kalohk oh katohnpadahk duwehte wahnpoaron kan kin wia nan arail ahnsou. (Wiewia 5:42) Rahnwet, aramas tohto kin “pahtoulahr oh milahr nan apwal pwehki soahng saut akan” me wiewiawi nan sampah. (Esek. 9:4) Irail pahn kak ale koapworopwor kaselel oh kamweit ni ahnsou me irail rong rongamwahu! Mendahki ma pali laud en aramas sohte kin perenki rong, Paipel kin kamehlelehiong kitail me Siohwa kin kupwurperenki atail doadoahk.—Ipru 13:15, 16.