“I Pahn Pidakih Omw Pei Sarawi, O Siohwa”

“I PAHN kamwekele pehi kat pwehn kasalehda me sohte dipei, oh I pahn pidakih omw pei sarawi, O Siohwa.” (Melkahka 26:6, New World Translation) Ki mahsen pwukat Nanmwarki Depit en mahso kin kasalehda ah loalopwoat ong Siohwa. Ahpw, dahme kahrehda e pahn “pidakih” sapwellimen Siohwa pei sarawi, oh ni ahl dahieu?

Ong Depit, poahsoan en sapwellimen Siohwa kaudok iei Impwal Sarawi me iangahki pei sarawi en meirong me kidikidki kapa, me erein ah kaunda kin mihmi nan Kipeon, ni paliepeng en Serusalem. (1 Nanmwarki 3:4) Pei sarawio reireikihte piht isuh, tikitiksang pei sarawi kaselelo me pahn koukouda nan kelen Tehnpas Sarawi en Solomon.a Mendahki met, Depit kin perenki Impwal Sarawio iangahki pei sarawio, me kin wia poahsoanen kaudok mwakelekel nan Israel.​—Melkahka 26:8.

Meirong en isihs, oh meirong en kaminimin, oh meirong en dihp kin wiawihda pohn pei sarawio, oh meirong en Rahnen Tomw me kin wiawi pahr koaros kin wia meirong kan me kin wiawi pwehki dipen wehio. Pei sarawio oh ah meirong kan kin mie wehwehparail ong Kristian kan rahnwet. Wahnpoaron Pohl kawehwehda me pei sarawio kin karasaiong kupwuren Koht, nin doken ah kin kupwurki meirong pwung ehu pwehn pwain sapahldo tohnsampah. Pohl mahsanih: “Pwehki Sises Krais eh ketin kapwaiada kupwuren Koht, kitail koaros mwakelekellahr sang dipatail kan pwehki meirong en kahlepe me e ketin wiahda pahn mehpak pwehki kitail.”​—Ipru 10:5-10.

Ni ahnsou me re pahn wia arail doadoahk ni pei sarawio, samworo kan kin wuden pehrail kan nan pihl pwehl kamwakelehda irail. Ihme e konehng, Nanmwarki Depit wuden peh “pwehn kasalehda me sohte dipe” mwohn ah ‘pidakih pei sarawio.’ E kin mwekidki “mehlel oh pwung.” (1 Nanmwarki 9:4) Ma e sohte pahn wuden peh kan ni ahl wet, ah kaudok​—ah ‘pidakih pei sarawio—​sohte pahn pwung pahn kupwuren Koht. Ni mehlel, Depit kaidehn mehn Lipai men oh sohte ahneki kapai en wia pwukoahn samworo ni pei sarawio. Mendahki ih nanmwarki men, e sohte mweimwei en pedolong nan kelen Impwal Sarawio. Ahpw, pwehki e wia mehn Israel lelepek men, e kin peikiong kosonned en Moses oh kaukaule wahdo ah meirong kan pwehn meirongla pohn pei sarawio. E kin pidakih pei sarawio ni irairo me e kin poahsoanehda ah mour pohn kaudok mwakelekel.

Kitail rahnwet kak idawehn mehn kahlemeng mwahu en Depit? Ei. Kitail pil kak wuden pehtail ni mwakelekel oh pidakih sapwellimen Koht pei sarawio ma kitail kin kasalehda pwoson meirong en Sises, oh ni ‘pei mwakelekel oh mohngiong min’ papah Siohwa ni mohngiong unsek.​—Melkahka 24:4.

[Nting tikitik me mi pah]

[Kilel nan Pali 19]

Pei sarawi kin karasaiong kupwuren Siohwa, pwe e kupwurki meirong me pwainsapahldo tohnsampah