Kolokolete Loalopwoat Ong Siohwa

LOALOPWOAT, mendahki e wia irair ehu me aramas sohla kalap kasalehda, irair wet kin wia kilelepen ladu kan en Koht mehlelo, Siohwa. Aramas me loalopwoat kin kolokolte ah lelepek ni ahnsoun kasongosong kan oh sohte kin luwetla erein sounpahr tohto. Tehk Nanmwarki mwahu Esekaia. “Sohte nanmwarki men mwowe de mwuri nan Suda me duwehte eh mwehi,” Paipel ketihtihki. Dahme karehda Esekaia weksang nanmwarki teikan? E “kin loalopwoatohng Kauno [“Siohwa,” New World Translation], mendahki e kin kapilpilkihpene sounkaudok kan en koht likamw Molech. Ehi, Esekaia “sohte mwahn kin sapeikiong, e kin kanahieng kapwaiada koasoandi koaros me Kauno [“Siohwa,” NWT] ketikihong Moses.”​—2 Nanmwarki 18:1-6.

Wahnpoaron Pohl pil emen me kin kolokolete ah loalopwoatohng Siohwa. Rekord en ah papah Siohwa me dierekda nan Pali Nting en Krihk kin kihda mehn kadehde duwen en Pohl kin kaukaule papahkihong Koht ah mour unsek. Kerenlahng ni imwilahn ah mour pohn sampah, Pohl kak koasoiahki pein ih: “I wiahier uwen ei kak nan mour wet, me rasehng weirentang, I kanekelahr weir wet, oh I pil kolokolete pwoson.”​—2 Timoty 4:7.

Ia uwen Esekaia oh Pohl kin wiahda mehn karasaras en loalopwoat! Kitail en alasang ara pwoson ni atail pahn kolokolete atail loalopwoatohng atail Koht Lapalahpie, Siohwa.​—Ipru 13:7.