Popohl Pahn mie nan Millennium Kapw Wet?
THE International Year for the Culture of Peace kasarawihla nan Paris oh New York City ni September 14, 1999. General Assembly en United Nations kalohkihda met ong pahro 2000. Federico Mayor, director general en UNESCO, pekih “en wiahda ehu mwekid me wehin sampah pwon pahn iang pidada ong ehu koasoandi en popohl oh soh peipei.”
UNESCO ahneki koasoandi ehu me dene “pwehki mahwen kin tepida nan madamadau en aramas, ihme sang nan madamadau en aramas me popohl en wiawihda.” Me pahrekiong met, pwihn wet kupwurki en wiahda ehu koasoandi en popohl sang ni “kasukuhl, kaweliali en madamadau kan oh miniminpene.” Mr. Mayor kosoia me e sohte itar en “popohl, eh sohte itar en meleilei, ahpw en wiahda pwehn mie popohl.”
E kansensuwed pwe nan pahro 2000 sohte popohl. Poadoapoad en ahnsou wet—iangahki wiewia kan nan pahr 2000—kin kasalehda en aramas soakoahiok en kauhdi mahwen oh pepei mendahki re songosong en wia met.
Ahpw, kitail en tehk me popohl kin pidada kasukuhl. Sounpar 2,700 samwa samwalahro soukohp Aiseia kohpada: “Pein ngehi [Siohwa] pahn padahkihong noumw aramas akan, oh ketikihong irail paiamwahu oh popohl.” (Aiseia 54:13) Soukohp ohte kilangada ahnsou ehu nan ahnsou kohkohdo me aramas en wehi kan koaros pahn kohdohng kaudok mwakelekel en Siohwa Koht pwehn sukuhliki sapwellime ahl akan. Ia imwilahn met? “Eri, re pahn wekidohng neirail kedlahs akan ong ni mehn deipwel, oh neirail ketieu kan ong ni naipokos. Sohte ehu wehi pahn pwurehng pelianda ehu wehi, de pil kaunopada nair sounpei kan ong mahwen.” (Aiseia 2:2-4) Me pahrekiong kokohpo, Sounkadehdehn Siohwa kan kin iang wia doadoahk en kasukuhl ehu nan sampah pwon me seweseiehr aramas rar kan en powehdi arail kailongki wehi teikan oh keinek teikan me kin wia utupen pali laud en mahwen kan.
Mahwen kan pahn sohla wiawi pahn Wehin Koht, me pahn uhd wahdo popohl oh meleilei soutuk ong sampah. (Melkahka 72:7; Daniel 2:44) Eri, mahsan kan en sounmelkahkao pahn pweida: “Kumwail kohdo, oh kilang dahme Kauno [“Siohwa,” New World Translation] ketin wiahda. Kumwail kilang soahng kapwuriamwei kan me e ketin wiahda nin sampah. E kin ketin katokehdi mahwen wasa koaros nin sampah.”—Melkahka 46:8, 9.