Dahme Kahrehda Ke Kin Papah Koht?
Emen nanmwarki me kin lahn Koht ketikihda kaweid wet ong nah pwutako: “Ke en pohnese Koht en semwomw oh papah ni mohngiong unsek oh inengieng nan omw lamalam.” (1 Kronikel 28:9) E sansal me, Siohwa kupwurki sapwellime ladu kan en papahkihong ih mohngiong kan me kin diren kalahngan.
NIN duwen Sounkadehdehn Siohwa kan, kitail kak wehkada me ni ahnsou me kitail tepin rong inou kan en Paipel kawehwehong kitail, mohngiongatail kin mwekidikihda atail kalahngan. Rahn koaros, kitail kin sukuhlkihdi mehkot kapw duwen kupwur kan en Koht. Uwen lauden atail kin sukuhliki duwen Siohwa, atail ineng en papah Ih kin kehlailkihla “mohngiong unsek oh inengieng en lamalam.”
Me tohto me wiahla Sounkadehdehn Siohwa kin kaukaulehte papah Siohwa ni peren erein arail mour. Ahpw, ekei Kristian nin tepio kin perenki arail papah Siohwa, ahpw kedekedeo, re kin katiasang kahrepe kan me kin kamwekid kitail en papah Koht. Met kin wiawihong uhk? Ma met kin wiawihong uhk, dehr nsensuwedla. Kitail kak kapwurehdo atail peren en mahso. Iaduwen?
Medemedewe Omw Kating kan
Keieu, medemedewe kapai kan rahn koaros me ke kin alehsang rehn Koht. Medemedewe duwen sapwellimen Siohwa kisakis mwahu kan: sapwellime doadoahk tohto en kapikipik kan—me soangen pwihn en aramas de paien wehi koaros kak ale—sapwellime sawas en mwenge kan oh nimpil kan, omw roson mwahu, omw wehwehki padahk mehlel en Paipel, oh me keieu kesempwal, kisakis en sapwellime Ohlo. Sapwellime pwoula kaunopada ahlo ong uhk en papahkihong Koht nsen mwakelekel. (Sohn 3:16; Seims 1:17) Uwen lauden omw kin doudouloalle sapwellimen Koht kamwahu, omw kalahngankin ih pahn pil laudla. Mohngiongomw eri pahn kamwekid uhk en papah ih pwehki omw kalahnganki soahng kan koaros me e ketin wiadahr. Ni mehlel ke pahn tepiada ahneki soangen pepehmohte me sounmelkahkao ahneki me ntingihdi: “Maing Kaun [“Siohwa,” New World Translation], at Koht, ia uwen tohtohn soahng kapwuriamwei kan me komw ketin wiahiong kiht; sohte emen mie me duwehte komwi! . . . re uhdahn pahn tohtohsang me I kak kasalehda!”—Melkahka 40:5.
Depit me ntingihdi mahsen pwukat, ohl emen me ah mour kin dirkihla kahpwal akan. Ni ahnsou me Depit pwulopwul, pali lauden ah mour e kin tangatang sang Nanmwarki suwed Sohl oh nah sounsilasil kan pwehki ar kin raparapahki en kemehla ih. (1 Samuel 23:7, 8, 19-23) Mie en Depit pein luwet ehu me e anahne en peiong. E pohnese soahng pwukat koaros nan Melkahka 40: “Suwed ngeder kapiliepenehr—me nohn ngeder oh soh kak wadawad! Dipei kan salihiepenehr, oh I sohte kak kilang wasa; re tohtohsang pitenmoangei kat, oh loalei tikitikla.” (Melkahka 40:12) Ehi, mie en Depit kahpwal akan, ahpw e sohte mweidohng ren uhdahn powehdi ih. E kin medemedewehte ahl akan me Siohwa kin ketin kapaiada ih, mendahki ah kahpwal kan, oh e kin diarada me kapai ko kin tohtohsang ah kahpwal akan.
Ni ahnsou me ke kin pehm me ke solahr kakohng pein omw kahpwal akan de ke ahneki pepehm me ke sohte itar, e mwahu en uhdi oh medemedewe omw kapai kan, duwehte me Depit wia. Ni mehlel, kalahnganki soangen kapai pwukat kin kamwekid uhk en inoukihong pein uhk Siohwa; soangen lamalam wet kak sewese iuk en pwurehng kapwurehdo pereno me ke ahneki mahso oh kak sewese iuk en papahkihong Koht mohngiong ehu me diren kalahngan.
Mihding kan en Mwomwohdiso Kak Sawas
Patohngete doudouloale sapwellimen Siohwa kamwahu kan, kitail anahne en werekiong iengetail Kristian teikan. E kin wia mehn kangoang en kaukaule patehng ohl kan, lih kan, oh me pwulopwul kan me kin poakohng Koht me kin nannanti en papah Ih. Arail mehn kahlemeng mwahu kan kak kamwekid kitail en papah ni mour unsek nan sapwellimen Siohwa doadoahk. Atail mih nan Kingdom Hall pil kak kangoange irail.
Ni mehlel, ni ahnsou me kitail kin kohdo nan ihmw sang atail doadoahk me kapwang, de ni ahnsou me kitail kin mworusala pwehki kahpwal ehu de luwet ehu, e sohte pahn mengei en medemedewe en iang towehda mihding ni Kingdom Hall. Ni soangen ahnsou ko, kitail anahne en kehlail ong pein kitail, rasehng, ‘kaloke paliwereiet,’ pwe kitail en peikiong kaweido en pokonpene rehn iengetail Kristian kan.—1 Korint 9:26, 27; Ipru 10:23-25.
Ma ih met me anahne en wiawi, kitail en medemedewe me kitail sohte uhdahn poakohng Siohwa? Soh. Kristian mah kan en mahso me arail poakohng Koht uhdahn mehlel anahne en nantihong en wia kupwuren Koht. (Luk 13:24) Wahnpoaron Pohl iei emen Kristian pwukat. Ni sansal e kasalehda ah pepehm ni ahl wet: “I ese me mwahu sohte mi loalei—met wehwehki nin duwen ahnepen ngehi aramas. Pwe mehnda ma I kin inengieng wia me mwahu, ahpw I kin sohte kakohng. I sohte kin wiahda me mwahu me I kin inengieng wia; ahpw I kin wiahda me suwed me I sohte men wia.” (Rom 7:18, 19) Oh e padahkihong mehn Korint kan: “Sohte ei pwuhng en suweiki ei kin kapahrengki rongamwahu, pwe e uhdahn koasoandiong ie I en wia doadoahk wet. . . . Ma I kin wia doadoahk wet sang ni pein nsenei, eri, I kak ale pweipweiki; ahpw pwehki pwukoa ehu me Koht ketikihong ie I pahn kapwaiada.”—1 Korint 9:16, 17.
Duwehte me tohto rehtail, mie en Pohl irair luwet kan me kin kerempwehla ah ineng en wia dahme pwung. Ahpw, e kin pei kehlail en powehdi ineng pwukat, oh pak tohto, e kin pweida. Ni mehlel, Pohl sohte kak pweida sang ni pein ah kehl. E ntingihdi: “I kakohng mehkoaros sang ni manamano me Krais kin ketikihong ie.” (Pilipai 4:13) Siohwa, meno me ketikihong Pohl manaman, pil pahn ketikihong uhk manaman en wia dahme pwung ma ke pahn pekih sapwellime sawas. (Pilipai 4:6, 7) Ihme “pei kehlailki pwoson,” oh Siohwa pahn kapaiuhkada.—Sud 3.
Ke sohte anahne en peiki pei wet kelepw. Nan mwomwohdiso kan en Sounkadehdehn Siohwa kan, elder Kristian mah kan, me kin pein poadidiohng “peiki pwoson,” pahn men sewese uhk. Ma ke tuhwong elder men pwehn sewese uhk, e pahn nantiong “koasoi en kamweit” ong uhk. (1 Deselonika 5:14) Ah mehn akedei iei en wia “wasahn ruk sang kisinieng oh melimel.”—Aiseia 32:2.
“Koht iei limpoak,” oh e kupwurki sapwellime ladu kan en papah Ih ni limpoak. (1 Sohn 4:8) Ma omw limpoak ong Koht anahne en pwurehng kehlailla duwehte nin tepio, wiahda kahk kan me konehng met, nin duwen me sansalda powe. Ke pahn peren ma ke pahn wia met.