Iaduwen Ahr Kin Kak Powehdi Kasongepen Pwoson me kin Kohsang Iengerail kan
INENGIENG pwe meteikan en pwungkin uhk kin kamwekid me tohto en wekidala arail lamalam oh wiewia en duwehte irail kan me arail sounpahr duwepenehte. Me pwulopwul kan keieu anahne kehl en nda soh ong tiahk keper kan, duwehte doadoahngki wini en kasaliel kan oh tiahk en nenek. Iaduwen re kak powehdi kasongosong kan sang rehn iengerail kan me irail dih ehu?
Peinakapw riemen nan Poland ahpwtehn ntingihdi: “Ngehnin sampah kin inenen sansal rehn aht dih kan. Re sohte kin mehlel nan arail test kan nan sukuhl, re kin doadoahngki lokaia suwed, re kin perenki likawih likou me kasalehda sidail en sampah oh re kin lelki koul kan me pid tiahk samin. Ia uwen aht peren en naineki artikel kan me kin koasoia duwen kiht me pwulopwul kan oh pere kiht sang lamalam en me pwulopwul kan me sohte kin nsenamwahu oh kin pelian!
“Lokaia kan sohte kak kasalehda aht kalahnganki artikel kan me mihmi nan makisihn en Watchtower me kin padahkiong kiht me nin doken aramas pwulopwul mie anahnpat oh meteikan kin kalahngankin kiht. Kaweid en Paipel kan me se alehier kin sewese kiht en kainene aht ewen kahk kan ni ahl me konehng pwe sen kaukaule kaperenda Siohwa Koht. Se kamehlele me papah lelepek ong Siohwa iei elen mour me keieu mwahu.”
Ehi, me pwulopwul kan kak kesihnenda oh powehdi kasongosong kna sang iengerail me irail dih ehu. Ni arail kaiahnehda “arail koahiek en kak kasawihada wekpeseng en dahme mwahu oh dahme suwed,” Kristian me pwulopwul kan kin sukuhliki en wiahda koasoandi erpit kan me sohte kin kasalehda “ngehnin sampah” ahpw, “ngehn me kohsang rehn Koht.”—Ipru 5:14; 1 Korint 2:12.