Ripoht En Sounkalohk Kan En Wehio

India​—“Miniminpenehn Soangsoangen Aramas”

“MINIMINPENEHN Soangsoangen Aramas” kin wia lokaia ndand ehu me kin kasalehda duwen doalpenehn soangsoangen wehi kan nan India. Pwe minimin en mie nan sahpw laud wet me audaudki soangsoangen tiahk en sahpw, lokaia, kaudok, keinek, likou, oh mwenge kaidehn mehkot mengei. Ahpw, miniminpene kin sansalda ni ohpis en Sounkadehdehn Siohwa kan nan India, mendahki irail ko me kin toukihda pein irail oh arail sawas me kin kousoan oh doadoahk nan ohpis ko kin kohsang kousapw tohto oh kin lokaiahki soangsoangen lokaia kan.

• Menlau tuhwong mahs Rajrani​—emen lih pwulopwul sang Punjab, me mih ni keieu imwin paliepeng en palikapi en India. Ni ahnsou me Rajrani kin sukusukuhl, emen ienge tohnsukuhl kan tepida onop Paipel rehn Sounkadehdehn Siohwa kan. Sister pwulopwul menet kin song en kihong Rajrani en perenki Paipel. Pwehki ienge tohnsukuhlo sohte nohn ese wadek lokaiahn wai oh The Watchtower saikinte kawehwehong ni lokaiahn Punjabi ni ahnsowo, sistero kin pekihda rehn Rajrani ma e kak sewese ih en kawehwe audepen makisihno ong ih. Dahme Rajrani wadek nan makisihn The Watchtower tepida kamwekid laud ih me kahrehda mendahki ah pahpa oh nohno kin uhwong, e kekeirada lau e inoukihong Siohwa Koht eh mour oh papidaisla. Nan eh doadoahk nan Bethel nan India rahnwet, e kin wia soahngohte me kapehdpeseng mese ong padahk mehlel. E kin kawehwe sawaspen Pwuhk Sarawi kan ong ni lokaiahn Punjabi!

• Pil menlau tehk duwen Bijoe, me kohsang ehu wasa nan India​—ni palieir en palikapi en Kerala. Bijoe lekdeksang nan high sukuhl pwehki ah sohte kin iang poupali ni ahnsou me kasarawi en wehi kin wiawi. Mwurin ehu kopwung me imwikihla kana ong kaudok mwakelekel, Bijoe pwurehla sukuhl.a Mwurin mwo, e pil kohla sukuhl laud. Ahpw, tiahk samin en wasao (sukuhl laud) kin lidere ah nsen mwakelekel, kahrehda e sohla sukuhl. Ahnsou wet, mwurin sounpahr eisek nan Bethel, e pehm me e paiekihda laud ah wia emen tohn peneinei en Bethel me kin miniminpene ahpw wia soangsoangen aramas tohto sang ah pahn rapahki sukuhl laud.

• Norma oh Lily koaros mahki sounpahr 70 samwa oh liohdihlahr erein sounpahr tohto. Emen emen ira papahkier nan doadoahk en kalohk kaukaule daulih sounpahr 40. Lily kin wia doadoahkiehr nan rahn ohpis daulih sounpahr 20 nin duwen sounkawehwehn lokaiahn Tamil. Norma kohdo nan Bethel sounpahr 13 samwalahro mwurin ah pwoudo mehla. Likin ara (Norma oh Lily) kin wia mehn kahlemeng mwahu en tohndoadoahk pwerisek oh loalenong ara doadoahk, re kin kahrehda kaminimin rehn tohn peneinei en Bethel pwon. Re kin perenki kamweitih irail ko me kin mwemweitdo Bethel, oh re kin perenki werekiong tohn peneinei en Bethel me pwulopwul kan, ni ara kin ehukihong irail peren me re ahneki sang sounpahr tohto en ara mour en Kristian. Oh pil, me pwulopwul kan kin kapwurehiong ira ara lelepek sang ni arail kin luhke ira ong nan arail pere kan pwehn werekiong ira oh sewese ira ni ahnsou me ira anahne sawas. Met uhdahn wia mehn kahlemeng mwahu kan!

Ni arail powehdiehr madamadau wekpeseng kan me kin kahrehda pingiping oh saminimin nan wasa tohto, irail tohndoadoahk pwukat me kin toukihda pein irail oh arail ahnsou ni soh isepe kin ni peren doadoahkpene pwehn papah meteikan nin duwen tohnpeneinei minimin en Bethel nan India.​—Melkahka 133:1.

[Nting tikitik me mi pah]

[Kilel Credit Line]

Background: Mountain High Maps® Copyright © 1997 Digital Wisdom, Inc.