Ke Kak Iang Doadoahk Wet?
1 Mehkot kapwuriamwei wiawi nan pahr 778 B.C.E. Nan kasansal, soukoup Aiseia kin kilang “Siohwa, ket nan mwoale ile ieu.” Aiseia eri rong serap ko koulki koul kan me kin kasalehda sapwellimen Siohwa lingan, mahsanih: “Sarawi, sarawi, sarawi iei Siohwa, kaun en karis koaros.” Dahme wiawi ahnsowo inenen kapwuriamwei! Siohwa pil wia kalelapak me apwal ahnsowo: “Ihs me I pahn kadarala, oh ihs me pahn wia atail meninkeder?” E sohte kawehwe duwen dahme pahn wiawi wasao me E pahn kadarala aramaso de e pil sohte kawehwe ma aramas pahn paiekihda doadoahko me e pahn wia de soh. Ahpw, mendahki mehpwukat, Aiseia sohte pweiek, a e mwadang sapeng: “Iet ngehi, Maing, komwi ketin poaroneiehla.”—Aiseia 6:1, 3, 8, New World Translation.
2 Ngehnen tounmeteikihla pein nsene pwehn wia kupwuren Siohwa kin sansalda rehn sapwellimen Siohwa aramas akan. (Mel. 110:3) Ni ahnsou wet, luhk tohrohr kohwong irail me men wia doadoahk tohrohr kan en kasalehda me re men papah Siohwa ni ahl wet. Ke kaunopadahr pwehn iang wia doadoahk wet ni ngehnen tounmetei duwehte Aiseia?
3 Mie anahn laud ahnsou koaros ong brother kan me kak doadoahk nan Bethel. Met kin wehwehki me mie arail ineng laud pwehn mwohnki Wehin Koht nan arail mour oh wia sohte lipilipil dahme re anahne wia pwehn utungada doadoahk en kalohk wasa koaros nan sampah. (Madiu 6:33) Ni mehlel, papah nin duwen emen tohn peneinei en Bethel kin wia pwais tohrohr pwehn kak papah Siohwa sang nan mohngiongatail. Iaduwen?
4 Doadoahk me kin Wiawi nan Bethel: Medemedewe duwen soahng koaros me kaukaule wiawi nan imwen Bethel nan United States: nan Brooklyn, Patterson, oh Wallkill, New York. Brother oh sister meh 5,730 me mihmi nan peneinei en Bethel nan wasa pwukat kin ahneki pwais kaselel pwe re kin doadoahk ni arail miniminiong oh utungada ladu lelepek oh loalokong oh Governing Body ni arail kin koasoanehdi wiahda Pwuhk Sarawi kan oh sawaspen Pwuhk Sarawi kan pwehn kohpeseng wasa koaros nan sampah oh nan pil pwe aramas en kak doadoahngki pwuhk pwukat ong pein arail onop. (Madiu 24:45) Karasepe ehu, nan pahr en kalohk me ahpwtehn nek, pwuhk 24,364,670, brochure 39,813,464, makisihn 270,528,000, oh audiocassette 1,271,041 me wiawihda oh pwehki sawaspene oh doadoahkpene en irail koaros me wiahda peneinei en Bethel nan United States, sawaspen Pwuhk Sarawi pwukat kin wiawihda oh pekederpeseng nan sampah pwon. Irail me kin onopki oh pilada “koasoi kansenamwahu kan oh mahsen kan me mehlel” pwehn ntingdi nan sawaspen Pwuhk Sarawi pwukat. (Ekl. 12:9, 10) Sawas pil kin kohwong irail sounkawehwe meh 1,900 samwa wasa koaros nan sampah pwe ren kak kawehwehda sawaspen Pwuhk Sarawi kan ni lokaia 300 samwa. Doadoahk laud kin wiawi pwehn koasoanehdi dahme kin wiawi nan Rahn Ohpis 111 wasa koaros nan sampah, iangahki mwomwohdiso 11,500 samwa me mihmi nan United States. Rahn Ohpis kan kin ale sawas kan me kin pid koasoanehdi oh wiahda imwen Bethel kan oh Wasahn Kapokon kan oh pil Kingdom Hall 15,248 me anahn nan sahpw kan me apwal en pwain soahng pwukat. Irail aramas tohto sang epwiki kei me kin tounmeteiki arail ahnsou oh kehl kin apwalih oh sewese doadoahk en wiahda oh kadarpeseng pwuhk kan, kamwakel, apwalih misihn kan, wiahda mwenge ong tohn peneinei en Bethel, pwainda soahng kan me re anahne, apwalih ong tohn peneinei en Bethel arail roson en paliwar, oh pil soangsoangen doadoahk teikan nan Bethel.
5 E sansal me pwehn wiahda soahng koaros me anahn kin wia doadoahk laud. Kitail wehwehki me: ma kitail pahn doadoahngki atail kehl koaros en utungada doadoahk en kalohk oh padahk kin kahrehda peren laud. Ma emen kin doadoahk nan Bethel, e kin sewese ih en wehwehkihla sapwellimen Siohwa pwihn mwahusang mwowe. Kitail tamatamante dahme sounmelkahka kangoangehki mehn Israel kan en wehwehkihla, ni oaritik, wasao me Siohwa kin kaunda nan rahn pwukat.—Mel. 48:12, 13.
6 Kapai kan me kin Kohsang Doadoahk nan Bethel: Irail me kin doadoahk nan Bethel—ia arail pepehm duwen arail pwais akan en doadoahk nan Bethel? Menlau tehk duwen dahme irail me pwulopwul kan oh me mah kan kin koasoia. Emen tohn peneinei en Bethel me perenki doadoahk nan Bethel koasoia: “Ahi doadoahk nan Bethel sewesehda ahi nanpwung mwahu rehn Siohwa. Ekis ekis, ni ahi kin doadoahk nan Bethel oh ni ahi kin kilang dahme kin wiawi nan Bethel, I kin sukuhliki duwen sapwellimen Siohwa irair kan. Doadoahk nan Bethel pil kin sewese ie en kilang me Siohwa kin doadoahngki aramas—soangsoangen aramas akan. Oh ke sohte anahne unsek pwehn kenikenla pahn kupwuren Koht.”
7 Emen brother pwulopwul koasoia: “I tamataman me I kin medemedewe: ‘E pahn mwahu ma ni ahnsou me I memour nan koasoandi kapw, I kak ndaiong irail ohl lelepek kan me kin memour mahs mahsie ahpw iasada me I doadoahk sounpahr tohto nan Bethel, oh I sohte doadoahk nan sampah oh nantihong kepwehpwehla.’ ”
8 Pil emen brother pwulopwul kin medemedewe duwen kaiahn mwahu me e kin ale: “I kin sukuhliki duwen pein ngehi oh dahme I anahne kamwahuwihala nan ahi mour oh ahnsou me I kin kamwahuwihala wasa pwukat, I kin paiekihda laud. I kin pepehm me met I kak papah Siohwa mwahu sang mahs. I diarada me I kin ahneki kanengamah laud sang mahs, oh I kin kasalehda limpoak laud sang mahs.”
9 Emen sister kin medemedewe duwen kapai kan me e ahneki: “Prokram en pali ngehn kan kin sewese ie en sukuhliki duwen Siohwa oh iaduwen I kak kahlemengih Ih ni ahi madamadau, pepehm oh wiewia kan. Oh pwehki kaiahn pwukat kin wiwiawihte, ahi kapai kan kin mihmihte.”
10 Emen brother me papah Siohwa kaukaule (full-time) sounpahr 59 (e doadoahk nan Bethel sounpahr 43 samwa sang sounpahr 59 pwukat) koasoia: “Bethel sohte kin wia imwen “monk” kan, duwehte ekei kin lemeleme. Se kin wia doadoahk laud pwehki aht koasoandi kin mwahu. . . . Sohte ehu rahn me I kin kohla ahi wasahn doadoahk nan Bethel oh I sohte kin perenki dahme I kin wia. Pwekihda? Pwehki se kin wia uwen me se kak ni aht papah Siohwa, se kin kansenamwahuki aht ese me ‘se kin kapwaiada aht pwukoa.’ ”—Luk 17:10.
11 Pil emen brother, me papah nan Bethel sounpahr 62, koasoia: “I uhdahn kamehlele me Bethel kin wia wasa me keieu mwahu en mihmi ahnsouwet (ahnsouwet wehwehki rahn pwukat me Paradais saikinte pweida nin sampah). I sohte koluhkihla ahi papah Siohwa kaukaule (full-time) nan ahi mour. E inenen kaperen en kilang oh wia soangen doadoahk me pahn sewese kekeiradahn aramas nan sapwellimen Siohwa pwihn sansal! I men nantihong, ni ahi kin ale sawas sang rehn Siohwa, en mihmihte nan Bethel oh wia uwen me I kak ni ahi utungada oh sewese doadoahk en kalohk en pweida mwahu wasa koaros nan sampah.”
12 Brother oh sister pwukat me koasoi duwen arail pepehm kan me pid Bethel koasoia ekeite kapai kan me re perenki ni arail doadoahk nan Bethel. Ahpw, e sansal me mwohn emen kak iang sohte lipilipil doadoahk en papah Siohwa kaukaule (full-time), e anahne kasalehda me e kapwaiada ekei irair kan me anahn. Ia ekei irair pwukat me anahn ong emen me men wiahla tohn peneinei en Bethel?
13 Anahn akan ong Emen me Men Doadoahk Nan Bethel: Anahn pwukat kileledi nan koakon me mihmi nan pali 4 wet. Oh pil, e kesempwal me aramas pahn perenki doadoahk laud oh nanti, kaidehn emen me kin “inengieng pein arail peren.” (2 Tim. 3:4; 1 Kor. 13:11) Irail me kin wia tohn peneinei en Bethel anahn wia soangen ohl oh lih me mah ni pali ngehn oh me kin kolokol arail koasoandi en pein arail onop ahnsou koaros oh re kaiahndahr arail “kehl en kasawihada mwahu dahme mwahu oh dahme suwed.” (Ipru 5:14) Arail wia aramas mah ni pali ngehn pahn sansalda nan arail mour, iangahki arail likou, kapwat, arail pilipil nin duwen koul, keseng oh mehn kamweit. Irail me kin doadoahk nan Bethel en kasalehda me re kak wia sohte lipilipil doadoahk me anahn nan Bethel. Re kin kalap kihong irail me pwulopwul kan en wia doadoahk kan me re anahne paliwar kehlail en wia: duwehte wiahda (print) pwuhk kan, koasoanehdi pwuhk kan pwehn kadarala, apwalih misihn kan, kamwakel, lopolop, oh kaunopada mwenge ong tohn peneinei en Bethel. (Lepin Padahk 20:29) Sohte duwehte doadoahk nan sampah wet, doadoahk nan Bethel kin wahdo peren mehlel pwehki e kin pid papah Siohwa oh pwehki met: e kin kihda kaping laud ong Siohwa.—Kol. 3:23.
14 Irail me kin ale luhk en doadoahk nan Bethel anahne mihmi nan Bethel sohte mwotomwot sang sounpahr ehu. Met kin sewese irail en ale kaiahn pwehn wiahla tohndoadoahk mwahu oh pwerisek kei. Se kin koapworopworki me re pahn mihmi nan Bethel werei. Limpoak ong Siohwa pahn kamwekid tohn peneinei en Bethel en kihong doadoahk me pid Wehin Koht en keieu nan arail mour mwohn pein nsenarail, oh met kin kaperenda Siohwa.—Madiu 16:24.
15 Anahn en Ahnsou wet: Pwehki soangen doadoahk me kin wiwiawi nan Bethel ahnsouwet, dahme se anahne iei brother kan me sohte pwopwoud. Se kin perenki ma irail brother pwukat wia doadoahk en Regular Pioneer, pwehki met kin kasalehda me re men papah Siohwa kaukaule. Ekeite pak, se kin anahne pwopwoud kan oh pil sister kan me sohte pwopwoud (sang sounpahr 19 lel 35 ) me kin ese ekei doadoahk kan me se kin anahne nan Bethel. Oh pil, ekei pak, luhk kin kohwong ekei brother oh sister kan me mah sang sounpahr 35 ahpw me kin ese ekei doadoahk kan me se anahne—se kin luhke irail en audehda doaropwe me kin kasalehda me re men doadoahk nan Bethel. Karasepe ehu, irail me kin doadoahk nin duwen toahkte en ngih, toahkte kan, certified public accountant kan, architect kan, engineer kan, registered nurse kan, irail soun wiahda sidohsa kan, oh irail me kin wia liohl oh pil irail me kin wia soangen misihn en liohl, iei irail kan me kin se kin anahne pwehn doadoahk nan Bethel. Ahpw, se sohte kin kangoange aramas en iang sukuhl laud pwe ren kak sukuhliki doadoahk ehu me re lemeleme pahn sewese irail en ale luhk sang Society pwehn doadoahk nan Bethel. Irail me alehier sukuhl, mwein mwohn re iangala padahk mehlel, kak ntingihdi ni oaritik (résumé) sukuhl en doadoahk dah me re alehdier mahs oh doadoahk dah kan me re wia mahs oh kapedolong doaropwe wet iangahki neirail application en doadoahk nan Bethel.
16 Ma ke kapedolong noumw doaropwe ahpw re saikinte luhke iuk en doadoahk nan Bethel, ken dehr nsensuwedla. Ke kak pwurehng kapedolong noumw application pak ehu nan sounpahr ehu. Ekei brother kan me alehier sukuhl tohrohr pwehn wia doadoahk tohrohr me anahn nan Bethel kin tounmeteikihla arail ahnsou oh kehl pwehn doadoahk nan Bethel ong ahnsoukis. Re kak apply pwehn doadoahk nan Bethel ong wihk ehu, de riau, de siluh de pahieu ahpw sohte pahn dauli sounpwong siluh. Secretary en mwomwohdiso kin kolokol application kan ma emen men tounmeteiki pein eh ahnsou pwehn doadoahk nan Bethel ahnsoukis. Brother kan kak oaht soangen doaropwe pwukat (“Temporary Volunteer Applications”) ma re anahne (re kak doadoahngki “Literature Request Form”).
17 Papah Siohwa oh miniminiong irail me wia “rien Krais” kin wia pwais kaselel ong irail me kin doadoahk nan Bethel. Governing Body kin kalahnganki irail koaros me kin ahneki ngehn en tohnmetei pwe ren kak sewese kaitarala anahn akan en riatail kan wasa koaros nan sampah.—Pilipai 2:20-22; 2 Tim. 4:11.
18 Kumwail, me Pwulopwul kan—Kaunopada Ahnsou wet Pwehn Kak Doadoahk Nan Bethel Ehu Rahn: Kaunopada ong doadoahk nan Bethel kin wiawi mwohn irail me pwulopwul kan kin mahki sounpahr 19. Dahme irail me pwulopwul kan kak wia pwehn kaunopada ong doadoahk nan Bethel? Sises mahsanih: “Ihs rehmwail, nan eh koasoakoasoane en kauwada eh imwen doulik ehu, e soh pahn mwohndi mahs oh medemedewe uwen pweine, pwe en kilang ma mie reh mwohni me itar kanekehla ihmwo?” (Luk 14:28) Pwehki kaunop oh koasoanehdi soahng tohto kin wiawi pwehn wiahda ihmw ehu oh pweida mwahu, ia uwen e pil kesempwal me pwulopwul kan en tehk kanahieng arail koasoandi kan pwehn kak wia uwen me re kak nan arail papah Siohwa ni ahnsou kohkohdo! Poahsoan mwahu anahne wiawihda mwadang nan arail mour pwehn sewese irail en lel mehn akadei ngehnin kan. Nin duwen emen me pwulopwul, ke wiwiahdahte ahmw poahsoan en kehlail oh teng? Ma ke men doadoahk nan Bethel, e pahn mwahu en tehk kanahieng dahme ntingihdi wasaht:
19 “Koasoanehdi Ahmw Koasoandi kan” Pwe Ken Kak Iang Doadoahk wet: Nin duwen me ntingihdi nan Madiu 19:12, Sises kangoange sapwellime tohnpadahk kan en “koasoanehdi” pwe ren dadaurete ar kiripw. Dahme kahrehda? Met sohte wiawi pwehn kapwaiada pein nsenatail, ahpw, e kin wia “pwehki Wehin Koht.” Pohl pil kangoange aramas en “papah Kauno ni kapehd mehlel oh unsek.” (1 Kor. 7:32-35) E kin kansensuwed pwe ekei brother pwulopwul kan kin mwadang pwopwoudla, kahrehda re sohte kak alehdi pwais kaselel en doadoahk nan Bethel. Se men kangoange brother pwulopwul kan en doadoahngki arail kehl pwehn Regular Pioneer nin doken re saikinte ahneki pwukoa en peneinei. Ahpw, mwuhr, ma re pilada me re men pwopwoud, re pahn wiahla ohl pwopwoud mwahu kei pwehki re ahnekier ekspiriens en mour oh re koahieklahr nan doadoahk en kalohk. Mwurinte arail doadoahk sounpahr tohto nan Bethel, ekei kin pwopwoudla oh ira koaros pwopwoudo kin doadoahk nan Bethel. Ma mwuhr re alehdi pwais tohrohr kan duwehte doadoahk en sounapwalih en Circuit kan de misineri kan, re sohte pahn koluhkihla ara ahnsou me re doadoahk nan Bethel.
20 Ken Dehr Kedirepwki Nantihong Kepwehpwehla: E pahn mwahu ma emen emen me pwulopwul kan en idek pein rehrail peidek wet: ‘Ahi mehn akadei mwurin ahi kesempwil sang high sukuhl iei en nantihong alehdi doadoahk me pwei mwahu de nantihong en papah Siohwa kaukaule (full-time)?’ Mehlel, papah Siohwa kaukaule pahn wehwehki me ke anahne wiahda tounmetei kan. Ahpw, e pil pahn duwehte nantihong alehdi doadoahk me pwei mwahu! Ni kaimwiseklahn mehkoaros, mehnia me pahn wahdohng uhk peren oh nsenamwahu mehlel? Sises kihda pasapeng me sansal. Nan duwen dahme ntingihdi nan Madiu 6:19-21, e mahsanih: “Kumwail dehr kin ngoangki kepwehpwehkihla kepwehn sampah, me mer oh loangenmwet kin kauwehla, oh wasa me aramas lipirap akan kin dapengpeseng ihmw kan oh pirap ie. A kumwail ngoangki kepwehpwehkihla paien nanleng, me mer oh loangenmwet sohte kin kauwehla, oh wasa me aramas lipirap akan sohte kak dapengpeseng ihmw akan oh pirap ie. Pwe ahnsou koaros kapehdamwail kin uhlahng wasa me amwail dipwisou kesempwal kan kin mi ie.” Kitail en kanahieng pwe kitail en dehr mweidohng kapehdatail en kahrehong kitail en nantihong pwehn alehdi doadoahk me pwei mwahu oh men kepwehpwehkihla kepwehn sampah oh kitail uhd sohte pahn papah Siohwa sang mohngiongatail unsek. Kitail koaros wehwehkihla me atail mehn akadei me keieu kesempwal iei en ahneki nanpwung mwahu rehn Siohwa, oh kaperenda Ih. (Lepin Padahk 27:11) Ma kitail mwohnki Siohwa nan atail mour ni atail wie pwulopwulte, kitail kin kasalehda dahme kitail kin keieu kesempwaliki oh ia uwen Wehin Koht kin kesempwal nan atail mour. Tamataman, “kupwurmwahu en Siohwa me kin kahrehda omw kepwehpwe, oh e sohte kin kansensuwedihiukala.” (Lepin Padahk 10:22, New World Translation) Me pwulopwul kan kin ahneki ahnsou mwahu en kasalehda dahme mihmi nan mohngiongarail ni arail pahn kapwurehong Siohwa mehkot mwahu oh met pahn kasalehda arail kalahnganki dahme E wia ong irail. Ma emen kakohng doadoahk nan Bethel, doadoahk wet kin wia mehkot mwahu.
21 Irail me kin Doadoahk Nan Bethel Anahne Tiahk Mwakelekel: Sounmelkahka wia peidek wet: “Iaduwen mwahnakapw men eh kak dadaur eh mour mwakelekel?” E sapeng: “Eh pahn kin kapwaiada sapwellimen [Siohwa] kosonned akan.” (Mel. 119:9) Met pahn wehwehki me kitail anahne liksang soahng kan me kin pid tiahk samin en sampah wet. Sehdan kin doadoahngki kilel en tiahk suwed me kin pwarada nan internet, tiahk rehn pwutak de serepein teikan me sohte konehng Kristian, koul oh keseng suwed, mehn kamweit suwed kan, oh nim sakau ni sounpahr me re saikinte kak nim kin wia ekei tiahk kan me Sehdan kin doadoahngki pwehn kaluwetala me pwulopwul kan pwe re sohte pahn lel arail mehn akadei ni pali ngehn. Emen anahne en kehlail ni pali ngehn pwehn powehdi kasongosong pwukat. Ma kowe emen pwulopwul, oh ke kin wia soahng pwukat, ken mwadang tuhwong elder kan nan ahmw mwomwohdiso oh kapwungala soahng pwukat mwohn ke pahn kapedolong noumw application ong doadoahk nan Bethel. Ahneki nsen mwakelekel kin wia mehkot kesempwal pwehn papah Siohwa sang mohngiongomw unsek.—1 Tim. 1:5.
22 Sukuhliki Pwehn Miniminiong Meteikan: Mehkot me inenen kesempwal pwehn pweida mwahu nan Bethel iei en miniminiong meteikan. Brother oh sister kid kid kei me kohsang wehi tohto wie tohn peneinei en Bethel nan United States. Soangsoangen aramas pwukat kin kahrehda lingan en pali ngehn en wiawi nan Bethel, ahpw, ni mehlel, ekei pak e kin kahrehda kahpwal kan en pwarada. Ma ke medemedewe me ke men iang Bethel, idek pein rehmw peidek wet: ‘I kin nsensuwed ma meteikan sohte kin pwungki ahi madamadau? Meteikan kin mengei en miniminiong ie?’ Ma ke anahne kamwahuwihala ekei wasa kan nan ahmw mour me pid miniminiong meteikan, ken tepida wia met ahnsouwet. Ahmw wia met pahn sewese iuk en mihmi rehn oh doadoahk rehn irail tohn peneinei en Bethel teikan.
23 Ken doadoahk laud ni ahmw pahn nantihong wiahla aramas me mah ni pali ngehn ni ahmw pahn kekeirada nanpwung mwahu rehn Siohwa. Wiahda ahmw koasoandi en wia pein ahmw onop, iangahki ahmw koasoandi en wadek Paipel rahn koaros. Ken kalapw iang meteikan kalohk. Ni ahmw pahn wia mehpwukat, ke kak kasalehda me ahmw pali ngehn wie kekeirada. (1 Tim. 4:15) Irail me kaunopada met pwehn papah Siohwa kaukaule (full-time) kak ale kapai tohto!
24 Pahpa oh Nohno kan, Kaiahne Noumw Seri kan: Dahme pahpa oh nohno kan kin wia pwehn kangoange neirail seri kan en papah Siohwa kaukaule (full-time)? Sises mahsanih: “Tohnpadahk koaros, ni ar pahn deila mehlel, re pahn kin duwehla ar sounpadahk kan.” (Luk 6:40) Emen me kin sukuhl mwahu sang eh sounpadahk pahn kasalehda irair mwahu duwehte eh sounpadahk. Met kin kihong pahpa oh nohno Kristian kan madamadau laud ni arail pahn nantihong kaiahne neirail seri kan “ni pali ngehn.” (1 Tim. 4:7) Pwehki seri kan kin kak alasang arail pahpa oh nohno kan me pid duwen soahng ngehnin kan, e pahn mwahu ma pahpa oh nohno pahn idek pein rehrail peidek pwukat: ‘Se kin kesempwaliki doadoahk me wiawi nan Bethel pwehn sewese aramas en kaudokiong Siohwa ni ahl me mehlel? Se kin pohnese duwen Siohwa a kapaiada koasoandi en Bethel? Se kin kamehlele me papah Siohwa kaukaule (full-time) kin wie mour me keieu mwahu ong neit seri kan?’ Pein atail pepehm en kalahnganki doadoahk nan Bethel oh dahme kin wiawi wasao pahn sewese kitail en sewese neitail seri kan en pil ahneki soangen kalahnganohte.
25 Elkana oh Ana kin kalahnganki laud kaudok mehlel. Re wia mehn kahlemeng mwahu ong pahpa oh nohno Kristian kan rahnwet. Nan Israel en mahs, ihte ohlen Israel kan anahne “pwarodo [ni Impwal Sarawio] pwehn wia kaudok ong Kaun mehlelo, Siohwa” pak siluh nan pahr koaros. Ahpw, Elkana iangahki eh peneinei pwon, seiloakla mwail 20 (likamwete re alu) “sounpahr koaros” pwehn wia eh meirong wasao pwehki ih wasao me kaudok en Siohwa kin wiawi ie. (Eksodus 23:17; 1 Sam. 1:3, 4, 9, 19; 2:19) E sansal me tapwin peneinei menet kin mwahuki eh peneinei pwon en iang nsenohki soahng ngehnin kan.
26 Ana kin iang eh pwoud nin duwen eh kin nsenohki soahng kan me pid kaudok mehlel. E kin men kapwaiada eh pwukoa en sawas pwehn utungada kaudok mehlel nan Impwal Sarawio. Ana inoukihda me: ma Siohwa pahn kihong ih nah pwutak, e pahn kihong Siohwa nah pwutak ni eh pahn mweidohng ih en doadoahk nan Impwal Sarawio. (1 Sam. 1:11) Kosonned en Moses kin kasalehda me: ma emen ohl pwopwoud sohte kin pwungki inou ehu me eh pwoud wiahda, e kak kauwehla inou wet. (Nempe 30:6-8) Ahpw, e sansal me Elkana pwungki inou me Ana wiahda, oh met pil kasalehda uwen e kin utungada soahng kan me pid kaudok mehlel!—1 Sam. 1:22, 23.
27 Neira pwutak Samuel kin alasang kalahngan me eh pahpa oh nohno kasalehda? Ei. Ni eh wie pwutak pwulopwul men, Samuel kin nseneki wia eh pwukoa kan ni lelepek oh e pil kin ale kaiahn pwehn kalaudehla eh doadoahk en papah Siohwa. E pil sansal me Elkana oh Ana kin nsenohkihte neira pwutak eh kin papah Siohwa nan Impwal Sarawio pil mwurinte eh ale pwukoa wasao. Re kin kaukaule kohla reh oh kihong ih kangoang oh utung ni eh kin papah Siohwa kaukaule (full-time).—1 Sam. 2:18, 19.
28 Elkana oh Ana kin wia mehn kahlemeng mwahu ong pahpa oh nohno Kristian kan rahnwet! Ni ahnsou me neitail seri kan kin rong atail kasalehda atail kalahnganki doadoahk nan Bethel oh ni arail kin kilang atail tounmetei kan ong doadoahk en kalohki Wehin Koht, re pahn pil men sewese meteikan. Pahpa oh nohno tohto me sewese neirail seri kan en kasalehda ngehnen tounmetei kin pweida mwahu. Emen serepein me sounpahr isuh ntingihdi: “Ni ahnsou me I pahn laud, I men doadoahk nan Bethel, oh mie soahng kan me I men iang wia wasao. (1) Type artikel kan nan makisihn en Watchtower oh Awake!, (2) doadoahk nan wasahn wia mahlen oh kilel kan, (3) limpene likou kan me lopwolopwdahr. Sohte lipilipil doadoahk kan me re men ngehi en wia, I pahn wia. Sohte lipilipil doadoahk dah.” E kin kansenamwahu en kilang ngehnen tounmetei nan mohngiong en neitail seri kan!
29 Kumwail, me pwulopwul kan, tamataman me “sampah wet oh mehkoaros nin sampah me aramas kin inengieng kin sosohrala; ahpw me kin kapwaiada kupwuren Koht pahn momour kohkohlahte.” (1 Sohn 2:17) Kumwail nantihong lel amwail mehn akadei ngehnin kan, iangahki ahmw mehn akadei tohrohr en doadoahk nan Bethel. Kumwail, pahpa oh nohno kan, alasang mehn kahlemeng mwahu en irail me momour mahs mahsie me lelepek oh kin kangoange neirail seri kan en ale kaiahn en pali ngehn. (2 Pit. 3:11) Oh kumwail en wia uwen me kumwail kak en sewese irail brother oh sister pwulopwul kan en wia uwen me re kak en papah Sounkapikpatail, pwehki met kin kak “kahrehiong irail mour mwahu ahnsou wet oh ahnsou kohkohdo.”—1 Tim. 4:8; Ekl. 12:1.
[Kaokon nan Pali 4]
Anahn akan ma Emen men Doadoahk nan Bethel
● E papidaislahr sounpahr ehu samwalahro de werei sang
● Emen me kin perenki soahng ngehnin kan oh kin ahneki limpoak loal ong Siohwa oh sapwellime pwihn
● E roson ni paliwar, pali ngehn, palien madamadau oh palien pepehm
● E wia emen towe mehlel (citizen) en United States de e kousoan nin duwen emen legal permanent resident en United States
● E kak wadek, nting oh pil doadoahngki mwahu lokaiahn wai
● E pahn mahki nanpwungen sounpahr 19 lel 35