Pwoson Mehlel E Kakete Wiawi?
“Pwoson iei likilik ohng sapwellimen Koht mahk me wie momour oh kehlail, inenen kamehlele oh wehwehki me kahrehong me kamehlele men pahn kak kihong ah mour nan keper pak kid.”—MARTIN LUTHER, 1522.
“Kereniong ni ahl koaros, kitail wiahlahr pwihn en aramas ieu me pwoson oh wiewiahn Kristian sohrasangehr.”—LUDOVIC KENNEDY, 1999.
MADAMADAU ong wehwehn pwoson inenen wekpeseng. Mahso, pwoson Koht mehkot rek wasa. Nan rahn pwukat, nan sampah en ahnsou wet me apwal oh peikasal en aramas laud, uhdahn pwoson Koht oh Paipel mwadangete sosohrala.
Pwoson Mehlel
Rehn aramas tohto, “pwoson” ni mengei kin wehwehki ahneki pelien lamalam de ieiang soangen mwomwen kaudok ieu. Ahpw, nin duwen lepin lokaia “pwoson” doadoahk nan Paipel, e kin wehwehki likilik unsek—likih Koht oh sapwellime inou kan ni unsek oh soangen likilik me sohte kak ohla. Met iei irair ehu me wia kasalepen sapwellimen Sises Krais tohnpadahk men.
Ehu pako, Sises Krais mahsanih duwen anahnpen kapakap oh “dehr luwetala.” Ong wasaht, e ketikihda keinemwe ieu me pid ma iei pwoson mehlel pahn kak dierek nan atail ahnsou. E keinemwe: “Ni ahnsou me Nein-Aramas pahn leledo, e pahn diar soangen pwoson wet nan sampah?” Dahme kahrehda e ketin wiahki keinemwe wet?—Luk 18:1, 8, footnote, New World Translation.
Kesehla Pwoson
Soahng tohto kak kahrehong aramas akan en kesehla arail pwoson me mie rehrail. Nanpwungen soahng pwukat iei soahng kamedek oh apwal akan me kin lelohng atail mour nan ehu ehu rahn. Karasepe ieu, Professor Michael Goulder, wia padre nan Manchester, England, ahnsou me pwupwudi en sompihr wiawi nan Munich nan 1958 me kemehla diren tohn Manchester United football team. Nan ehu BBC television program, sounpakair Joan Bakewell kawehwehda me Goulder “sohla ah koapworopwor ni ah kilang uwen tohtohn aramas me nsensuwedla.” Ehu me met kahrehong ih “en sohla ah pwoson Koht emen me kin kaweid imwilahn kekeid en aramas.” Goulder kawehwehda duwen dahme e kamehlele me “Paipel kaidehn . . . Mahsen en Koht me sohte kak sapwungala,” ahpw, “iei ahn aramas koasoi oh kin sapwung, ahpw, mwein ele utuht ekei pak kin kohsang ngehn sarawi.”
Ekei ahnsou, pwoson kin sohrala. Iei me wiawihong soun nting oh sounkair Ludovic Kennedy. E koasoia me sang ni a seri ah “peikasal oh sawehwe duwen Koht kin ekei ahnsou laudila oh met ah sohla kamehlele Koht lalaudla.” Likamwete sohte aramas emen kak kihong ih pasapeng en ah peidek kan me kak kaitarala dahme e men ese. Ah pahpa mehla nansed oh met inenen wia kaupe laud ong ah pwoson tikitik me mie. Ah kapakap akan ong Koht pwehn “kolasang kitail nan apwal akan en nansed oh sang loallop en imwintihti kan” sohte ale pasapengpe nin doken weren mehn Sehmen akan sohp en mahwen ah kauwehla sohp me ah pahpa iang mih powe nan Mahwen Keriau en Sampah.—All in the Mind—A Farewell to God.
Ekspiriens pwukat kin kalapw wiawi. Wahnpoaron Pohl mahsanih: “Pwe kaidehn aramas koaros kin ahneki pwoson.” (2 Deselonika 3:2) Dahme ke lemeleme? Pwoson Koht oh sapwellime Mahsen, ni mehlel, e soh wia kahpwal ieu me wia lalaudla nan sampah en aramas soh likilik wet? Tehk dahme artikel en mwurin met pahn koasoiahki oaralap wet.