Iren Mehn Kasukuhl Sang Tuhke Palm

“LINGAN tohrohr oh kin weliwelikek tikitik.” Iei duwen ehu Paipel encyclopedia a kawehwe duwen tuhke me adaneki “date palm.” Nan ahnsou en Paipel oh leledo ahnsou wet, date palm kan kin kapwata nan wahu en Nail nan Isip, oh kin kihda mwete kansenamwahu limwahn oases nan sapwtehn en Negeb.

Duwehte tuhke me mwomwen nih koaros, date palm kin inenda oh reirei. Ekei kin lel piht 100 oh wie weuwahki sounpahr 150. Ei, date palm inenen lingan oh emwemweihn. Ehu ehu sounpahr, e kin kihda diren emwin date kan. Ehute emwih kak wah 1,000 mih ie. Emen ohl me wehwehki laud duwen tuhkehn date palm ntingihdi: “Irail ako me kin kilang wahn date kan ni ah kin pelengda oh ngalangal oh kohieng nan ehd plastic nan sidohwa, irail pwuko sohte kak ese duwen iou en wahn date kan me ahpwtehn dondoldi.”

Ni irair konehng, Paipel kin karasahiong ekei aramas duwehte tuhkehn palm (mwomwen nih). Ma aramas emen men keniken mwohn silangin Koht, rasehng wahn tuhkehn palm, aramaso pahn ahneki irair en aramas mwakelekel oh pahn ahnsou koaros kasalehda wiewia mwahu. (Madiu 7:17-​20) Ihme kahrehda, mahlen en tuhkehn palm kin wia mehn kapwat nan imwen kaudok me Solomon wiahda oh pil nan kasansal en imwen kaudok nan sapwellimen Esekiel auremen. (1 Nanmwarki 6:29, 32, 35; Esekiel 40:14-​16, 20, 22) Kahrehda, pwe Koht en kupwurki kaudok en aramas emen, aramaso uhdahn pahn ahneki irair akan me mwahu duwehte date palm. Mahsen en Koht kawehwehda: “Me pwung kan pahn pweida mwahu duwehte nih kan.”​—Melkahka 92:12.