Ke Kak Wiahda Sampah Ieu me Mwahu Sang Mehn Ahnsouwet?

Ke Kak Wiahda Sampah Ieu me Mwahu Sang Mehn Ahnsouwet?

“Palien politiks sohte kak kapwurepene dereht akan me kin kolpene pwihn en aramas ieu. E sohte itar pwehn wiahda dahme aramas kin pwoson me pid duwen wiewia mwakelekel. Mehn kaweid keieu kaselel akan sohte kak kapwuredohng kitail duwen wiepe mehlel me pid inou en pwopwoud de pwopwoud, oh wiahiong poupali kan en pwukoahki neirail seri kan, oh kapwurehdo saro oh namenengki wia me suwed me aramas kin ahneki mahso. . . . Pali moron en kahpwal akan me pid wiewia mwakelekel me wia kahpwal ong kitail—⁠palien kosonned sohte kak kihsang.”

KE kak kamehlele dahme ohl me mahs wia weliepen wehin U.S. koasoia wasaht? Ma iei, eri dahme pahn kamwahuwihala kahpwal tohto kan me mie rahnwet me kin kohdahsang roporop, sempoakiong peneinei, pwupwulahn mour mwakelekel, soukautih oh suwedlahn ehupenehn kousoanpenehn aramas? Ekei aramas pepehm me solahr mehkot kitail kak wiahiong, eri irail pein wiewiahier pein arail mour uwen kak koaros me mie. Ekei kin koapworopworki me, ehu rahn, kaun mwahu me loalokong me kakete wia kaunen palien lamalam men pahn pwarada oh kahluwa irail ohng elen mour mwahu.

Ni mehlel, sounpahr riekid samwalahr oko, aramas akan me wiakihla Sises Krais arail nanmwarki pwe re kilang me e pekederdo sang rehn Koht oh kak wia kaun me keieu koahiek. Eri, ni Sises ah mwahngihada arail madamadauo, e mwadangete ketiketwei sang wasao. (Sohn 6:14, 15) Mwuri, Sises mahsanih ong Kepina en Rom: “Ei wehi, kaidehn kisehn sampah wet.” (Sohn 18:36) Nan rahn pwukat, aramas malaulau me kin alasang Sises—pil lel irail kaunen pelien lamalam akan me kose me irail iengen Sises ekei. Ekei irail kin songosong en pein kamwahuwihala sampah ni arail kin song en koasoiong kaunen wehi kan de irail pil kin alehda pwukoah nan palien politik. Kitail kak kilang met ni atail kin tehk wiewia kan me wiawi nan pahr akan en 1960 samwa oh 1970 samwa.

Pelien Lamalam Kin Song en Kamwahuwihala Sampah

Nan 1960 samwa, ekei kaunen lamalam nan wehi kan en Latin-America kin uhpaliada oh peiki aramas semwehmwe oh tikitik kan. Sang ni kahrepe wet, irail alehda wehwe kapw en arail pelien lamalam, oh dene Krais solahr wiahte sounkomour nin duwen wehwe nan Pwuhk Sarawi, ahpw e pil wia sounkomour en palien politik oh paien wehin sampah. Nan United States, kaunen pelien lamalam kei me inenen tihwokihla suwedlahn wiewia mwakelekel en aramas wiahda pwihn ieu me ede “Moral Majority.” Arail mehn akadei iei en kihlong nan ohpis akan en palien politik aramas akan me pahn kihong nan kosonned tiahk en peneinei mwahu. Pil duwehte nan sapwen mehn Muslim tohto, pwihn en aramas akan songosong en kamwahuwihala wiewia lemei oh suwed akan ni arail nantihong aramas en mourki audepen pwuhk en Koran.

Ke kamehlele me sampah mwahulahr pwehki posongosong pwukat? Dahme mie kasalehda me, pali moron en aramas—⁠arail tiahk wie susuwedla oh irairpeseng en me kepwehpwe oh me semwehmwe kan wia lalaudla, oh pil met inenen mehlel rehn irail akan me arail pelien lamalam songosong wia pein arail elen sawas tohrohr akan.

Pwehki pwihn en “Moral Majority” arail sohte kak wiahda arail mehn akadei kan, ohl me wiahda pwihn wet nan United States, me ede Jerry Falwell, kesehla pwihn wet nan 1989. Mie pwihn teikan me uhd wiliandi. Ahpw, Paul Weyrich, me tepin wiahda ahd “moral majority,” ntingihada nan makisihn me ede Christianity Today oh koasoia: “Mendahte me kitail pil kana nan pelien politik, atail kana kan sohte katepe pwe e sohte kak wiahda soangen politik me kitail kamehlele me iei me kesempwal. Ohlahn atail tiahk lalaudla sang mahs. Kitail tengalahr nan irair en pwupwulahn tiahk me nan poadoapoad sohte me pahrekiong, pwupwulahn ieu me dauli dahme pelien politik kak sewesehda.”

Soun nting Cal Thomas kasalehda ah madamadau ohng dahme kasapwungala posongosong en kamwahuwihala mour en aramas ni doadoahngki palien politik: “Wekidekila mehlel kin sang rehn emen emen aramas, kaidehn pweidahn usuhs, pwehki poahsoanen kahpwal akan kaidehn pwehki pelien paien wehi de politik ahpw pwehki e pid mour mwakelekel oh pali ngehn en aramas.”

Ahpw, iaduwen ahmw kak kamwahuwihala tiahk mwakelekel oh pali ngehn nan sampah ieu me sohte koasoandi mie, oh me aramas akan me pein pilada dahme pwung oh dahme sapwung? Ma aramas lapalap akan—⁠me wie tohn pelien lamalam de soh—sohte kak kamwahuwihala sampah, eri ihs me pahn kak wia met? Nin duwen me kitail pahn kilang nan artikel en mwuhr, mie pasapeng ong met. Ni mehlel, e poahsoankihda mahsen en Sises me koasoia me ah wehi kaidehn kisehn sampah.

[Kilel Credit Lines nan Pali 2]

[Kilel Credit Lines nan Pali 3]