“Kita Nek Tuhpene Nan Wehin Koht”

“Kompoakepai! Rupert, rahnwet I pahn kamala. Ke dehr sengisengkin ie. I kadarewei ahi rahnmwahu en limpoak ohng uhk oh koaros nan imwomw. Kita nek tuhpene nan Wehin Koht.”

NI JUNE 8, 1942, Franc Drozg ntingihdi lokaia pwukat ni erein minit ekei mwohn sounpei en Nazi kan arail kasikihedi. Dahme kahrehda e kamakamkihla?

Nin duwen dahme dierek nan Museum of National Liberation in Maribor, Slovenia, sounsuk mete menet me sounpahr 38 kahng iang palien Wehrmannschaft, pwihn en sounpei ehu en Sehmen nan Slovenia. E wie emen Bibelforscher, me wehwehki emen Tohnsukuhl en Paipel​—⁠Sounkadehdehn Siohwa kan iei adarail nan arail wasao ahnsowo. E kin peikiong kaweid en Aiseia 2:4, oh e sohte kak utung wiewiahn mahwen me Nazi kin nannantihong, oh e ndahng irail me ih laduhn Wehin Koht emen.​—Madiu 6:33.

Nan wasahn kousoan en Ptuj, aramas akan kin ese Franc me iei ih sounkalohk pwahtiet men en Rongamwahu en Wehin Koht. (Madiu 24:14) Mendahki soangsoangen kahpwal tohto kan, e kin sohte tokedihsang ah doadoahk en kalohk lau lel eh irairdihsang eh saledek nan May 1942.

Sounkadehdehn Slovenia tohto lelohng kalokolok laud sang rehn Nazi kan. Franc iei ih emen me tepin iang ale kalokolok oh kamala pwehki ah lelepekiong ah pelien lamalam. E kin duwehte Kristian nan keieun senturi me kin ale kakehlepen arail lamalam sang ni mahsen pwukat: “Kitail pahn pedolong nan Wehin Koht sang atail pahn lelohng kalokolok kan.” (Wiewia 14:22) Ah kamehlele wehin Koht me kakaun sang nanleng sansal mwahu ki ah kaimwiseklahn koasoi kan: “Kita nek tuhpene nan Wehin Koht.”

[Kilel Credut Line nan Pali 30]

Franc Drozg: Kilele mih nan Archive-Museum of National Liberation Maribor, Slovenia; nah kisinlikou mih nan Museum of National Liberation Maribor, Slovenia